ಹಿತೋಪದೇಶಃ
ಅಥ ಹಿತೋಪದೇಶಃ
ಸ್ಮರ ಕೃಷ್ಣಂ ಭಜ ಹರಿಂ ನಮ ವಿಷ್ಣುಂ ಶ್ರಯಾಚ್ಯುತಮ್ |
ತ್ಯಜ ಕಾಮಂ ಜಹಿ ಕ್ರೋಧಂ ಜಹಿ ಮೋಹಂ ಭವಾಲಯಮ್ ||1||
ಶ್ರುಣು ಶೌರಿಕಥಾಃ ಪುಣ್ಯಾಃ ಪಶ್ಯ ಶ್ರೀಪತಿವಿಗ್ರಹಮ್ |
ಜಿಘ್ರ ಶ್ರೀಪಾದತುಲಸಿಃ ಸ್ಪೃಶ ವೈಕುಂಠವಲ್ಲಭಮ್ ||2||
ಭುಂಕ್ಷ್ವ ಕೇಶವನೈವೇದ್ಯಂ ತಿಷ್ಠ ಮಾಧವಮಂದಿರೇ |
ಜಪ ನಾರಾಯಣಮನುಂ ಪಠ ತನ್ನಾಮಮಂಗಲಮ್ ||3||
ಪಾಹಿ ಪ್ರಪನ್ನಜನತಾಂ ಬ್ರೂಹಿ ತಥ್ಯಂ ಹಿತಂ ನೃಣಾಮ್ |
ದೇಹಿ ಕಾಂಕ್ಷಿತಮರ್ಥಿಭ್ಯೋ ಯಾಹಿ ಸಜ್ಜನಸಂಗತಿಮ್ ||4||
ಕುರು ಭೂತದಯಾಂ ನಿತ್ಯಂ ಚರ ಧರ್ಮಮಹರ್ನಿಶಮ್ |
ಜಾನೀಹಿ ನಿತ್ಯಮಾತ್ಮಾನಮವೇಹ್ಯನ್ಯದ್ಧಿ  ನಶ್ವರಮ್ ||5||
ಪಂಚಶ್ಲೋಕಮಿಮಾಂ ಶಶ್ವತ್ ಪಠ ಧಾರಯ ಚಿಂತಯ |
ಏತಾವಾನ್ಸರ್ವವೇದಾರ್ಥಃ ಸಮಾಸೇನ ನಿರೂಪಿತಃ |6||
ನಾಸ್ತಿ ನಾರಾಯಣ ಸಮಂ ನ ಭೂತಂ ನ ಭವಿಷ್ಯತಿ |
ಏತೇನ ಸತ್ಯವಾಕ್ಯೇನ ಸರ್ವಾರ್ಥಾನ್ಸಾಧಯಾಮ್ಯಹಮ್ ||7||
ಅಕ್ಷೋಭ್ಯತೀರ್ಥಮುನಿನಾ ನಿಜಶಿಷ್ಯಹಿತೈಷಿಣಾ |
ವೇದಸಾರಮಿದಂ ಪ್ರೋಕ್ತಂ ಪ್ರೀತ್ಯೈಮಾಧವಮಧ್ವಯೋಃ ||8||
|| ಇತಿ ಅಕ್ಷೋಭ್ಯತೀರ್ಥ ವಿರಚಿತಃ ಹಿತೋಪದೇಶಃ ||