॥ అథ ద్వాదశస్తోత్రే దశమోఽధ్యాయః ॥

అవ నః శ్రీపతిరప్రతిరధికేశాదిభవాదే ।
కరుణాపూర్ణ వరప్రద చరితం జ్ఞాపయ మే తే ॥౧॥

సురవంద్యాధిప సద్వర భరితాశేషగుణాలమ్ ।
కరుణాపూర్ణ వరప్రద చరితం జ్ఞాపయ మే తే ॥౨॥

సకలధ్వాంతవినాశక పరమానందసుధాహో ।
కరుణాపూర్ణ వరప్రద చరితం జ్ఞాపయ మే తే ॥౩॥

త్రిజగత్పోత సదార్చితచరణాశాపతిధాతో ।
కరుణాపూర్ణ వరప్రద చరితం జ్ఞాపయ మే తే ॥౪॥

త్రిగుణాతీత విధారక పరితో దేహి సుభక్తిమ్ ।
కరుణాపూర్ణ వరప్రద చరితం జ్ఞాపయ మే తే ॥౫॥

శరణం కారణభావన భవ మే తాత సదాఽలమ్ ।
కరుణాపూర్ణ వరప్రద చరితం జ్ఞాపయ మే తే ॥౬॥

మరణప్రాణద పాలక జగదీశావ సుభక్తిమ్ ।
కరుణాపూర్ణ వరప్రద చరితం జ్ఞాపయ మే తే ॥౭॥

తరుణాదిత్యసవర్ణకచరణాబ్జామలకీర్తే ।
కరుణాపూర్ణ వరప్రద చరితం జ్ఞాపయ మే తే ॥౮॥

సలిలప్రోత్థసరాగకమణివర్ణోచ్చనఖాదే ।
కరుణాపూర్ణ వరప్రద చరితం జ్ఞాపయ మే తే ॥౯॥

ఖజతూణీనిభపావనవరజంఘామితశక్తే ।
కరుణాపూర్ణ వరప్రద చరితం జ్ఞాపయ మే తే ॥౧౦॥

ఇభహస్తప్రభశోభనపరమోరుస్థరమాలే ।
కరుణాపూర్ణ వరప్రద చరితం జ్ఞాపయ మే తే ॥౧౧॥

అసనోత్ఫుల్లసుపుష్పకసమవర్ణావరణాంతే ।
కరుణాపూర్ణ వరప్రద చరితం జ్ఞాపయ మే తే ॥౧౨॥

శతమోదోద్భవసుందరవరపద్మోత్థితనాభే ।
కరుణాపూర్ణ వరప్రద చరితం జ్ఞాపయ మే తే ॥౧౩॥

జగదాగూహకపల్లవసమకుక్షే శరణాదే ।
కరుణాపూర్ణ వరప్రద చరితం జ్ఞాపయ మే తే ॥౧౪॥

జగదంబామలసుందరగృహవక్షోవరయోగిన్ ।
కరుణాపూర్ణ వరప్రద చరితం జ్ఞాపయ మే తే ॥౧౫॥

దితిజాంతప్రద చక్రదరగదాయుగ్వరబాహో ।
కరుణాపూర్ణ వరప్రద చరితం జ్ఞాపయ మే తే ॥౧౬॥

పరమజ్ఞానమహానిధివదనశ్రీరమణేందో ।
కరుణాపూర్ణ వరప్రద చరితం జ్ఞాపయ మే తే ॥౧౭॥

నిఖిలాఘౌఘవినాశక పరసౌఖ్యప్రదదృష్టే ।
కరుణాపూర్ణ వరప్రద చరితం జ్ఞాపయ మే తే ॥౧౮॥

పరమానందసుతీర్థసుమునిరాజో హరిగాథామ్ ।
కృతవాన్నిత్యసుపూర్ణకపరమానందపదైషీ ॥౧౯॥

॥ ఇతి ద్వాదశస్తోత్రే దశమోఽధ్యాయః ॥