|| atha dvAdashastotre dvitIyoadhyAyaH ||

sujanodadhisaMvRRiddhipUrNachaMdro guNArNavaH |
amaMdAnaMdasAMdro naH prIyatAmiMdirApatiH ||1||

ramAchakorIvidhave duShTadarpodavahnaye |
satpAMthajanagehAya namo nArAyaNAya te ||2||

chidachidbhedamakhilaM vidhAyAdhAya bhuMjate |
avyAkRRitagRRihasthAya ramApraNayine namaH ||3||

amaMdaguNasAro.api maMdahAsena vIkShitaH |
nityamiMdirayA.a.anaMdasAMdro yo naumi taM harim ||4||

vashI vashe na kasyApi yo.ajito vijitAkhilaH |
sarvakartA na kriyate taM namAmi ramApatim ||5||

aguNAya guNodrekasvarUpAyAdikAriNe |
vidAritArisaMghAya vAsudevAya te namaH ||6||

AdidevAya devAnAM pataye sAditAraye |
anAdyaj~nAnapArAya namo varavarAya te ||7||

ajAya janayitre.asya vijitAkhiladAnava |
ajAdipUjyapAdAya namaste garuDadhvaja ||8||

iMdirAmaMdasAMdrAgryakaTAkShaprekShitAtmane |
asmadiShTaikakAryAya pUrNAya haraye namaH ||9||

|| iti dvAdashastotre dvitIyo.adhyAyaH ||