chaturthosdhyAyaH

nijapUrNasukhAmitabodhatanuH parashaktiranaMtaguNaH paramaH |
ajarAmaraNaH sakalArtiharaH kamalApatirIDyatamovatu naH ||1||

yadasuptigatospi hariH sukhavAn sukharUpiNamAhurato nigamAH |
svamatiprabhavaM jagadasya yataH parabodhatanuM cha tataH khapatim ||2||

bahuchitrajagadbahudhA karaNAt parashaktiranaMtaguNaH paramaH |
sukharUpamamuShya padaM paramaM smaratastu bhaviShyati tatsatatam ||3||

smaraNe hi pareshiturasya vibhormalinAni manAMsi kutaH karaNam |
vimalaM hi padaM paramaM svarataM taruNArkasavarNamajasya hareH ||4||

vimalaiH shrutishANanishAtatamaiH sumanosibhirAshu nihatya dRRiDham |
balinaM nijavairiNamAtmatamosbhidhamIshamanaMtamupAsva harim ||5||

sa hi vishvasRRijo vibhushaMbhupuraMdarasUryamukhAnaparAnamarAn |
sRRijatIDyatamosvati haMti nijaM padamApayati praNatAn sudhiyA ||

paramospi rameshiturasya samo na hi kashchidabhUnna bhaviShyati cha |
kvachidadyatanospi na pUrNasadAgaNiteDyaguNAnubhavaikatanoH ||7||

iti devavarasya hareH stavanaM kRRitavAn muniruttamamAdarataH |
sukhatIrthapadAbhihitaH paThatastadidaM bhavati dhruvamuchchasukham ||8||

|| iti dvAdashastotre chaturthosdhyAyaH ||