gurustotraM
atha gurustotraM
samAshrayed guruM bhaktyA mahAvishvAsapUrvakaM |
nikShipet sarvabhArAMshcha guroH shrIpAdapaMkaje	||1||
gurureva paro dharmo gurureva parA gatiH
gurureva paro baMdhurgurureva paraH smR^itaH	||2||
gurureva mahApApaM kShapayatyAtmabhAvataH |
‘shrIgurubhyo nama’ iti gurumaMtraM japeta yaH	||3||
gurubhaktyA vinAshaH syAddoShasyApi garIyasaH |
bhaviShyati navetyevaM saMdigdho(gdhe) nirayaM vrajet	||4||
gurupAdAMbujaM dhyAyed 
gurornAma sadA japet |
gurorvArtAM tu kathayed 
guroranyaM na bhAvayet	||5||
gurupAdau cha shirasA manasA vachasA tathA |
yaH smaretsatataM bhaktyA saMtuShTastasya keshavaH	||6||
harau ruShTe gurustrAtA gurau ruShTe na kashchana |
guruprasAdAt sarveShTasiddhirbhavati nAnyathA	||7||
gurusaMsmaraNaM kAryaM sarvadaiva mumukShubhiH |
utthAne bhojane snAne graMthAraMbhe visheShataH	||8||
guruprasAdo balavAn na tasmAd balavattaraM |
yadguruH suprasannaH san dadyAt tannAnyathA bhavet	||9||
shubhAn dhyAyaMti ye kAmAn gurudevaprasAdajAn |
itarAnAtmapApotthAn teShAM vidyA phaliShyati	||10||
smR^itvA guruM pUrvagurumAdimUlagurUMstathA |
devatAM vAsudevaM cha vidyAbhyAsI tu siddhibhAk	||11||
j~nAnAdR^ite naiva muktirj~nAnaM naiva gurorvinA |
tasmAdguruM prapadyeta jij~nAsuH shreya uttamaM	||12||
tatra bhAgavatAn dharmAn shikShed gurvAtmadaivataH |
amAyayAnuvR^ittyA cha tuShyedAtmAtmado hariH	||13||
ahobhAgyamahobhAgyaM gurupAdAnuvartinAM |
aihikAmuShmikaM saukhyaM vardhate tadanugrahAt	||14||
aho daurbhAgyamatulaM vimukhAnAM harau gurau |
aihikaM hrasate saukhyaM duHkhaM nArakamedhate	||15||
yadyat satkR^ityajaM puNyaM tatsarvaM gurave.arpayet |
tena tat saphalaM proktamanyathA niShphalaM bhavet	||16||
gururgururgururiti japato nAsti pAtakaM |
tasmAd guruprasAdArthaM yateta matimAnnaraH	||17||
guroH sevA guroH stotraM shiShyakR^ityaM paraM smataM |
doShadR^iShTiranarthAyetyumAmAha sadAshivaH	||18||
ahobhAgyamahobhAgyaM madhvamArgAnuyAyinAM |
daivaM ramApatiryeShAM yadgururbhAratIpatiH	||19||
sarvadharmAn parityajya gurudharmAn samAchara |
na guroradhikaM kiMchit puruShArthachatuShTaye	||20||
sAdhanaM vidyate devi gurorAj~nAM na laMghayet |
dehadAtpiturevAyaM hyadhiko j~nAnadAnataH	||21||
pitA mAtA tathA bhrAtA sarve saMsArahetavaH |
gururekaH sadA sevyaH saMsAroddharaNakShamaH	||22||
gurubhaktaH sadA sevyo gurubhaktasya darshane |
mano me gAhate devi kadA drakShye gurupriyaM	||23||
sarve dharmAH kR^itAstena sarvatIrthAni tena cha |
yasya syAd guruvAkyeShu bhaktiH sarvottamottamA	||24||
sharIraM vasu vij~nAnaM vAsaH karma guNAnasUn |
gurvarthaM dhArayedyastu sa shiShyo netaraH smR^itaH	||25||
AchAryasya priyaM kuryAd prANairapi dhanairapi |
karmaNA manasA vAchA sa yAti paramAM gatiM	||26||
na snAnasaMdhye na cha pAdasevanaM
harerna chArchA vidhinA mayA kR^itA |
niShkAraNaM me gatamAyuralpakaM
tasmAd guro mAM kR^ipayA samuddhara	||27||
karmaNA manasA vAchA yA cheShTA mama nityashaH |
keshavArAdhane sA syAjjanmajanmAMtareShvapi	||28||
mAdR^isho na paraH pApI tvAdR^isho na dayAparaH
iti matvA jagannAtha rakSha mAM sharaNAgataM 	||29||
kAyena vAchA manaseMdriyairvA
buddhyAtmanA vAnusR^itaH svabhAvaM |
karoti yadyatsakalaM parasmai
nArAyaNAyeti samarpayettat 	||30||
|| iti shrIgurustotraM ||