ಅಥ ಹರಿಭಕ್ತಾಷ್ಟಕಮ್
ಶ್ರೀಮಧ್ವಶುದ್ಧರಾದ್ಧಾಂತಭೂಮಯೋ ಧೃತನೇಮಯಃ |

ಮಹಾಂತೋ ಹರಿಸಂತೋಷಕರಾಃ ಕ್ಲೇಶಹರಾ ಮಮ ||1||

ರೂಕ್ಷಾಘಕ್ಷಾಲನೇ ದಕ್ಷಾ ಮೋಕ್ಷದಾಧೋಕ್ಷಜೇಕ್ಷಣಾಃ |

ರಕ್ಷ್ಯೇಲಕ್ಷ್ಯಾವಿಪಕ್ಷಾಕ್ಷಹರ್ಯಕ್ಷಾಃ ಪರಪಕ್ಷಕಾಃ ||2||

ಸುದಯಾನಿಧಯೋ ಮೋಕ್ಷಾವಧಯೋ ವಿಜಿತಾಧಯಃ |

ಹರಿಸನ್ನಿಧಯೋ ಜ್ಞಾನೇಷುಧಯೋಂಽಬುಧಯೋ ಗುಣೈಃ ||3||

ಪ್ರಭಂಜನಾಪ್ತಚಿತ್ಪುಂಜಾಕ್ಷ್ಯಂಜನಾ ಜನರಂಜನಾಃ |

ನಿರಂಜನಾಃ ಕಂಜನಾಭವ್ಯಂಜನಾ ಭವಭಂಜನಾಃ ||4||

ನೃತ್ಯಂತಃ ಸ್ವಾಂತವೃತ್ಯಂತಃ ಸಂತೋ ಹಂತೋಜ್ಛಿತಾ ಹರಿಮ್ |

ಭಜಂತೋಽನ್ಯತ್ತ್ಯಜಂತಸ್ತೇ ಯತಯೋ ಗತಯೋ ಮಮ ||5||

ಸದಾ ಶಾಸ್ತ್ರ ವಿಚಾರಸ್ಥಾನ್ ಸದಾಽಶಾಸ್ತ್ರಜಯೇ ಪಟೂನ್ |

ಸದಾ ಶಾಸ್ತ್ರ ವಿಚಾರಸ್ಥಾನ್ ಸದಾ ಶಾಸ್ತ್ರಪಯೋಽತ್ಸ್ಯತಃ ||6||

ಅಲಂ ಪಟಾದಿವಿಷಯೈರಿತ್ಯಲಂಪಟಮಾನಸಾನ್ |

ಅನಲಂಕುರ್ವತಃ ಸ್ವಾಂಗಮನಲಂ ಕುರ್ವತೋ ದ್ವಿಷಾಮ್ ||7||

ಭ್ರಮತೋ ಭ್ರಮತೋ ದೇಶಂ ನಮತೋ ನಮತೋದಯಮ್ |

ಗುರೂನ್ ವಿದ್ಯಾಗುರೂನ್ ಸರ್ವಾನ್ ಸ್ಮರಧ್ವಂ ಸ್ಮರತೋ ಹರಿಮ್ ||8||

ಹರಿಭಕ್ತಾಷ್ಟಕಂ ದೃಷ್ಟಾದೃಷ್ಟಸರ್ವೇಷ್ಟಪುಷ್ಟಿದಮ್ |

ಯತಿನಾ ವಾದಿರಾಜೇನ ರಚಿತಂ ಸರ್ವದಾ ಪಠೇತ್ ||8||

|| ಇತಿ ಶ್ರೀವಾದಿರಾಜಯತಿವಿರಚಿತಂ ಹರಿಭಕ್ತಾಷ್ಟಕಮ್ ||