॥ अथ द्वादशस्तोत्रे दशमोऽध्यायः ॥

अव नः श्रीपतिरप्रतिरधिकेशादिभवादे ।
करुणापूर्ण वरप्रद चरितं ज्ञापय मे ते ॥१॥

सुरवंद्याधिप सद्वर भरिताशेषगुणालम् ।
करुणापूर्ण वरप्रद चरितं ज्ञापय मे ते ॥२॥

सकलध्वांतविनाशक परमानंदसुधाहो ।
करुणापूर्ण वरप्रद चरितं ज्ञापय मे ते ॥३॥

त्रिजगत्पोत सदार्चितचरणाशापतिधातो ।
करुणापूर्ण वरप्रद चरितं ज्ञापय मे ते ॥४॥

त्रिगुणातीत विधारक परितो देहि सुभक्तिम् ।
करुणापूर्ण वरप्रद चरितं ज्ञापय मे ते ॥५॥

शरणं कारणभावन भव मे तात सदाऽलम् ।
करुणापूर्ण वरप्रद चरितं ज्ञापय मे ते ॥६॥

मरणप्राणद पालक जगदीशाव सुभक्तिम् ।
करुणापूर्ण वरप्रद चरितं ज्ञापय मे ते ॥७॥

तरुणादित्यसवर्णकचरणाब्जामलकीर्ते ।
करुणापूर्ण वरप्रद चरितं ज्ञापय मे ते ॥८॥

सलिलप्रोत्थसरागकमणिवर्णोच्चनखादे ।
करुणापूर्ण वरप्रद चरितं ज्ञापय मे ते ॥९॥

खजतूणीनिभपावनवरजंघामितशक्ते ।
करुणापूर्ण वरप्रद चरितं ज्ञापय मे ते ॥१०॥

इभहस्तप्रभशोभनपरमोरुस्थरमाले ।
करुणापूर्ण वरप्रद चरितं ज्ञापय मे ते ॥११॥

असनोत्फुल्लसुपुष्पकसमवर्णावरणांते ।
करुणापूर्ण वरप्रद चरितं ज्ञापय मे ते ॥१२॥

शतमोदोद्भवसुंदरवरपद्मोत्थितनाभे ।
करुणापूर्ण वरप्रद चरितं ज्ञापय मे ते ॥१३॥

जगदागूहकपल्लवसमकुक्षे शरणादे ।
करुणापूर्ण वरप्रद चरितं ज्ञापय मे ते ॥१४॥

जगदंबामलसुंदरगृहवक्षोवरयोगिन् ।
करुणापूर्ण वरप्रद चरितं ज्ञापय मे ते ॥१५॥

दितिजांतप्रद चक्रदरगदायुग्वरबाहो ।
करुणापूर्ण वरप्रद चरितं ज्ञापय मे ते ॥१६॥

परमज्ञानमहानिधिवदनश्रीरमणेंदो ।
करुणापूर्ण वरप्रद चरितं ज्ञापय मे ते ॥१७॥

निखिलाघौघविनाशक परसौख्यप्रददृष्टे ।
करुणापूर्ण वरप्रद चरितं ज्ञापय मे ते ॥१८॥

परमानंदसुतीर्थसुमुनिराजो हरिगाथाम् ।
कृतवान्नित्यसुपूर्णकपरमानंदपदैषी ॥१९॥

॥ इति द्वादशस्तोत्रे दशमोऽध्यायः ॥