jitaMte stotre prathamo.adhyAyaH
|| atha jitaMte stotre prathamo.adhyAyaH ||
brahmovAcha
jitaM te puMDarIkAkSha pUrNaShAguNyavigraha |
parAnaMda parabrahman namaste chaturAtmane	||1||
namaste pItavasana namaH kaTakahAriNe |
namo nIlAlakAbaddha veNIsuMdarapuMgava	||2||
sphuradvalayakeyUranUpurAMgadabhUShaNaiH |
shobhanairbhUShitAkAra kalyANaguNarAshaye	||3||
karuNApUrNahRRidaya shaMkhachakragadAdhara |
amRRitAnaMdapUrNAbhyAM lochanAbhyAM vilokaya	||4||
kRRishaM kRRitaghnaM duShkarmakAriNaM pApabhAjanam |
aparAdhasahasrANAM AkaraM karuNAkara	||5||
kRRipayA mAM kevalayA gRRihANa mathurAdhipa |
viShayArNavamagnaM mAmuddhartuM tvamihArhasi	||6||
pitA mAtA suhRRidbaMdhurbhrAtA putrastvameva me |
vidyA dhanaM cha kAmashcha nAnyat kiMchit tvayA vinA	||7||
yatra kutra sthale vAso yeShu keShu bhavo.astu me |
tava dAsyaikabhAve syAt sadA sarvatra me ratiH	||8||
manasA karmaNA vAchA shirasA vA kathaMchana |
tvAM vinA nAnyamuddishya kariShye kiMchidapyaham	||9||
pAhi pAhi jagannAtha kRRipayA bhaktavatsala |
anAtho.ahamadhanyo.ahamakRRitArtho hyakiMchanaH	||10||
nRRishaMsaH pApakRRit krUro vaMchako niShThuraH sadA |
bhavArNave nimagnaM mAmananyakaruNodadhe	||11||
karuNApUrNadRRiShTibhyAM dInaM mAmavalokaya |
tvadagre patitaM tyaktuM tAvakaM nArhasi prabho	||12||
mayA kRRitAni pApAni vividhAni punaH punaH |
tvatpAdapaMkajaM prAptuM nAnyat tvatkaruNAM vinA	||13||
sAdhanAni prasiddhAni yAgAdInyabjalochana |
tvadAj~nayA pravRRittAni tvAmuddishya kRRitAni vai	||14||
bhaktyaikalabhyaH puruShottamo hi 
jagatprasUtisthitinAshahetuH |
akiMchanaM nAnyagatiM sharaNya 
gRRihANa mAM kleshinamaMbujAkSha	||
dharmArthakAmamokSheShu nechChA mama kadAchana |
tvatpAdapaMkajasyAdho jIvitaM mama dIyatAm	||16||
kAmaye tAvakatvena paricharyAsu vartanam |
nityaM kiMkarabhAvena parigRRihNIShva mAM vibho	||17||
lokaM vaikuMThanAmAnaM divyaM ShAguNyasaMyutam |
avaiShNavAnAmaprApyaM guNatrayavivarjitam	||18||
nityaM siddhaiH samAkIrNaM tvanmayaiH pAMchakAlikaiH |
sabhAprAsAdasaMyuktaM vanaishchopavanaiH shubhaiH	||19||
vApIkUpataTAkaishcha vRRikShaShaMDaishcha maMDitam |
aprAkRRitaM surairvaMdyamayutAkasamaprabham	||20||
prakRRiShTasattvarAshiM tvAM kadA drakShyAmi chakShuShA |
krIDaMtaM ramayA sArdhaM lIlAbhUmiShu keshavam	||21||
meghashyAmaM vishAlAkShaM kadA drakShyAmi chakShuShA |
unnasaM chArudashanaM biMboShThaM shobhanAnanam	||22||
vishAlavakShasaM shrIshaM kaMbugrIvaM jagadgurum |
AjAnubAhuparighamunnatAMsaM madhudviSham	||23||
tanUdaraM nimnanAbhimApInajaghanaM harim |
karabhoruM shriyaHkAMtaM kadA drakShyAmi chakShuShA	||24||
shaMkhachakragadApadmairaMkitaM pAdapaMkajam |
sharachchaMdrashatAkrAMtanakharAjivirAjitam	||25||
surAsurairvaMdyamAnamRRiShibhirvaMditaM sadA |
mUrdhAnaM mAmakaM deva tAvakaM maMDayiShyati	||26||
kadA gaMbhIrayA vAchA shriyA yukto jagatpatiH |
chAmaravyagrahastaM mAmevaM kurviti vakShyati	||27||
kadA.ahaM rAjarAjena gaNanAthena choditaH |
chareyaM bhagavatpAdaparicharyAsu vartanam	||28||
shAMtAya suvishuddhAya tejase paramAtmane |
namaH sarvaguNAtItaShAguNyAyAdivedhase	||29||
satyaj~nAnAnaMtaguNabrahmaNe chaturAtmane |
namo bhagavate tubhyaM vAsudevAmitadyute	||30||
chatuHpaMchanavavyUhadashadvAdashamUrtaye |
namo.anaMtAya vishvAya vishvAtItAya chakriNe	||31||
namaste paMchakAlaj~na paMchakAlaparAyaNa |
paMchakAlaikamanasAM tvameva gatiravyayaH	||32||
svamahimni sthitaM devaM niraniShTaM niraMjanam |
aprameyamajaM viShNuM sharaNaM tvAM gato.asmyaham	||33||
vAgatItaM paraM shAMtaM kaMjanAbhaM sureshvaram |
turIyAdyatiraktaM tvAM kaustubhodbhAsivakShasam	||34||
vishvarUpaM vishAlAkShaM kadA drakShyAmi chakShuShA |
mokShaM sAlokyasArUpyaM prArthaye na kadAchana	||35||
ichChAmyahaM mahAbhAga kAruNyaM tava suvrata |
sakalAvaraNAtIta kiMkaro.asmi tavAnagha	||36||
punaH punaH kiMkaro.asmi tavAhaM puruShottama |
AsanAdyanuyAgAMtamarchanaM yanmayA kRRitam	||37||
bhogahInaM kriyAhInaM maMtrahInamabhaktikam |
tatsarvaM kShamyatAM deva dInaM mAmatmasAt kuru	||38||
iti stotreNa deveshaM stutvA madhunighAtinam |
yAgAvasAnasamaye devadevasya chakriNaH |
nityaM kiMkarabhAvena svAtmAnaM vinivedayet	||39||
|| iti jitaMtestotre prathamo.adhyAyaH ||