ಗುರುಸ್ತೋತ್ರಂ
ಅಥ ಗುರುಸ್ತೋತ್ರಂ
ಸಮಾಶ್ರಯೇದ್ ಗುರುಂ ಭಕ್ತ್ಯಾ ಮಹಾವಿಶ್ವಾಸಪೂರ್ವಕಂ |
ನಿಕ್ಷಿಪೇತ್ ಸರ್ವಭಾರಾಂಶ್ಚ ಗುರೋಃ ಶ್ರೀಪಾದಪಂಕಜೇ	||1||
ಗುರುರೇವ ಪರೋ ಧರ್ಮೋ ಗುರುರೇವ ಪರಾ ಗತಿಃ
ಗುರುರೇವ ಪರೋ ಬಂಧುರ್ಗುರುರೇವ ಪರಃ ಸ್ಮೃತಃ	||2||
ಗುರುರೇವ ಮಹಾಪಾಪಂ ಕ್ಷಪಯತ್ಯಾತ್ಮಭಾವತಃ |
‘ಶ್ರೀಗುರುಭ್ಯೋ ನಮ’ ಇತಿ ಗುರುಮಂತ್ರಂ ಜಪೇತ ಯಃ	||3||
ಗುರುಭಕ್ತ್ಯಾ ವಿನಾಶಃ ಸ್ಯಾದ್ದೋಷಸ್ಯಾಪಿ ಗರೀಯಸಃ |
ಭವಿಷ್ಯತಿ ನವೇತ್ಯೇವಂ ಸಂದಿಗ್ಧೋ(ಗ್ಧೇ) ನಿರಯಂ ವ್ರಜೇತ್	||4||
ಗುರುಪಾದಾಂಬುಜಂ ಧ್ಯಾಯೇದ್ 
ಗುರೋರ್ನಾಮ ಸದಾ ಜಪೇತ್ |
ಗುರೋರ್ವಾರ್ತಾಂ ತು ಕಥಯೇದ್ 
ಗುರೋರನ್ಯಂ ನ ಭಾವಯೇತ್	||5||
ಗುರುಪಾದೌ ಚ ಶಿರಸಾ ಮನಸಾ ವಚಸಾ ತಥಾ |
ಯಃ ಸ್ಮರೇತ್ಸತತಂ ಭಕ್ತ್ಯಾ ಸಂತುಷ್ಟಸ್ತಸ್ಯ ಕೇಶವಃ	||6||
ಹರೌ ರುಷ್ಟೇ ಗುರುಸ್ತ್ರಾತಾ ಗುರೌ ರುಷ್ಟೇ ನ ಕಶ್ಚನ |
ಗುರುಪ್ರಸಾದಾತ್ ಸರ್ವೇಷ್ಟಸಿದ್ಧಿರ್ಭವತಿ ನಾನ್ಯಥಾ	||7||
ಗುರುಸಂಸ್ಮರಣಂ ಕಾರ್ಯಂ ಸರ್ವದೈವ ಮುಮುಕ್ಷುಭಿಃ |
ಉತ್ಥಾನೇ ಭೋಜನೇ ಸ್ನಾನೇ ಗ್ರಂಥಾರಂಭೇ ವಿಶೇಷತಃ	||8||
ಗುರುಪ್ರಸಾದೋ ಬಲವಾನ್ ನ ತಸ್ಮಾದ್ ಬಲವತ್ತರಂ |
ಯದ್ಗುರುಃ ಸುಪ್ರಸನ್ನಃ ಸನ್ ದದ್ಯಾತ್ ತನ್ನಾನ್ಯಥಾ ಭವೇತ್	||9||
ಶುಭಾನ್ ಧ್ಯಾಯಂತಿ ಯೇ ಕಾಮಾನ್ ಗುರುದೇವಪ್ರಸಾದಜಾನ್ |
ಇತರಾನಾತ್ಮಪಾಪೋತ್ಥಾನ್ ತೇಷಾಂ ವಿದ್ಯಾ ಫಲಿಷ್ಯತಿ	||10||
