|| atha jitaMte stotre dvitIyo.adhyAyaH ||

jitaM te puMDarIkAkSha namaste vishvabhAvana |
namaste.astu hRRiShikesha mahApuruShapUrvaja ||1||

vij~nApanamidaM deva shRRiNuShva puruShottama |
naranArAyaNAbhyAM cha shvetadvIpanivAsibhiH ||2||

nAradAdyairmunigaNaiH sanakAdyaishcha yogibhiH |
brahmeshAdyaiH suragaNaiH paMchakAlaparAyaNaiH ||3||

pUjyase puMDarIkAkSha divyairmaMtrairmahAtmabhiH |
pAShaMDadharmasaMkINe bhagavadbhaktivarjite ||4||

kalau jAto.asmi devesha sarvadharmabahiShkRRite |
kathaM tvAmasamA(dA)chAraH pApaprasavabhUruhaH ||5||

archayAmi dayAsiMdho pAhi mAM sharaNAgatam |
tApatrayadavAgnau mAM dahyamAnaM sadA vibho ||6||

pAhi mAM puMDarIkAkSha kevalaM kRRipayA tava |
janmamRRityujarAvyAdhiduHkhasaMtaptadehinam ||7||

pAlayAshu dRRishA deva tava kAruNyagarbhayA |
iMdriyANi mayA jetumashakyaM puruShottama ||8||

sharIraM mama devesha vyAdhibhiH paripIDitam |
mano me puMDarIkAkSha viShayAneva dhAvati ||9||

vANI mama hRRiShikesha mithyApAruShyadUShitA |
evaM sAdhanahIno.ahaM kiM kariShyAmi keshava
rakSha mAM kRRipayA kRRiShNa bhavAbdhau patitaM sadA ||10||

aparAdhasahasrANAM sahasramayutaM tathA |
arbudaM chApyasaMkhyeyaM karuNAbdhe kShamasva me ||11||

yaM chAparAdhaM kRRitavAn aj~nAnAt puruShottama |
aj~nasya mama devesha tat sarvaM kShaMtumarhasi ||12||

aj~natvAdalpashaktitvAdAlasyAdduShTabhAvanAt |
kRRitAparAdhaM kRRipaNaM kShaMtumarhasi mAM vibho ||13||

aparAdhasahasrANi kriyaMte.aharnishaM mayA |
tAni sarvANi me deva kShamasva madhusUdana ||14||

yajjanmanaH prabhRRiti mohavashaM gatena
nAnAparAdhashatamAcharitaM mayA te |
aMtarbahishcha sakalaM tava pashyato hi
kShaMtuM tvamarhasi hare karuNAvashena ||15||

karmaNA manasA vAchA yA cheShTA mama nityashaH |
keshavArAdhane sA syAjjanmajanmAMtareShvapi ||16||

|| iti jitaMte stotre dvitIyo.adhyAyaH ||