|| atha dvAdashastotre aShTamo.adhyAyaH ||

vaMditAsheShavaMdhyoruvRRiMdArakaM
chaMdanAcharchitodArapInAMsakam |
iMdirAchaMchalApAMganIrAjitaM
maMdaroddhArivRRittodbujAbhoginam ||
prINayAmo vAsudevaM
devatAmaMDalAkhaMDamaMDanam ||1||

sRRiShTisaMhAralIlAvilAsAtataM
puShTaShAguNyasadvigrahollAsinam |
duShTanishsheShasaMhArakarmodyataM
hRRiShTapuShTAnushiShTaprajAsaMshrayam ||
prINayAmo vAsudevaM
devatAmaMDalAkhaMDamaMDanam ||2||

unnataprArthitAsheShasaMsAdhakaM
sannatAlaukikAnaMdadashrIpadam |
bhinnakarmAshayaprANisaMprerakaM
tanna kiM neti vidvatsu mImAMsitam||
prINayAmo vAsudevaM
devatAmaMDalAkhaMDamaMDanam ||3||

vipramukhyaiH sadA vedavAdonmukhaiH
supratApaiH kShitIsheshvaraishchArchitam|
apratarkyorusaMvidguNaM nirmalaM
saprakAshAjarAnaMdarUpaM param ||
prINayAmo vAsudevaM
devatAmaMDalAkhaMDamaMDanam ||4||

atyayo yasya kenApi na kvApi hi
pratyayo yadguNeShUttamAnAM paraH|
satyasaMkalpa eko vareNyo vashI
matyanUnaiH sadA vedavAdoditaH ||
prINayAmo vAsudevaM
devatAmaMDalAkhaMDamaMDanam ||5||

pashyatAM duHkhasaMtAnanirmUlanaM
dRRishyatAM dRRishyatAmityajeshArchitam |
nashyatAM dUragaM sarvadA.apyAtmagaM
vashyatAM svechChayA sajjaneShvAgatam ||
prINayAmo vAsudevaM
devatAmaMDalAkhaMDamaMDanam ||6||

agrajaM yaH sasarjAjamagryAkRRitiM
vigraho yasya sarve guNA eva hi |
ugra Adyo.api yasyAtmajAgryAtmajaH
sadgRRihItaH sadA yaH paraM daivatam ||
prINayAmo vAsudevaM
devatAmaMDalAkhaMDamaMDanam ||7||

achyuto yo guNairnityamevAkhilaiH
prachyuto.asheShadoShaiH sadA pUrtitaH |
uchyate sarvavedoruvAdairajaH
svarchito brahmarudreMdrapUrvaiH sadA ||
prINayAmo vAsudevaM
devatAmaMDalAkhaMDamaMDanam ||8||

dhAryate yena vishvaM sadAjAdikaM
vAryate.asheShaduHkhaM nijadhyAyinAm |
pAryate sarvamanyairna yatpAryate
kAryate chAkhilaM sarvabhUtaiH sadA ||
prINayAmo vAsudevaM
devatAmaMDalAkhaMDamaMDanam ||9||

sarvapApAni yatsaMsmRRiteH saMkShayaM
sarvadA yAMti bhaktyA vishuddhAtmanAm |
sharvagurvAdigIrvANasaMsthAnadaH
kurvate karma yatprItaye sajjanAH ||
prINayAmo vAsudevaM
devatAmaMDalAkhaMDamaMDanam ||10||

akShayaM karma yasmin pare svarpitaM
prakShayaM yAMti duHkhAni yannAmataH |
akSharo yo.ajaraH sarvadaivAmRRitaH
kukShigaM yasya vishvaM sadA.ajAdikam ||
prINayAmo vAsudevaM
devatAmaMDalAkhaMDamaMDanam ||11||

naMditIrthorusannAmino naMdinaH
saMdadhAnAH sadAnaMdadeve matim |
maMdahAsAruNApAMgadattonnatiM
naMditAsheShadevAdivRRiMdaM sadA ||
prINayAmo vAsudevaM
devatAmaMDalAkhaMDamaMDanam ||12||

|| iti dvAdashastotre aShTamo.adhyAyaH ||