atha gopIgItam

gopya uchUH
jayati te.adhikaM janmanA vraja:
shrayata iMdirA sAdhu tatra hi |
dayita dRRishyatAM tvAM didRRikShatAM
tvayi dhRRitAsavastvAM vichinvate ||1||

vrajajanArtihan vIrayoShitAM
nijajanasmayadhvaMsanasmita |
bhajasakhe bhave kiMkarI: sma no
jalaruhAnanaM chAru darshayan ||2||

sharadudAshaye sAdhu jAtasa-
tsarasijodarashrImuShA dRRishA |
suratanAtha te shulkadAsikA
varada nighnato neha kiM vadha: ||3||

viShajalAshayAd vyAlarAkShasAd
varShamArutAdvaidyutAnalAt |
vRRiShamayAdbhayAd vishvatomukhAd
vRRiShabha te vayaM rakShitA muhu: ||4||

sa khalu gopikAnaMdano bhavAn
akhiladehinAmaMtarAtmadRRik |
vikhanasArchito vishvaguptaye
sakha udeyivAn sAtvatAM kule ||5||

virachitAbhayaM vRRiShNivarya te
sharaNamIyuShAM saMsRRiterbhayAt |
karasaroruhaM kAMta kAmadaM
shirasi dhehi na: shrIkaragraham ||6||

praNatadehinAM pApakarshanaM
tRRiNacharAnugaM shrIniketanam |
phaNiphaNArpitaM te padAMbujaM
kRRiNu kucheShu na: kRRiMdhi hRRichChayam ||7||

madhurayA girA valguvAkyayA
budhamanoj~nayA puShkarekShaNa |
vidhikarIrimA vIra muhyatIH
adharasIdhunA.a.apyAyayasva na: ||8||

tava kathAmRRitaM taptajIvanaM
kavibhirIDitaM kalmaShApaham |
shravaNamaMgalaM shrImadAtataM
bhuvi gRRiNaMti te bhUridA janA: ||9||

prahasitaM priya premavIkShaNaM
viharaNaM cha te dhyAnamaMgalam |
rahasi saMvido yA hRRidispRRisha:
kuhaka no mana: kShobhayaMti hi ||10||

chalasi yad vrajAchchArayan pashUn
nalinasuMdaraM nAtha te padam |
shilatRRiNAMkurai: sIdatIti na:
kalilatAM mana: kAMta gachChati ||11||

dinaparikShaye nIlakuMtalaiH
vanaruhAnanaM bibhradAvRRitam |
vanarajasvalaM darshayan muhu:
manasi na: smaraM vIra yachChasi ||12||

praNatakAmadaM padmajArchitaM
dharaNimaMDanaM dhyeyamApadi |
charaNapaMkajaM shaMtamaM cha te
ramaNa nastaneShvarpayAdhihan ||13||

suratavardhanaM shokanAshanaM
svaritaveNunA suShThu chuMbitam |
itararAgavismAraNaM nRRiNAM
vitara vIra na: te.adharAmRRitam ||14||

aTati yadbhavAnahni kAnanaM
truTi yugAyate tvAmapashyatAm |
kuTilakuMtalaM shrImukhaM cha te
jaDavadIkShatAM pakShmanuddRRishAm ||15||

patisutAnvayabhrAtRRibAMdhavAn
ativilaMghya te hyachyutAgatA: |
gatividastavodgItamohitA:
kitava yoShita: kastyajennishi ||16||

rahasi saMvidaM hRRichChayodayaM
prahasitAnanaM premavIkShaNam |
bRRihadura:shriyo vIra vIkShya te
muhuratispRRihA muhyate mana: ||17||

vrajavanaukasAM vyaktiraMga te
vRRijinahaMtryalaM vishvamaMgalam |
bhaja manAk cha nastvatspRRihAtmanAM
svajanahRRidrujAM yanniShUdanam ||18||

shrIshuka uvAcha
iti gopya: pragAyaMtya: pralapaMtyashcha chitradhA |
rurudu: susvaraM rAjan kRRiShNadarshanalAlasA: ||19||

tAsAmAvirabhUchChauri: smayamAnamukhAMbuja: |
pItAMbaradhara: sragvI sAkShAnmanmathamanmatha: ||20||

|| iti shrImadbhAgavate dashamaskaMdhe gopIgItam ||