।। అథ జితంతే స్తోత్రే ప్రథమోఽధ్యాయః ।।

బ్రహ్మోవాచ
జితం తే పుండరీకాక్ష పూర్ణషాగుణ్యవిగ్రహ ।
పరానంద పరబ్రహ్మన్ నమస్తే చతురాత్మనే ॥౧॥

నమస్తే పీతవసన నమః కటకహారిణే ।
నమో నీలాలకాబద్ధ వేణీసుందరపుంగవ ॥౨॥

స్ఫురద్వలయకేయూరనూపురాంగదభూషణైః ।
శోభనైర్భూషితాకార కల్యాణగుణరాశయే ॥౩॥

కరుణాపూర్ణహృదయ శంఖచక్రగదాధర ।
అమృతానందపూర్ణాభ్యాం లోచనాభ్యాం విలోకయ ॥౪॥

కృశం కృతఘ్నం దుష్కర్మకారిణం పాపభాజనమ్ ।
అపరాధసహస్రాణాం ఆకరం కరుణాకర ॥౫॥

కృపయా మాం కేవలయా గృహాణ మథురాధిప ।
విషయార్ణవమగ్నం మాముద్ధర్తుం త్వమిహార్హసి ॥౬॥

పితా మాతా సుహృద్బంధుర్భ్రాతా పుత్రస్త్వమేవ మే ।
విద్యా ధనం చ కామశ్చ నాన్యత్ కించిత్ త్వయా వినా ॥౭॥

యత్ర కుత్ర స్థలే వాసో యేషు కేషు భవోఽస్తు మే ।
తవ దాస్యైకభావే స్యాత్ సదా సర్వత్ర మే రతిః ॥౮॥

మనసా కర్మణా వాచా శిరసా వా కథంచన ।
త్వాం వినా నాన్యముద్దిశ్య కరిష్యే కించిదప్యహమ్ ॥౯॥

పాహి పాహి జగన్నాథ కృపయా భక్తవత్సల ।
అనాథోఽహమధన్యోఽహమకృతార్థో హ్యకించనః ॥౧౦॥

నృశంసః పాపకృత్ క్రూరో వంచకో నిష్ఠురః సదా ।
భవార్ణవే నిమగ్నం మామనన్యకరుణోదధే ॥౧౧॥

కరుణాపూర్ణదృష్టిభ్యాం దీనం మామవలోకయ ।
త్వదగ్రే పతితం త్యక్తుం తావకం నార్హసి ప్రభో ॥౧౨॥

మయా కృతాని పాపాని వివిధాని పునః పునః ।
త్వత్పాదపంకజం ప్రాప్తుం నాన్యత్ త్వత్కరుణాం వినా ॥౧౩॥

సాధనాని ప్రసిద్ధాని యాగాదీన్యబ్జలోచన ।
త్వదాజ్ఞయా ప్రవృత్తాని త్వాముద్దిశ్య కృతాని వై ॥౧౪॥

భక్త్యైకలభ్యః పురుషోత్తమో హి
జగత్ప్రసూతిస్థితినాశహేతుః ।
అకించనం నాన్యగతిం శరణ్య
గృహాణ మాం క్లేశినమంబుజాక్ష ॥

ధర్మార్థకామమోక్షేషు నేచ్ఛా మమ కదాచన ।
త్వత్పాదపంకజస్యాధో జీవితం మమ దీయతామ్ ॥౧౬॥

కామయే తావకత్వేన పరిచర్యాసు వర్తనమ్ ।
నిత్యం కింకరభావేన పరిగృహ్ణీష్వ మాం విభో ॥౧౭॥

లోకం వైకుంఠనామానం దివ్యం షాగుణ్యసంయుతమ్ ।
అవైష్ణవానామప్రాప్యం గుణత్రయవివర్జితమ్ ॥౧౮॥

నిత్యం సిద్ధైః సమాకీర్ణం త్వన్మయైః పాంచకాలికైః ।
సభాప్రాసాదసంయుక్తం వనైశ్చోపవనైః శుభైః ॥౧౯॥

