శ్రీజయతీర్థస్తుతి:
॥ అథ శ్రీజయతీర్థస్తుతి: ॥
ధాటీ శ్రీజయతీర్థవర్యవచసాం చేటీభవత్స్వర్ధునీ- 
పాటీరానిలపుల్లమల్లిసుమనోవాటీలసద్వాసనా ।
పేటీ యుక్తిమణిశ్రియాం సుమతిభి: కోటీరకై: శ్లాఘితా 
సా టీకా నిచయాత్మికా మమ చిరాదాటీకతాం మానసే ॥౧॥
టీకాకృజ్జయవర్య సంసది భవత్యేకాంతతో రాజతి
ప్రాకామ్యం దధతే పలాయనవిధౌ స్తోకాన్యశంకాద్విష: ।
లోకాంధీకరణక్షమస్య తమస: సా కాలసీమా యదా
పాకారాతిదిశి ప్రరోహతి న చేద్రాకానిశాకాముక: ॥౨॥
ఛాయాసంశ్రయణేన యచ్చరణయోరాయామిసాంసారికా- 
పాయానల్పతమాతపవ్యతికరవ్యాయామవిక్షోభితా: ।
ఆయాంతి ప్రకటాం ముదం బుధజనా హేయాని ధిక్కృత్య న:
పాయాచ్ఛ్రీజయరాట్ దృశా సరసనిర్మాయానుకంపార్ద్రయా ॥౩॥
శ్రీవాయ్వంశసువంశమౌక్తికమణే: సేవావినమ్రక్షమా- 
దేవాజ్ఞానతమోవిమోచనకలాజైవాతృకశ్రీనిధే: ।
శైవాద్వైతమతాటవీకవలనాదావాగ్నిలీలాజుష: 
కో వాదీ పురతో జయీశ్వర భవేత్ తే వాదికోలాహలే ॥౪॥
నీహారచ్ఛవిబింబనిర్గతకరవ్యూహాప్లుతేందూపలా- 
నాహార్యశ్రుతనూతనామృతపరీవాహాలివాణీముచ: ।
ఊహాగోచరగర్వపండితపయోవాహానిలశ్రీజుషో 
మాహాత్మ్యం జయతీర్థవర్య భవతో వ్యాహారమత్యేతి న: ॥౫॥
వందారుక్షితిపాలమౌలివిలసన్మందారపుష్పావలీ- 
మందాన్యప్రసరన్మరందకణికావృందార్ద్రపాదాంబుజ: ।
కుందాభామలకీర్తిరార్తజనతావృందారకానోకహ:
స్వం దాసం జయతీర్థరాట్ స్వకరుణాసంధానితం మాం క్రియాత్ ॥౬॥
శ్రీదారాంఘ్రినత: ప్రతీపసుమనోవాదాహవాటోపని- 
ర్భేదాతంద్రమతి: సమస్తవిబుధామోదావలీదాయక: ।
గోదావర్యుదయత్తరంగనికరహ్రీదాయిగంభీరగీ: 
పాదాబ్జప్రణతే జయీ కలయతు స్వే దాసవర్గేఽపి మామ్ ॥౭॥
విద్యావారిజషండచండకిరణో విద్యామదక్షోదయత్ 
వాద్యాలీకదలీభిదామరకరీహృద్యాత్మకీర్తిక్రమ: ।
పద్యా బోధతతేర్వినమ్రసురరాడుద్యానభూమీరుహో 
దద్యాచ్ఛ్రీజయతీర్థరాట్ ధియముతావద్యాని భిద్యాన్మమ ॥౮॥
ఆభాసత్వమియాయ తార్కికమతం ప్రాభాకరప్రక్రియా
శోభాం నైవ బభార దూరనిహితా వైభాషికాద్యుక్తయ: ।
హ్రీభారేణ నతాశ్చ సంకరముఖా: క్షోభాకరో భాస్కర:
శ్రీభాష్యం జయయోగిని ప్రవదతి స్వాభావికోద్యన్మతౌ ॥౯॥
బంధాన: సరసార్థశబ్దవిలసద్బంధాకరాణాం గిరాం 
ఇంధానోఽర్కవిభాపరీభవఝరీసంధాయినా తేజసా ।
రుంధానో యశసా దిశ: కవిశిర:సంధార్యమాణేన మే
సంధానం స జయీ ప్రసిద్ధహరిసంబంధాగమస్య క్రియాత్ ॥౧౦॥
సంఖ్యావద్గణగీయమానచరిత: సాంఖ్యాక్షపాదాదిని:- 
సంఖ్యాఽసత్సమయిప్రభేదపటిమాప్రఖ్యాతవిఖ్యాతిగ: ।
ముఖ్యావాసగృహం క్షమాదమదయాముఖ్యామలశ్రీధురాం 
వ్యాఖ్యానే కలయేద్రతిం జయవరాభిఖ్యాధరో మద్గురు: ॥౧౧॥
ఆసీనో మరుదంశదాససుమనోనాసీరదేశే క్షణాత్ 
దాసీభూతవిపక్షవాదివిసర: శాసీ సమస్తైనసామ్ ।
వాసీ హృత్సు సతాం కలానివహవిన్యాసీ మమానారతం
శ్రీసీతారమణార్చక: స జయరాడాసీదతాం మానసే ॥౧౨॥
పక్షీశాసనపాదపూజనరత: కక్షీకృతోద్యద్దయో 
లక్ష్యీకృత్య సభాతలే రటదసత్పక్షీశ్వరానక్షిపత్ ।
అక్షీణప్రతిభాభరో విధిసరోజాక్షీవిహారాకరో 
లక్ష్మీం న: కలయేజ్జయీ సుచిరమధ్యక్షీకృతక్షోభణామ్ ॥౧౩॥
యేనాఽగాహి సమస్తశాస్త్రపృతనారత్నాకరో లీలయా
యేనాఽఖండి కువాదిసర్వసుభటస్తోమో వచ:సాయకై: ।
యేనాఽస్థాపి చ మధ్వశాస్త్రవిజయస్తంభో ధరామండలే
తం సేవే జయతీర్థవీరమనిశం మధ్వాఖ్యరాజాదృతమ్ ॥౧౪॥
యదీయవాక్తరంగాణాం విప్లుషో విదుషాం గిర: ।
జయతి శ్రీధరావాసో జయతీర్థసుధాకర: ॥౧౫॥
సత్యప్రియయతిప్రోక్తం శ్రీజయార్యస్తవం శుభమ్ ।
పఠన్ సభాసు విజయీ లోకేషూత్తమతాం వ్రజేత్ ॥౧౬॥
॥ ఇతి శ్రీసత్యప్రియతీర్థవిరచితా శ్రీజయతీర్థస్తుతి: ॥