द्वादशस्तोत्रम् अष्टमोऽध्यायः
॥ अथ द्वादशस्तोत्रे अष्टमोऽध्यायः ॥
वंदिताशेषवंध्योरुवृंदारकं 
चंदनाचर्चितोदारपीनांसकम् । 
इंदिराचंचलापांगनीराजितं 
मंदरोद्धारिवृत्तोद्बुजाभोगिनम् ॥ 
प्रीणयामो वासुदेवं 
देवतामंडलाखंडमंडनम् ॥१॥ 
सृष्टिसंहारलीलाविलासाततं 
पुष्टषागुण्यसद्विग्रहोल्लासिनम् । 
दुष्टनिश्शेषसंहारकर्मोद्यतं 
हृष्टपुष्टानुशिष्टप्रजासंश्रयम् ॥ 
प्रीणयामो वासुदेवं 
देवतामंडलाखंडमंडनम् ॥२॥ 
उन्नतप्रार्थिताशेषसंसाधकं 
सन्नतालौकिकानंददश्रीपदम् । 
भिन्नकर्माशयप्राणिसंप्रेरकं 
तन्न किं नेति विद्वत्सु मीमांसितम्॥ 
प्रीणयामो वासुदेवं 
देवतामंडलाखंडमंडनम् ॥३॥ 
विप्रमुख्यैः सदा वेदवादोन्मुखैः 
सुप्रतापैः क्षितीशेश्वरैश्चार्चितम्। 
अप्रतर्क्योरुसंविद्गुणं निर्मलं 
सप्रकाशाजरानंदरूपं परम् ॥ 
प्रीणयामो वासुदेवं 
देवतामंडलाखंडमंडनम् ॥४॥ 
अत्ययो यस्य केनापि न क्वापि हि 
प्रत्ययो यद्गुणेषूत्तमानां परः। 
सत्यसंकल्प एको वरेण्यो वशी 
मत्यनूनैः सदा वेदवादोदितः ॥
प्रीणयामो वासुदेवं 
देवतामंडलाखंडमंडनम् ॥५॥ 
पश्यतां दुःखसंताननिर्मूलनं 
दृश्यतां दृश्यतामित्यजेशार्चितम् । 
नश्यतां दूरगं सर्वदाऽप्यात्मगं 
वश्यतां स्वेच्छया सज्जनेष्वागतम् ॥
प्रीणयामो वासुदेवं 
देवतामंडलाखंडमंडनम् ॥६॥ 
अग्रजं यः ससर्जाजमग्र्याकृतिं 
विग्रहो यस्य सर्वे गुणा एव हि । 
उग्र आद्योऽपि यस्यात्मजाग्र्यात्मजः 
सद्गृहीतः सदा यः परं दैवतम् ॥ 
प्रीणयामो वासुदेवं 
देवतामंडलाखंडमंडनम् ॥७॥ 
अच्युतो यो गुणैर्नित्यमेवाखिलैः 
प्रच्युतोऽशेषदोषैः सदा पूर्तितः । 
उच्यते सर्ववेदोरुवादैरजः 
स्वर्चितो ब्रह्मरुद्रेंद्रपूर्वैः सदा ॥ 
प्रीणयामो वासुदेवं 
देवतामंडलाखंडमंडनम् ॥८॥ 
धार्यते येन विश्वं सदाजादिकं 
वार्यतेऽशेषदुःखं निजध्यायिनाम् । 
पार्यते सर्वमन्यैर्न यत्पार्यते 
कार्यते चाखिलं सर्वभूतैः सदा ॥ 
प्रीणयामो वासुदेवं 
देवतामंडलाखंडमंडनम् ॥९॥ 
सर्वपापानि यत्संस्मृतेः संक्षयं 
सर्वदा यांति भक्त्या विशुद्धात्मनाम् । 
शर्वगुर्वादिगीर्वाणसंस्थानदः 
कुर्वते कर्म यत्प्रीतये सज्जनाः ॥ 
प्रीणयामो वासुदेवं 
देवतामंडलाखंडमंडनम् ॥१०॥ 
अक्षयं कर्म यस्मिन् परे स्वर्पितं 
प्रक्षयं यांति दुःखानि यन्नामतः । 
अक्षरो योऽजरः सर्वदैवामृतः 
कुक्षिगं यस्य विश्वं सदाऽजादिकम् ॥
प्रीणयामो वासुदेवं 
देवतामंडलाखंडमंडनम् ॥११॥ 
नंदितीर्थोरुसन्नामिनो नंदिनः 
संदधानाः सदानंददेवे मतिम् । 
मंदहासारुणापांगदत्तोन्नतिं 
नंदिताशेषदेवादिवृंदं सदा ॥
प्रीणयामो वासुदेवं 
देवतामंडलाखंडमंडनम् ॥१२॥ 
॥ इति द्वादशस्तोत्रे अष्टमोऽध्यायः ॥