వాపీకూపతటాకైశ్చ వృక్షషండైశ్చ మండితమ్ ।
అప్రాకృతం సురైర్వంద్యమయుతాకసమప్రభమ్ ॥౨౦॥

ప్రకృష్టసత్త్వరాశిం త్వాం కదా ద్రక్ష్యామి చక్షుషా ।
క్రీడంతం రమయా సార్ధం లీలాభూమిషు కేశవమ్ ॥౨౧॥

మేఘశ్యామం విశాలాక్షం కదా ద్రక్ష్యామి చక్షుషా ।
ఉన్నసం చారుదశనం బింబోష్ఠం శోభనాననమ్ ॥౨౨॥

విశాలవక్షసం శ్రీశం కంబుగ్రీవం జగద్గురుమ్ ।
ఆజానుబాహుపరిఘమున్నతాంసం మధుద్విషమ్ ॥౨౩॥

తనూదరం నిమ్ననాభిమాపీనజఘనం హరిమ్ ।
కరభోరుం శ్రియఃకాంతం కదా ద్రక్ష్యామి చక్షుషా ॥౨౪॥

శంఖచక్రగదాపద్మైరంకితం పాదపంకజమ్ ।
శరచ్చంద్రశతాక్రాంతనఖరాజివిరాజితమ్ ॥౨౫॥

సురాసురైర్వంద్యమానమృషిభిర్వందితం సదా ।
మూర్ధానం మామకం దేవ తావకం మండయిష్యతి ॥౨౬॥

కదా గంభీరయా వాచా శ్రియా యుక్తో జగత్పతిః ।
చామరవ్యగ్రహస్తం మామేవం కుర్వితి వక్ష్యతి ॥౨౭॥

కదాఽహం రాజరాజేన గణనాథేన చోదితః ।
చరేయం భగవత్పాదపరిచర్యాసు వర్తనమ్ ॥౨౮॥

శాంతాయ సువిశుద్ధాయ తేజసే పరమాత్మనే ।
నమః సర్వగుణాతీతషాగుణ్యాయాదివేధసే ॥౨౯॥

సత్యజ్ఞానానంతగుణబ్రహ్మణే చతురాత్మనే ।
నమో భగవతే తుభ్యం వాసుదేవామితద్యుతే ॥౩౦॥

చతుఃపంచనవవ్యూహదశద్వాదశమూర్తయే ।
నమోఽనంతాయ విశ్వాయ విశ్వాతీతాయ చక్రిణే ॥౩౧॥

నమస్తే పంచకాలజ్ఞ పంచకాలపరాయణ ।
పంచకాలైకమనసాం త్వమేవ గతిరవ్యయః ॥౩౨॥

స్వమహిమ్ని స్థితం దేవం నిరనిష్టం నిరంజనమ్ ।
అప్రమేయమజం విష్ణుం శరణం త్వాం గతోఽస్మ్యహమ్ ॥౩౩॥

వాగతీతం పరం శాంతం కంజనాభం సురేశ్వరమ్ ।
తురీయాద్యతిరక్తం త్వాం కౌస్తుభోద్భాసివక్షసమ్ ॥౩౪॥

విశ్వరూపం విశాలాక్షం కదా ద్రక్ష్యామి చక్షుషా ।
మోక్షం సాలోక్యసారూప్యం ప్రార్థయే న కదాచన ॥౩౫॥

ఇచ్ఛామ్యహం మహాభాగ కారుణ్యం తవ సువ్రత ।
సకలావరణాతీత కింకరోఽస్మి తవానఘ ॥౩౬॥

పునః పునః కింకరోఽస్మి తవాహం పురుషోత్తమ ।
ఆసనాద్యనుయాగాంతమర్చనం యన్మయా కృతమ్ ॥౩౭॥

భోగహీనం క్రియాహీనం మంత్రహీనమభక్తికమ్ ।
తత్సర్వం క్షమ్యతాం దేవ దీనం మామత్మసాత్ కురు ॥౩౮॥

ఇతి స్తోత్రేణ దేవేశం స్తుత్వా మధునిఘాతినమ్ ।
యాగావసానసమయే దేవదేవస్య చక్రిణః ।
నిత్యం కింకరభావేన స్వాత్మానం వినివేదయేత్ ॥౩౯॥

॥ ఇతి జితంతేస్తోత్రే ప్రథమోఽధ్యాయః ॥