dvAdashastotram saptamo.adhyAyaH
|| atha dvAdashastotre saptamo.adhyAyaH ||
vishvasthitipralayasargamahAvibhUti 
vRRittiprakAshaniyamAvRRitibaMdhamokShAH | 
yasyA apAMgalavamAtrata UrjitA sA  
shrIryatkaTAkShabalavatyajitaM namAmi ||1|| 
brahmeshashakraravidharmashashAMkapUrva- 
gIrvANasaMtatiriyaM yadapAMgalesham | 
Ashritya vishvavijayaM visRRijatyachintyA  
shrIryatkaTAkShabalavatyajitaM namAmi ||2||
dharmArthakAmasumatiprachayAdyasheSha- 
sanmaMgalaM vidadhate yadapAMgalesham | 
Ashritya tatpraNatasatpraNatA apIDyA  
shrIryatkaTAkShabalavatyajitaM namAmi ||3||
ShaDvarganigrahanirastasamastadoShAH  
dhyAyaMti viShNumRRiShayo yadapAMgalesham | 
Ashritya yAnapi sametya na yAti duHkhaM  
shrIryatkaTAkShabalavatyajitaM namAmi ||4|| 
sheShAhivairishivashakramanupradhAna- 
chitrorukarmarachanaM yadapAMgalesham |  
Ashritya vishvamakhilaM vidadhAti dhAtA  
shrIryatkaTAkShabalavatyajitaM namAmi ||5|| 
shakrogradIdhitihimAkarasUryasUnu- 
pUrvaM nihatya nikhilaM yadapAMgalesham |  
Ashritya nRRityati shivaH prakaTorushaktiH  
shrIryatkaTAkShabalavatyajitaM namAmi ||6|| 
tatpAdapaMkajamahAsanatAmavApa  
sharvAdivaMdyacharaNo yadapAMgalesham |  
Ashritya nAgapatiranyasurairdurApAM  
shrIryatkaTAkShabalavatyajitaM namAmi ||7||
nAgArirugrabalapauruSha Apa viShNoH- 
vAhatvamuttamajavo yadapAMgalesham |  
Ashritya shakramukhadevagaNairachiMtyaM  
shrIryatkaTAkShabalavatyajitaM namAmi ||8|| 
AnaMdatIrthamunisanmukhapaMkajotthaM  
sAkShAdramAharimanaHpriyamuttamArtham | 
bhaktyA paThatyajitamAtmani sannidhAya  
yaH stotrametadabhiyAti tayorabhIShTam ||9|| 
|| iti dvAdashastotre saptamo.adhyAyaH||