து³ர்கா³ஸ்தோத்ரம்
||அத²  து³ர்கா³ஸ்தோத்ரம் ||
(மஹாபா⁴ரதே விராடபர்வணி த⁴ர்மராஜப்ரோக்தம்)
விராடநக³ரம்ʼ ரம்யம்ʼ க³ச்ச²மானோ யுதி⁴ஷ்டி²ர: | 
அஸ்துவன்மனஸா தே³வீம்ʼ து³ர்கா³ம்ʼ த்ரிபு⁴னேஶ்வரீம் ||1||
யஶோதா³க³ர்ப⁴ஸம்பூ⁴தாம்ʼ நாராயணவரப்ரியாம் | 
நந்த³கோ³பகுலே ஜாதாம்ʼ மாங்க³ல்யாம்ʼ குலவர்த⁴னீம் ||2||
கம்ʼஸவித்³ராவணகரீமஸுராணாம்ʼ க்ஷயங்கரீம் | 
ஶிலாதலே விநிக்ஷிப்தாமாகாஶம்ʼ ப்ரதிகா³மினீம் ||3||
வாஸுதே³வஸ்ய ப⁴கி³னீம்ʼ தி³வ்யமாலாவிபூ⁴ஷிதாம் | 
தி³வ்யாம்ப³ரத⁴ராம்ʼ தே³வீம்ʼ க²ட்³க³கே²டகதா⁴ரிணீம் ||4||
(பா⁴ராவதரணே புண்யே யே ஸ்மரந்தி ஸதா³ ஶிவாம் | 
தான் வை தாரயதே பாபாத் பங்கே கா³மிவ து³ர்ப³லாம் ||)
ஸ்தோதும்ʼ ப்ரசக்ரமே பூ⁴யோ விவிதை⁴: ஸ்தோத்ரஸம்ப⁴வை: | 
ஆமந்த்ர்ய த³ர்ஶனாகாங்க்ஷீ ராஜா தே³வீம்ʼ ஸஹானுஜ: ||5||
ராஜோவாச  
நமோऽஸ்து வரதே³ க்ருʼஷ்ணே குமாரி ப்³ரஹ்மசாரிணி | 
பா³லார்கஸத்³ருʼஶாகாரே பூர்ணசந்த்³ரநிபா⁴னனே ||6||
சதுர்பு⁴ஜே தனுமத்⁴யே பீனஶ்ரோணிபயோத⁴ரே | 
மயூரபிச்ச²வலயே கேயூராங்க³த³பூ⁴ஷணே ||7||
பா⁴ஸி தே³வி யதா² பத்³மா நாராயணபரிக்³ரஹா | 
ஸ்வரூபம்ʼ ப்³ரஹ்மசர்யம்ʼ ச விஶத³ம்ʼ தவ கே²சரி ||8||
க்ருʼஷ்ணச்ச²விஸமா க்ருʼஷ்ணா ஸங்கர்ஷணஸமானனா | 
பி³ப்⁴ரதீ விபுலௌ பா³ஹூ ஶக்ரத்⁴வஜஸமுச்ச்²ரயௌ ||9||
பாத்ரம்ʼ ச பங்கஜம்ʼ க⁴ண்டாம்ʼ விஶுத்³தா⁴ம்ʼ சைவ யா பு⁴வி | 
பாஶம்ʼ த⁴னுர்மஹாசக்ரம்ʼ விவிதா⁴ன்யாயுதா⁴னி ச ||10||
குண்ட³லாப்⁴யாம்ʼ ஸுபூர்ணாப்⁴யாம்ʼ கர்ணாப்⁴யாம்ʼ ச விபூ⁴ஷிதா | 
சந்த்³ரவிஸ்பர்தி⁴னா தே³வி முகே²ன த்வம்ʼ விராஜஸே ||11||
முகுடேன விசித்ரேண கேஶப³ந்தே⁴ன ஶோபி⁴னா | 
பு⁴ஜங்க³போ⁴க³வாஸேன ஶ்ரோணிஸூத்ரேண ராஜதா ||12||
விப்⁴ராஜஸே சாऽऽப³த்³தே⁴ன போ⁴கே³னேவேஹ மந்த³ர: | 
த்⁴வஜேன ஶிகி²பிச்சா²னாமுச்ச்²ரிதேன விராஜஸே ||13||
கௌமாரம்ʼ வ்ரதமாஸ்தா²ய த்ரிதி³வம்ʼ பாவிதம்ʼ த்வயா | 
தேன த்வம்ʼ ஸ்தூயஸே தே³வி த்ரித³ஶை: பூஜ்யஸேऽபி ச ||14||
