shrIjayatIrthastuti:
|| atha shrIjayatIrthastuti: ||
dhATI shrIjayatIrthavaryavachasAM cheTIbhavatsvardhunI- 
pATIrAnilapullamallisumanovATIlasadvAsanA |
peTI yuktimaNishriyAM sumatibhi: koTIrakai: shlAghitA 
sA TIkA nichayAtmikA mama chirAdATIkatAM mAnase ||1||
TIkAkRRijjayavarya saMsadi bhavatyekAMtato rAjati
prAkAmyaM dadhate palAyanavidhau stokAnyashaMkAdviSha: |
lokAMdhIkaraNakShamasya tamasa: sA kAlasImA yadA
pAkArAtidishi prarohati na chedrAkAnishAkAmuka: ||2||
ChAyAsaMshrayaNena yachcharaNayorAyAmisAMsArikA- 
pAyAnalpatamAtapavyatikaravyAyAmavikShobhitA: |
AyAMti prakaTAM mudaM budhajanA heyAni dhikkRRitya na:
pAyAchChrIjayarAT dRRishA sarasanirmAyAnukaMpArdrayA ||3||
shrIvAyvaMshasuvaMshamauktikamaNe: sevAvinamrakShamA- 
devAj~nAnatamovimochanakalAjaivAtRRikashrInidhe: |
shaivAdvaitamatATavIkavalanAdAvAgnilIlAjuSha: 
ko vAdI purato jayIshvara bhavet te vAdikolAhale ||4||
nIhArachChavibiMbanirgatakaravyUhApluteMdUpalA- 
nAhAryashrutanUtanAmRRitaparIvAhAlivANImucha: |
UhAgocharagarvapaMDitapayovAhAnilashrIjuSho 
mAhAtmyaM jayatIrthavarya bhavato vyAhAramatyeti na: ||5||
vaMdArukShitipAlamaulivilasanmaMdArapuShpAvalI- 
maMdAnyaprasaranmaraMdakaNikAvRRiMdArdrapAdAMbuja: |
kuMdAbhAmalakIrtirArtajanatAvRRiMdArakAnokaha:
svaM dAsaM jayatIrtharAT svakaruNAsaMdhAnitaM mAM kriyAt ||6||
shrIdArAMghrinata: pratIpasumanovAdAhavATopani- 
rbhedAtaMdramati: samastavibudhAmodAvalIdAyaka: |
godAvaryudayattaraMganikarahrIdAyigaMbhIragI: 
pAdAbjapraNate jayI kalayatu sve dAsavarge.api mAm ||7||
vidyAvArijaShaMDachaMDakiraNo vidyAmadakShodayat 
vAdyAlIkadalIbhidAmarakarIhRRidyAtmakIrtikrama: |
padyA bodhatatervinamrasurarADudyAnabhUmIruho 
dadyAchChrIjayatIrtharAT dhiyamutAvadyAni bhidyAnmama ||8||
AbhAsatvamiyAya tArkikamataM prAbhAkaraprakriyA
shobhAM naiva babhAra dUranihitA vaibhAShikAdyuktaya: |
hrIbhAreNa natAshcha saMkaramukhA: kShobhAkaro bhAskara:
shrIbhAShyaM jayayogini pravadati svAbhAvikodyanmatau ||9||
baMdhAna: sarasArthashabdavilasadbaMdhAkarANAM girAM 
iMdhAno.arkavibhAparIbhavajharIsaMdhAyinA tejasA |
ruMdhAno yashasA disha: kavishira:saMdhAryamANena me
saMdhAnaM sa jayI prasiddhaharisaMbaMdhAgamasya kriyAt ||10||
saMkhyAvadgaNagIyamAnacharita: sAMkhyAkShapAdAdini:- 
saMkhyA.asatsamayiprabhedapaTimAprakhyAtavikhyAtiga: |
mukhyAvAsagRRihaM kShamAdamadayAmukhyAmalashrIdhurAM 
vyAkhyAne kalayedratiM jayavarAbhikhyAdharo madguru: ||11||
AsIno marudaMshadAsasumanonAsIradeshe kShaNAt 
dAsIbhUtavipakShavAdivisara: shAsI samastainasAm |
vAsI hRRitsu satAM kalAnivahavinyAsI mamAnArataM
shrIsItAramaNArchaka: sa jayarADAsIdatAM mAnase ||12||
pakShIshAsanapAdapUjanarata: kakShIkRRitodyaddayo 
lakShyIkRRitya sabhAtale raTadasatpakShIshvarAnakShipat |
akShINapratibhAbharo vidhisarojAkShIvihArAkaro 
lakShmIM na: kalayejjayI suchiramadhyakShIkRRitakShobhaNAm ||13||
yenA.agAhi samastashAstrapRRitanAratnAkaro lIlayA
yenA.akhaMDi kuvAdisarvasubhaTastomo vacha:sAyakai: |
yenA.asthApi cha madhvashAstravijayastaMbho dharAmaMDale
taM seve jayatIrthavIramanishaM madhvAkhyarAjAdRRitam ||14||
yadIyavAktaraMgANAM vipluSho viduShAM gira: |
jayati shrIdharAvAso jayatIrthasudhAkara: ||15||
satyapriyayatiproktaM shrIjayAryastavaM shubham |
paThan sabhAsu vijayI lokeShUttamatAM vrajet ||16||
|| iti shrIsatyapriyatIrthavirachitA shrIjayatIrthastuti: ||