॥ అథ ద్వాదశస్తోత్రే ద్వితీయోఽధ్యాయః ॥
సుజనోదధిసంవృద్ధిపూర్ణచంద్రో గుణార్ణవః ।
అమందానందసాంద్రో నః ప్రీయతామిందిరాపతిః ॥౧॥
రమాచకోరీవిధవే దుష్టదర్పోదవహ్నయే ।
సత్పాంథజనగేహాయ నమో నారాయణాయ తే ॥౨॥
చిదచిద్భేదమఖిలం విధాయాధాయ భుంజతే ।
అవ్యాకృతగృహస్థాయ రమాప్రణయినే నమః ॥౩॥
అమందగుణసారోఽపి మందహాసేన వీక్షితః ।
నిత్యమిందిరయాఽఽనందసాంద్రో యో నౌమి తం హరిమ్ ॥౪॥
వశీ వశే న కస్యాపి యోఽజితో విజితాఖిలః ।
సర్వకర్తా న క్రియతే తం నమామి రమాపతిమ్ ॥౫॥
అగుణాయ గుణోద్రేకస్వరూపాయాదికారిణే ।
విదారితారిసంఘాయ వాసుదేవాయ తే నమః ॥౬॥
ఆదిదేవాయ దేవానాం పతయే సాదితారయే ।
అనాద్యజ్ఞానపారాయ నమో వరవరాయ తే ॥౭॥
అజాయ జనయిత్రేఽస్య విజితాఖిలదానవ ।
అజాదిపూజ్యపాదాయ నమస్తే గరుడధ్వజ ॥౮॥
ఇందిరామందసాంద్రాగ్ర్యకటాక్షప్రేక్షితాత్మనే ।
అస్మదిష్టైకకార్యాయ పూర్ణాయ హరయే నమః ॥౯॥
॥ ఇతి ద్వాదశస్తోత్రే ద్వితీయోఽధ్యాయః ॥