॥ अथ द्वादशस्तोत्रे पंचमोऽध्यायः ॥

वासुदेवापरिमेयसुधामन् शुद्धसदोदित सुंदरिकांत ।
धराधरधारणवेधुरधर्तः सौधृतिदीधितिवेधृविधातः ॥१॥

अधिकबंधं रंधय बोधाच्छिंधि पिधानं बंधुरमद्धा ।
केशव केशव शासक वंदे पाशधरार्चित शूरवरेश ॥२॥

नारायणामलकारण वंदे कारणकारण पूर्णवरेण्य ।
माधव माधव साधक वंदे बाधक बोधक शुद्धसमाधे ॥३॥

गोविंद गोविंद पुरंदर वंदे स्कंदसुनंदनवंदितपाद ।
विष्णो सृजिष्णो ग्रसिष्णो विवंदे कृष्ण सदुष्णवधिष्णो सुधृष्णो ॥४॥

मधुसूदन दानवसादन वंदे दैवतमोदित वेदितपाद ।
त्रिविक्रम निष्क्रम विक्रम वंदे सुक्रम संक्रमहुंकृतवक्त्र ॥५॥

वामन वामन भामन वंदे सामन सीमन शामन सानो ।
श्रीधर श्रीधर शंधर वंदे भूधर वार्धर कंधरधारिन् ॥६॥

हृषीकेश सुकेश परेश विवंदे शरणेश कलेश बलेश सुखेश ।
पद्मनाभ शुभोद्भव वंदे संभृतलोकभराभर भूरे
दामोदर दूरतरांतर वंदे दारितपारगपार परस्मात् ॥७॥

आनंदतीर्थमुनींद्रकृता हरिगीतिरियं परमादरतः ।
परलोकविलोकनसूर्यनिभा हरिभक्तिविवर्धनशौंडतमा ॥८॥

॥ इति द्वादशस्तोत्रे पंचमोऽध्यायः ॥