|| atha gosAvitrIstotram ||

nArAyaNaM namaskRRitya devIM tribhuvaneshvarIm |
gosAvitrIM pravakShyAmi vyAsenoktAM sanAtanIm ||1||

yasya shravaNamAtreNa sarvapApaiH pramuchyate |
gavAM nishvasitaM vedAH saShaDaMgapadakramAH ||2||

shikShA vyAkaraNaM ChaMdo niruktaM jyautiShaM tathA |
etAsAmagrashRRiMgeShu iMdraviShNU svayaM sthitau ||3||

shiro brahmA guruH skaMdhe lalATe govRRiShadhvajaH |
karNayorashvinau devau chakShuShoH shashibhAskarau ||4||

daMteShu maruto devA jihvAyAM cha sarasvatI |
kaMThe cha varuNo devo hRRidaye havyavAhanaH ||5||

udare pRRithivI devI sashailavanakAnanA |
kakudi dyauH sanakShatrA pRRiShThe vaivasvato yamaH ||6||

Urvostu vasavo devA vAyurjaMghe samAshritaH |
AdityastvAshrito vAle sAdhyAH sarvAMgasaMdhiShu ||7||

apAne sarvatIrthAni gomUtre jAhnavI svayam |
dhRRitiHpuShTirmahAlakShmIrgomaye saMsthitA sadA ||8||

nAsikAyAM cha shrIdevI jyeShThA vasati mAnavI |
chatvAraH sAgarAH pUrNA gavAM hyeva payodhare ||9||

khuramadhyeShu gaMdharvAH khurAgre pannagAH shritAH |
khurANAM pashchime bhAge hyapsarANAM gaNAH smRRitAH ||10||

shroNItaTeShu pitaro romalAMgUlamAshritAH |
RRiShayo romakUpeShu charmaNyeva prajApatiH ||11||

sarvA viShNumayA gAvaH tAsAM goptA hi keshavaH |
huMkAre chaturo vedAH huMshabde cha prajApatiH ||12||

gavAM dRRiShTvA namaskRRitya kRRitvA chaiva pradakShiNam |
pradakShiNIkRRitA tena saptadvipA vasuMdharA ||13||

kAmadogdhrI svayaM kAmadogdhA sannihitA matA |
gogrAsasya visheSho.asti hastasaMpUrNamAtrataH ||14||

shatabrAhmaNabhuktena samamAhuryudhiShThira |
ya idaM paThate nityaM shRRiNuyAdvA samAhitaH ||15||

brAhmaNo labhate vidyAM kShatriyo rAjyamApnuyAt |
vaishyashcha pashumAn sa syAt shUdrashcha sukhamApnuyAt ||16||

garbhiNI janayet putraM kanyA bhartAramApnuyAt |
sAyaM prAtastu paThatAM shAMtisvastyayanaM mahat ||17||

ahorAtrakRRitaiH pApaistatkShaNAt parimuchyate |
phalaM tu gosahasrasyetyuktaM brahmaNA purA ||18||

|| iti shrImanmahAbhArate bhIShmayudhiShThirasaMvAde gosAvitrIstotram ||