॥ అథ ద్వాదశస్తోత్రే సప్తమోఽధ్యాయః ॥

విశ్వస్థితిప్రలయసర్గమహావిభూతి
వృత్తిప్రకాశనియమావృతిబంధమోక్షాః ।
యస్యా అపాంగలవమాత్రత ఊర్జితా సా
శ్రీర్యత్కటాక్షబలవత్యజితం నమామి ॥౧॥

బ్రహ్మేశశక్రరవిధర్మశశాంకపూర్వ-
గీర్వాణసంతతిరియం యదపాంగలేశమ్ ।
ఆశ్రిత్య విశ్వవిజయం విసృజత్యచిన్త్యా
శ్రీర్యత్కటాక్షబలవత్యజితం నమామి ॥౨॥

ధర్మార్థకామసుమతిప్రచయాద్యశేష-
సన్మంగలం విదధతే యదపాంగలేశమ్ ।
ఆశ్రిత్య తత్ప్రణతసత్ప్రణతా అపీడ్యా
శ్రీర్యత్కటాక్షబలవత్యజితం నమామి ॥౩॥

షడ్వర్గనిగ్రహనిరస్తసమస్తదోషాః
ధ్యాయంతి విష్ణుమృషయో యదపాంగలేశమ్ ।
ఆశ్రిత్య యానపి సమేత్య న యాతి దుఃఖం
శ్రీర్యత్కటాక్షబలవత్యజితం నమామి ॥౪॥

శేషాహివైరిశివశక్రమనుప్రధాన-
చిత్రోరుకర్మరచనం యదపాంగలేశమ్ ।
ఆశ్రిత్య విశ్వమఖిలం విదధాతి ధాతా
శ్రీర్యత్కటాక్షబలవత్యజితం నమామి ॥౫॥

శక్రోగ్రదీధితిహిమాకరసూర్యసూను-
పూర్వం నిహత్య నిఖిలం యదపాంగలేశమ్ ।
ఆశ్రిత్య నృత్యతి శివః ప్రకటోరుశక్తిః
శ్రీర్యత్కటాక్షబలవత్యజితం నమామి ॥౬॥

తత్పాదపంకజమహాసనతామవాప
శర్వాదివంద్యచరణో యదపాంగలేశమ్ ।
ఆశ్రిత్య నాగపతిరన్యసురైర్దురాపాం
శ్రీర్యత్కటాక్షబలవత్యజితం నమామి ॥౭॥

నాగారిరుగ్రబలపౌరుష ఆప విష్ణోః-
వాహత్వముత్తమజవో యదపాంగలేశమ్ ।
ఆశ్రిత్య శక్రముఖదేవగణైరచింత్యం
శ్రీర్యత్కటాక్షబలవత్యజితం నమామి ॥౮॥

ఆనందతీర్థమునిసన్ముఖపంకజోత్థం
సాక్షాద్రమాహరిమనఃప్రియముత్తమార్థమ్ ।
భక్త్యా పఠత్యజితమాత్మని సన్నిధాయ
యః స్తోత్రమేతదభియాతి తయోరభీష్టమ్ ॥౯॥

॥ ఇతి ద్వాదశస్తోత్రే సప్తమోఽధ్యాయః॥