ಸ್ಮೃತ್ವಾ ಗುರುಂ ಪೂರ್ವಗುರುಮಾದಿಮೂಲಗುರೂಂಸ್ತಥಾ |
ದೇವತಾಂ ವಾಸುದೇವಂ ಚ ವಿದ್ಯಾಭ್ಯಾಸೀ ತು ಸಿದ್ಧಿಭಾಕ್	||11||
ಜ್ಞಾನಾದೃತೇ ನೈವ ಮುಕ್ತಿರ್ಜ್ಞಾನಂ ನೈವ ಗುರೋರ್ವಿನಾ |
ತಸ್ಮಾದ್ಗುರುಂ ಪ್ರಪದ್ಯೇತ ಜಿಜ್ಞಾಸುಃ ಶ್ರೇಯ ಉತ್ತಮಂ	||12||
ತತ್ರ ಭಾಗವತಾನ್ ಧರ್ಮಾನ್ ಶಿಕ್ಷೇದ್ ಗುರ್ವಾತ್ಮದೈವತಃ |
ಅಮಾಯಯಾನುವೃತ್ತ್ಯಾ ಚ ತುಷ್ಯೇದಾತ್ಮಾತ್ಮದೋ ಹರಿಃ	||13||
ಅಹೋಭಾಗ್ಯಮಹೋಭಾಗ್ಯಂ ಗುರುಪಾದಾನುವರ್ತಿನಾಂ |
ಐಹಿಕಾಮುಷ್ಮಿಕಂ ಸೌಖ್ಯಂ ವರ್ಧತೇ ತದನುಗ್ರಹಾತ್	||14||
ಅಹೋ ದೌರ್ಭಾಗ್ಯಮತುಲಂ ವಿಮುಖಾನಾಂ ಹರೌ ಗುರೌ |
ಐಹಿಕಂ ಹ್ರಸತೇ ಸೌಖ್ಯಂ ದುಃಖಂ ನಾರಕಮೇಧತೇ	||15||
ಯದ್ಯತ್ ಸತ್ಕೃತ್ಯಜಂ ಪುಣ್ಯಂ ತತ್ಸರ್ವಂ ಗುರವೇಽರ್ಪಯೇತ್ |
ತೇನ ತತ್ ಸಫಲಂ ಪ್ರೋಕ್ತಮನ್ಯಥಾ ನಿಷ್ಫಲಂ ಭವೇತ್	||16||
ಗುರುರ್ಗುರುರ್ಗುರುರಿತಿ ಜಪತೋ ನಾಸ್ತಿ ಪಾತಕಂ |
ತಸ್ಮಾದ್ ಗುರುಪ್ರಸಾದಾರ್ಥಂ ಯತೇತ ಮತಿಮಾನ್ನರಃ	||17||
ಗುರೋಃ ಸೇವಾ ಗುರೋಃ ಸ್ತೋತ್ರಂ ಶಿಷ್ಯಕೃತ್ಯಂ ಪರಂ ಸ್ಮತಂ |
ದೋಷದೃಷ್ಟಿರನರ್ಥಾಯೇತ್ಯುಮಾಮಾಹ ಸದಾಶಿವಃ	||18||
ಅಹೋಭಾಗ್ಯಮಹೋಭಾಗ್ಯಂ ಮಧ್ವಮಾರ್ಗಾನುಯಾಯಿನಾಂ |
ದೈವಂ ರಮಾಪತಿರ್ಯೇಷಾಂ ಯದ್ಗುರುರ್ಭಾರತೀಪತಿಃ	||19||
ಸರ್ವಧರ್ಮಾನ್ ಪರಿತ್ಯಜ್ಯ ಗುರುಧರ್ಮಾನ್ ಸಮಾಚರ |
ನ ಗುರೋರಧಿಕಂ ಕಿಂಚಿತ್ ಪುರುಷಾರ್ಥಚತುಷ್ಟಯೇ	||20||
ಸಾಧನಂ ವಿದ್ಯತೇ ದೇವಿ ಗುರೋರಾಜ್ಞಾಂ ನ ಲಂಘಯೇತ್ |
