हरिभक्ताष्टकम् 
अथ हरिभक्ताष्टकम् 
श्रीमध्वशुद्धराद्धांतभूमयो धृतनेमयः | 
महांतो हरिसंतोषकराः क्लेशहरा मम || १|| 
रूक्षाघक्षालने दक्षा मोक्षदाधोक्षजेक्षणाः | 
रक्ष्येलक्ष्याविपक्षाक्षहर्यक्षाः परपक्षकाः || २|| 
सुदयानिधयो मोक्षावधयो विजिताधयः | 
हरिसन्निधयो ज्ञानेषुधयोंऽबुधयो गुणैः || ३|| 
प्रभंजनाप्तचित्पुंजाक्ष्यंजना जनरंजनाः | 
निरंजनाः कंजनाभव्यंजना भवभंजनाः || ४|| 
नृत्यंतः स्वांतवृत्यंतः संतो हंतोज्छिता हरिम् | 
भजंतोऽन्यत्त्यजंतस्ते यतयो गतयो मम || ५|| 
सदा शास्त्र विचारस्थान्  सदाऽशास्त्रजये पटून् | 
सदा शास्त्र विचारस्थान् सदा शास्त्रपयोऽत्स्यतः || ६|| 
अलं पटादिविषयैरित्यलंपटमानसान् | 
अनलंकुर्वतः स्वांगमनलं कुर्वतो द्विषाम् || ७|| 
भ्रमतो भ्रमतो देशं नमतो नमतोदयम् | 
गुरून् विद्यागुरून् सर्वान् स्मरध्वं स्मरतो हरिम् || ८|| 
हरिभक्ताष्टकं दृष्टादृष्टसर्वेष्टपुष्टिदम् | 
यतिना वादिराजेन रचितं सर्वदा पठेत् || ८|| 
||  इति श्रीवादिराजयतिविरचितं हरिभक्ताष्टकम् ||