అథ గోపీగీతమ్

గోప్య ఉచూః
జయతి తేఽధికం జన్మనా వ్రజ:
శ్రయత ఇందిరా సాధు తత్ర హి ।
దయిత దృశ్యతాం త్వాం దిదృక్షతాం
త్వయి ధృతాసవస్త్వాం విచిన్వతే ।।౧।।

వ్రజజనార్తిహన్ వీరయోషితాం
నిజజనస్మయధ్వంసనస్మిత ।
భజసఖే భవే కింకరీ: స్మ నో
జలరుహాననం చారు దర్శయన్ ।।౨।।

శరదుదాశయే సాధు జాతస-
త్సరసిజోదరశ్రీముషా దృశా ।
సురతనాథ తే శుల్కదాసికా
వరద నిఘ్నతో నేహ కిం వధ: ।।౩।।

విషజలాశయాద్ వ్యాలరాక్షసాద్
వర్షమారుతాద్వైద్యుతానలాత్ ।
వృషమయాద్భయాద్ విశ్వతోముఖాద్
వృషభ తే వయం రక్షితా ముహు: ।।౪।।

స ఖలు గోపికానందనో భవాన్
అఖిలదేహినామంతరాత్మదృక్ ।
విఖనసార్చితో విశ్వగుప్తయే
సఖ ఉదేయివాన్ సాత్వతాం కులే ।।౫।।

విరచితాభయం వృష్ణివర్య తే
శరణమీయుషాం సంసృతేర్భయాత్ ।
కరసరోరుహం కాంత కామదం
శిరసి ధేహి న: శ్రీకరగ్రహమ్ ।।౬।।

ప్రణతదేహినాం పాపకర్శనం
తృణచరానుగం శ్రీనికేతనమ్ ।
ఫణిఫణార్పితం తే పదాంబుజం
కృణు కుచేషు న: కృంధి హృచ్ఛయమ్ ।।౭।।

మధురయా గిరా వల్గువాక్యయా
బుధమనోజ్ఞయా పుష్కరేక్షణ ।
విధికరీరిమా వీర ముహ్యతీః
అధరసీధునాఽఽప్యాయయస్వ న: ।।౮।।

తవ కథామృతం తప్తజీవనం
కవిభిరీడితం కల్మషాపహమ్ ।
శ్రవణమంగలం శ్రీమదాతతం
భువి గృణంతి తే భూరిదా జనా: ।।౯।।

ప్రహసితం ప్రియ ప్రేమవీక్షణం
విహరణం చ తే ధ్యానమంగలమ్ ।
రహసి సంవిదో యా హృదిస్పృశ:
కుహక నో మన: క్షోభయంతి హి ।।౧౦।।

చలసి యద్ వ్రజాచ్చారయన్ పశూన్
నలినసుందరం నాథ తే పదమ్ ।
శిలతృణాంకురై: సీదతీతి న:
కలిలతాం మన: కాంత గచ్ఛతి ।।౧౧।।

దినపరిక్షయే నీలకుంతలైః
వనరుహాననం బిభ్రదావృతమ్ ।
వనరజస్వలం దర్శయన్ ముహు:
మనసి న: స్మరం వీర యచ్ఛసి ।।౧౨।।

ప్రణతకామదం పద్మజార్చితం
ధరణిమండనం ధ్యేయమాపది ।
చరణపంకజం శంతమం చ తే
రమణ నస్తనేష్వర్పయాధిహన్ ।।౧౩।।

సురతవర్ధనం శోకనాశనం
స్వరితవేణునా సుష్ఠు చుంబితమ్ ।
ఇతరరాగవిస్మారణం నృణాం
వితర వీర న: తేఽధరామృతమ్ ।।౧౪।।

అటతి యద్భవానహ్ని కాననం
త్రుటి యుగాయతే త్వామపశ్యతామ్ ।
కుటిలకుంతలం శ్రీముఖం చ తే
జడవదీక్షతాం పక్ష్మనుద్దృశామ్ ।।౧౫।।

పతిసుతాన్వయభ్రాతృబాంధవాన్
అతివిలంఘ్య తే హ్యచ్యుతాగతా: ।
గతివిదస్తవోద్గీతమోహితా:
కితవ యోషిత: కస్త్యజేన్నిశి ।।౧౬।।

రహసి సంవిదం హృచ్ఛయోదయం
ప్రహసితాననం ప్రేమవీక్షణమ్ ।
బృహదుర:శ్రియో వీర వీక్ష్య తే
ముహురతిస్పృహా ముహ్యతే మన: ।।౧౭।।

వ్రజవనౌకసాం వ్యక్తిరంగ తే
వృజినహంత్ర్యలం విశ్వమంగలమ్ ।
భజ మనాక్ చ నస్త్వత్స్పృహాత్మనాం
స్వజనహృద్రుజాం యన్నిషూదనమ్ ।।౧౮।।

శ్రీశుక ఉవాచ
ఇతి గోప్య: ప్రగాయంత్య: ప్రలపంత్యశ్చ చిత్రధా ।
రురుదు: సుస్వరం రాజన్ కృష్ణదర్శనలాలసా: ।।౧౯।।

తాసామావిరభూచ్ఛౌరి: స్మయమానముఖాంబుజ: ।
పీతాంబరధర: స్రగ్వీ సాక్షాన్మన్మథమన్మథ: ।।౨౦।।

।। ఇతి శ్రీమద్భాగవతే దశమస్కంధే గోపీగీతమ్ ।।