|| atha hayagrIvasaMpadAstotram ||

hayagrIva hayagrIva hayagrIveti vAdinam |
naraM muMchaMti pApAni daridramiva yoShitaH ||1||

hayagrIva hayagrIva hayagrIveti yo vadet |
tasya niHsarate vANI jahnukanyApravAhavat ||2||

hayagrIva hayagrIva hayagrIveti yo dhvaniH |
vishobhate cha vaikuMThakavATodghATanadhvaniH ||3||

shlokatrayamidaM puNyaM hayagrIvapadAMkitam |
vAdirAjayatiproktaM paThatAM saMpadAM padam ||4||

|| iti vAdirAjatIrthavirachitaM hayagrIvasaMpadAstotram ||