શ્રીજયતીર્થસ્તુતિ:
॥ અથ શ્રીજયતીર્થસ્તુતિ: ॥
ધાટી શ્રીજયતીર્થવર્યવચસાં ચેટીભવત્સ્વર્ધુની- 
પાટીરાનિલપુલ્લમલ્લિસુમનોવાટીલસદ્વાસના ।
પેટી યુક્તિમણિશ્રિયાં સુમતિભિ: કોટીરકૈ: શ્લાઘિતા 
સા ટીકા નિચયાત્મિકા મમ ચિરાદાટીકતાં માનસે ॥૧॥
ટીકાકૃજ્જયવર્ય સંસદિ ભવત્યેકાંતતો રાજતિ
પ્રાકામ્યં દધતે પલાયનવિધૌ સ્તોકાન્યશંકાદ્વિષ: ।
લોકાંધીકરણક્ષમસ્ય તમસ: સા કાલસીમા યદા
પાકારાતિદિશિ પ્રરોહતિ ન ચેદ્રાકાનિશાકામુક: ॥૨॥
છાયાસંશ્રયણેન યચ્ચરણયોરાયામિસાંસારિકા- 
પાયાનલ્પતમાતપવ્યતિકરવ્યાયામવિક્ષોભિતા: ।
આયાંતિ પ્રકટાં મુદં બુધજના હેયાનિ ધિક્કૃત્ય ન:
પાયાચ્છ્રીજયરાટ્ દૃશા સરસનિર્માયાનુકંપાર્દ્રયા ॥૩॥
શ્રીવાય્વંશસુવંશમૌક્તિકમણે: સેવાવિનમ્રક્ષમા- 
દેવાજ્ઞાનતમોવિમોચનકલાજૈવાતૃકશ્રીનિધે: ।
શૈવાદ્વૈતમતાટવીકવલનાદાવાગ્નિલીલાજુષ: 
કો વાદી પુરતો જયીશ્વર ભવેત્ તે વાદિકોલાહલે ॥૪॥
નીહારચ્છવિબિંબનિર્ગતકરવ્યૂહાપ્લુતેંદૂપલા- 
નાહાર્યશ્રુતનૂતનામૃતપરીવાહાલિવાણીમુચ: ।
ઊહાગોચરગર્વપંડિતપયોવાહાનિલશ્રીજુષો 
માહાત્મ્યં જયતીર્થવર્ય ભવતો વ્યાહારમત્યેતિ ન: ॥૫॥
વંદારુક્ષિતિપાલમૌલિવિલસન્મંદારપુષ્પાવલી- 
મંદાન્યપ્રસરન્મરંદકણિકાવૃંદાર્દ્રપાદાંબુજ: ।
કુંદાભામલકીર્તિરાર્તજનતાવૃંદારકાનોકહ:
સ્વં દાસં જયતીર્થરાટ્ સ્વકરુણાસંધાનિતં માં ક્રિયાત્ ॥૬॥
શ્રીદારાંઘ્રિનત: પ્રતીપસુમનોવાદાહવાટોપનિ- 
ર્ભેદાતંદ્રમતિ: સમસ્તવિબુધામોદાવલીદાયક: ।
ગોદાવર્યુદયત્તરંગનિકરહ્રીદાયિગંભીરગી: 
પાદાબ્જપ્રણતે જયી કલયતુ સ્વે દાસવર્ગેઽપિ મામ્ ॥૭॥
વિદ્યાવારિજષંડચંડકિરણો વિદ્યામદક્ષોદયત્ 
વાદ્યાલીકદલીભિદામરકરીહૃદ્યાત્મકીર્તિક્રમ: ।
પદ્યા બોધતતેર્વિનમ્રસુરરાડુદ્યાનભૂમીરુહો 
દદ્યાચ્છ્રીજયતીર્થરાટ્ ધિયમુતાવદ્યાનિ ભિદ્યાન્મમ ॥૮॥
આભાસત્વમિયાય તાર્કિકમતં પ્રાભાકરપ્રક્રિયા
શોભાં નૈવ બભાર દૂરનિહિતા વૈભાષિકાદ્યુક્તય: ।
હ્રીભારેણ નતાશ્ચ સંકરમુખા: ક્ષોભાકરો ભાસ્કર:
શ્રીભાષ્યં જયયોગિનિ પ્રવદતિ સ્વાભાવિકોદ્યન્મતૌ ॥૯॥
બંધાન: સરસાર્થશબ્દવિલસદ્બંધાકરાણાં ગિરાં 
ઇંધાનોઽર્કવિભાપરીભવઝરીસંધાયિના તેજસા ।
રુંધાનો યશસા દિશ: કવિશિર:સંધાર્યમાણેન મે
સંધાનં સ જયી પ્રસિદ્ધહરિસંબંધાગમસ્ય ક્રિયાત્ ॥૧૦॥
સંખ્યાવદ્ગણગીયમાનચરિત: સાંખ્યાક્ષપાદાદિનિ:- 
સંખ્યાઽસત્સમયિપ્રભેદપટિમાપ્રખ્યાતવિખ્યાતિગ: ।
મુખ્યાવાસગૃહં ક્ષમાદમદયામુખ્યામલશ્રીધુરાં 
વ્યાખ્યાને કલયેદ્રતિં જયવરાભિખ્યાધરો મદ્ગુરુ: ॥૧૧॥
આસીનો મરુદંશદાસસુમનોનાસીરદેશે ક્ષણાત્ 
દાસીભૂતવિપક્ષવાદિવિસર: શાસી સમસ્તૈનસામ્ ।
વાસી હૃત્સુ સતાં કલાનિવહવિન્યાસી મમાનારતં
શ્રીસીતારમણાર્ચક: સ જયરાડાસીદતાં માનસે ॥૧૨॥
પક્ષીશાસનપાદપૂજનરત: કક્ષીકૃતોદ્યદ્દયો 
લક્ષ્યીકૃત્ય સભાતલે રટદસત્પક્ષીશ્વરાનક્ષિપત્ ।
અક્ષીણપ્રતિભાભરો વિધિસરોજાક્ષીવિહારાકરો 
લક્ષ્મીં ન: કલયેજ્જયી સુચિરમધ્યક્ષીકૃતક્ષોભણામ્ ॥૧૩॥
યેનાઽગાહિ સમસ્તશાસ્ત્રપૃતનારત્નાકરો લીલયા
યેનાઽખંડિ કુવાદિસર્વસુભટસ્તોમો વચ:સાયકૈ: ।
યેનાઽસ્થાપિ ચ મધ્વશાસ્ત્રવિજયસ્તંભો ધરામંડલે
તં સેવે જયતીર્થવીરમનિશં મધ્વાખ્યરાજાદૃતમ્ ॥૧૪॥
યદીયવાક્તરંગાણાં વિપ્લુષો વિદુષાં ગિર: ।
જયતિ શ્રીધરાવાસો જયતીર્થસુધાકર: ॥૧૫॥
સત્યપ્રિયયતિપ્રોક્તં શ્રીજયાર્યસ્તવં શુભમ્ ।
પઠન્ સભાસુ વિજયી લોકેષૂત્તમતાં વ્રજેત્ ॥૧૬॥
॥ ઇતિ શ્રીસત્યપ્રિયતીર્થવિરચિતા શ્રીજયતીર્થસ્તુતિ: ॥