ದೇಹದಾತ್ಪಿತುರೇವಾಯಂ ಹ್ಯಧಿಕೋ ಜ್ಞಾನದಾನತಃ	||21||
ಪಿತಾ ಮಾತಾ ತಥಾ ಭ್ರಾತಾ ಸರ್ವೇ ಸಂಸಾರಹೇತವಃ |
ಗುರುರೇಕಃ ಸದಾ ಸೇವ್ಯಃ ಸಂಸಾರೋದ್ಧರಣಕ್ಷಮಃ	||22||
ಗುರುಭಕ್ತಃ ಸದಾ ಸೇವ್ಯೋ ಗುರುಭಕ್ತಸ್ಯ ದರ್ಶನೇ |
ಮನೋ ಮೇ ಗಾಹತೇ ದೇವಿ ಕದಾ ದ್ರಕ್ಷ್ಯೇ ಗುರುಪ್ರಿಯಂ	||23||
ಸರ್ವೇ ಧರ್ಮಾಃ ಕೃತಾಸ್ತೇನ ಸರ್ವತೀರ್ಥಾನಿ ತೇನ ಚ |
ಯಸ್ಯ ಸ್ಯಾದ್ ಗುರುವಾಕ್ಯೇಷು ಭಕ್ತಿಃ ಸರ್ವೋತ್ತಮೋತ್ತಮಾ	||24||
ಶರೀರಂ ವಸು ವಿಜ್ಞಾನಂ ವಾಸಃ ಕರ್ಮ ಗುಣಾನಸೂನ್ |
ಗುರ್ವರ್ಥಂ ಧಾರಯೇದ್ಯಸ್ತು ಸ ಶಿಷ್ಯೋ ನೇತರಃ ಸ್ಮೃತಃ	||25||
ಆಚಾರ್ಯಸ್ಯ ಪ್ರಿಯಂ ಕುರ್ಯಾದ್ ಪ್ರಾಣೈರಪಿ ಧನೈರಪಿ |
ಕರ್ಮಣಾ ಮನಸಾ ವಾಚಾ ಸ ಯಾತಿ ಪರಮಾಂ ಗತಿಂ	||26||
ನ ಸ್ನಾನಸಂಧ್ಯೇ ನ ಚ ಪಾದಸೇವನಂ
ಹರೇರ್ನ ಚಾರ್ಚಾ ವಿಧಿನಾ ಮಯಾ ಕೃತಾ |
ನಿಷ್ಕಾರಣಂ ಮೇ ಗತಮಾಯುರಲ್ಪಕಂ
ತಸ್ಮಾದ್ ಗುರೋ ಮಾಂ ಕೃಪಯಾ ಸಮುದ್ಧರ	||27||
ಕರ್ಮಣಾ ಮನಸಾ ವಾಚಾ ಯಾ ಚೇಷ್ಟಾ ಮಮ ನಿತ್ಯಶಃ |
ಕೇಶವಾರಾಧನೇ ಸಾ ಸ್ಯಾಜ್ಜನ್ಮಜನ್ಮಾಂತರೇಷ್ವಪಿ	||28||
ಮಾದೃಶೋ ನ ಪರಃ ಪಾಪೀ ತ್ವಾದೃಶೋ ನ ದಯಾಪರಃ
ಇತಿ ಮತ್ವಾ ಜಗನ್ನಾಥ ರಕ್ಷ ಮಾಂ ಶರಣಾಗತಂ 	||29||
ಕಾಯೇನ ವಾಚಾ ಮನಸೇಂದ್ರಿಯೈರ್ವಾ
ಬುದ್ಧ್ಯಾತ್ಮನಾ ವಾನುಸೃತಃ ಸ್ವಭಾವಂ |
ಕರೋತಿ ಯದ್ಯತ್ಸಕಲಂ ಪರಸ್ಮೈ
ನಾರಾಯಣಾಯೇತಿ ಸಮರ್ಪಯೇತ್ತತ್ 	||30||
|| ಇತಿ ಶ್ರೀಗುರುಸ್ತೋತ್ರಂ ||