द्वादशस्तोत्रम् षष्ठोऽध्यायः
॥ अथ द्वादशस्तोत्रे षष्ठोऽध्यायः ॥
मत्स्यकरूप लयोदविहारिन् वेदविनेत्र चतुर्मुखवंद्य । 
कूर्मस्वरूपक मंदरधारिन् लोकविधारक देववरेण्य ॥१॥ 
सूकररूपक दानवशत्रो भूमिविधारक यज्ञवरांग । 
देव नृसिंह हिरण्यकशत्रो सर्वभयांतक दैवतबंधो ॥२॥ 
वामन वामन माणववेष दैत्यवरांतक कारणरूप । 
राम भृगूद्वह सूर्जितदिप्ते क्षत्रकुलांतक शंभुवरेण्य ॥३॥ 
राघव राघव राक्षसशत्रो मारुतिवल्लभ जानकिकांत । 
देवकिनंदन सुंदररूप रुक्मिणिवल्लभ पांडवबंधो ॥४॥ 
देवकिनंदन नंदकुमार वृंद्दावनांचन गोकुलचंद्र । 
कंदफलाशन सुंदररूप नंदितगोकुलवंदितपाद ॥५॥ 
इंद्रसुतावक नंदकहस्त चंदनचर्चित सुंदरिनाथ । 
इंदीवरोदरदलनयन मंदरधारिन् गोविंद वंदे ॥६॥ 
चंद्रशतानन कुंदसुहास नंदितदैवतानंदसुपूर्ण । 
दैत्यविमोहक नित्यसुखादे देवसुबोधक बुद्धस्वरूप ॥७॥ 
दुष्टकुलांतक कल्किस्वरूप धर्मविवर्धन मूलयुगादे । 
नारायणामलकारणमूर्ते पूर्णगुणार्णव नित्यसुबोध ॥८॥ 
आनंदतीर्थमुनींद्रकृता हरिगाथा  
पापहरा शुभा नित्यसुखार्था ॥ 
॥ इति द्वादशस्तोत्रे षष्ठोऽध्यायः ॥