|| atha dvAdashastotre dashamo.adhyAyaH ||

ava naH shrIpatirapratiradhikeshAdibhavAde |
karuNApUrNa varaprada charitaM j~nApaya me te ||1||

suravaMdyAdhipa sadvara bharitAsheShaguNAlam |
karuNApUrNa varaprada charitaM j~nApaya me te ||2||

sakaladhvAMtavinAshaka paramAnaMdasudhAho |
karuNApUrNa varaprada charitaM j~nApaya me te ||3||

trijagatpota sadArchitacharaNAshApatidhAto |
karuNApUrNa varaprada charitaM j~nApaya me te ||4||

triguNAtIta vidhAraka parito dehi subhaktim |
karuNApUrNa varaprada charitaM j~nApaya me te ||5||

sharaNaM kAraNabhAvana bhava me tAta sadA.alam |
karuNApUrNa varaprada charitaM j~nApaya me te ||6||

maraNaprANada pAlaka jagadIshAva subhaktim |
karuNApUrNa varaprada charitaM j~nApaya me te ||7||

taruNAdityasavarNakacharaNAbjAmalakIrte |
karuNApUrNa varaprada charitaM j~nApaya me te ||8||

salilaprotthasarAgakamaNivarNochchanakhAde |
karuNApUrNa varaprada charitaM j~nApaya me te ||9||

khajatUNInibhapAvanavarajaMghAmitashakte |
karuNApUrNa varaprada charitaM j~nApaya me te ||10||

ibhahastaprabhashobhanaparamorustharamAle |
karuNApUrNa varaprada charitaM j~nApaya me te ||11||

asanotphullasupuShpakasamavarNAvaraNAMte |
karuNApUrNa varaprada charitaM j~nApaya me te ||12||

shatamododbhavasuMdaravarapadmotthitanAbhe |
karuNApUrNa varaprada charitaM j~nApaya me te ||13||

jagadAgUhakapallavasamakukShe sharaNAde |
karuNApUrNa varaprada charitaM j~nApaya me te ||14||

jagadaMbAmalasuMdaragRRihavakShovarayogin |
karuNApUrNa varaprada charitaM j~nApaya me te ||15||

ditijAMtaprada chakradaragadAyugvarabAho |
karuNApUrNa varaprada charitaM j~nApaya me te ||16||

paramaj~nAnamahAnidhivadanashrIramaNeMdo |
karuNApUrNa varaprada charitaM j~nApaya me te ||17||

nikhilAghaughavinAshaka parasaukhyapradadRRiShTe |
karuNApUrNa varaprada charitaM j~nApaya me te ||18||

paramAnaMdasutIrthasumunirAjo harigAthAm |
kRRitavAnnityasupUrNakaparamAnaMdapadaiShI ||19||

|| iti dvAdashastotre dashamo.adhyAyaH ||