॥ అథ ద్వాదశస్తోత్రే ప్రథమోఽధ్యాయః ॥

వందే వంద్యం సదానందం వాసుదేవం నిరంజనమ్ ।
ఇందిరాపతిమాద్యాదివరదేశవరప్రదమ్ ॥౧॥

నమామి నిఖిలాధీశకిరీటాఘృష్ఠపీఠవత్ ।
హృత్తమఃశమనేఽర్కాభం శ్రీపతేః పాదపంకజమ్ ॥౨॥

జాంబూనదాంబరాధారం నితంబం చింత్యమీశితుః ।
స్వర్ణమంజీరసంవీతమారూఢం జగదంబయా ॥౩॥

ఉదరం చింత్యమీశస్య తనుత్వేఽప్యఖిలంభరమ్ ।
వలిత్రయాంకితం నిత్యముపగూఢం శ్రియైకయా ॥౪॥

స్మరణీయమురో విష్ణోరిందిరావాసమీశితుః ।
అనంతమంతవదివ భుజయోరంతరం గతమ్ ॥౫॥

శంఖచక్రగదాపద్మధరాశ్చింత్యా హరేర్భుజాః ।
పీనవృత్తా జగద్రక్షాకేవలోద్యోగినోఽనిశమ్ ॥౬॥

సంతతం చింతయేత్ కంఠం భాస్వత్కౌస్తుభభాసకమ్ ।
వైకుంఠస్యాఖిలా వేదా ఉద్గీర్యంతేఽనిశం యతః ॥౭॥

స్మరేత యామినీనాథసహస్రామితకాంతిమత్ ।
భవతాపాపనోదీడ్యం శ్రీపతేర్ముఖపంకజమ్ ॥౮॥

పూర్ణానన్యసుఖోద్భాసి మందస్మితమధీశితుః ।
గోవిందస్య సదా చింత్యం నిత్యానందపదప్రదమ్ ॥౯॥

స్మరామి భవసంతాపహానిదామృతసాగరమ్ ।
పూర్ణానందస్య రామస్య సానురాగావలోకనమ్ ॥౧౦॥

ధ్యాయేదజస్రమీశస్య పద్మజాదిప్రతీక్షితమ్ ।
భ్రూభంగం పారమేష్ఠ్యాదిపదదాయి విముక్తిదమ్ ॥౧౧॥

సంతతం చింతయేనంతమంతకాలే విశేషతః ।
నైవోదాపుర్గృణంతోంఽతం యద్గుణానామజాదయః ॥౧౨॥

॥ ఇతి ద్వాదశస్తోత్రే ప్రథమోఽధ్యాయః ॥