த்ரைலோக்யரக்ஷணார்தா²ய மஹிஷாஸுரநாஶினி | 
ப்ரஸன்னா மே ஸுரஶ்ரேஷ்டே² த³யாம்ʼ குரு ஶிவா ப⁴வ ||15||
ஜயா த்வம்ʼ விஜயா சைவ ஸங்க்³ராமே ச ஜயப்ரதா³ | 
மமாபி விஜயம்ʼ தே³ஹி வரதா³ த்வம்ʼ ச ஸாம்ப்ரதம் ||16||
விந்த்⁴யே சைவ நக³ஶ்ரேஷ்டே² தவ ஸ்தா²னம்ʼ ச ஶாஶ்வதம் | 
காளி காளி மஹாகாளி ஸீது⁴மாம்ʼஸபஶுப்ரியே ||17||
க்ருʼதானுயாத்ரா பூ⁴தைஸ்த்வம்ʼ வரதா³ காமரூபிணி | 
பா⁴ராவதாரே ச யே த்வாம்ʼ ஸம்ʼஸ்மரிஷ்யந்தி மானவா: ||18||
ப்ரணமந்தி ச யே த்வாம்ʼ ஹி ப்ரபா⁴தே து நரா பு⁴வி | 
ந தேஷாம்ʼ து³ர்லப⁴ம்ʼ கிஞ்சித்புத்ரதோ த⁴னதோऽபி வா ||19||
து³ர்கா³த்தாரயஸே து³ர்கே³ தத்த்வம்ʼ து³ர்கா³ ஸ்ம்ருʼதா பு³தை⁴: | 
காந்தாரேஷ்வவஸன்னானாம்ʼ மக்³னானாம்ʼ ச மஹார்ணவே ||20||
த³ஸ்யுபி⁴ர்வா நிருத்³தா⁴னாம்ʼ த்வம்ʼ க³தி: பரமா ந்ருʼணாம் | 
ஜலப்ரதரணே சைவ காந்தாரேஷ்வடவீஷு ச ||21||
யே ஸ்மரந்தி மஹாதே³வீம்ʼ ந ச ஸீத³ந்தி தே நரா: | 
த்வம்ʼ கீர்தி: ஶ்ரீர்த்⁴ருʼதி: ஸித்³தி⁴ர்ஹ்ரீர்வித்³யா ஸந்ததிர்மதி: ||22||
ஸந்த்⁴யா ராத்ரி: ப்ரபா⁴ நித்³ரா ஜ்யோத்ஸ்னா காந்தி: க்ஷமா த³யா | 
ந்ருʼணாம்ʼ ச ப³ந்த⁴னம்ʼ மோஹம்ʼ புத்ரநாஶம்ʼ த⁴னக்ஷயம் ||23||
வ்யாதி⁴ம்ʼ ம்ருʼத்யுப⁴யம்ʼ சைவ பூஜிதா நாஶயிஷ்யஸி | 
ஸோऽஹம்ʼ ராஜ்யாத் பரிப்⁴ரஷ்ட: ஶரணம்ʼ த்வாம்ʼ ப்ரபன்னவான் ||24||
ப்ரணதஶ்ச ததா² மூர்த்⁴னா தவ தே³வி ஸுரேஶ்வரி | 
த்ராஹி மாம்ʼ பத்³மபத்ராக்ஷி ஸத்யா ஸத்யா ப⁴வஸ்வ ந: ||25||
ஶரணம்ʼ ப⁴வ மே து³ர்கே³ ஶரண்யே ப⁴க்தவத்ஸலே | 
ஏவம்ʼ ஸ்துதா ஹி ஸா தே³வீ த³ர்ஶயாமாஸ பாண்ட³வம் ||26||
தே³வ்யுவாச 
ஶ்ருணு ராஜன்மஹாபா³ஹோ மதீ³யம்ʼ வசனம்ʼ ப்ரபோ⁴ | 
ப⁴விஷ்யத்யசிராதே³வ ஸங்க்³ராமே விஜயஸ்தவ ||27||
மம ப்ரஸாதா³ன்–நிர்ஜித்ய ஹத்வா கௌரவவாஹினீம் | 
ராஜ்யம்ʼ நிஷ்கண்டகம்ʼ க்ருʼத்வா போ⁴க்ஷ்யஸே மேதி³னீம்ʼ புன: ||28||
ப்⁴ராத்ருʼபி⁴: ஸஹிதோ ராஜன் ப்ரீதிம்ʼ ப்ராப்ஸ்யஸி புஷ்கலாம் | 
மத்ப்ரஸாதா³ச்ச தே ஸௌக்²யமாரோக்³யம்ʼ ச ப⁴விஷ்யதி ||29||
யே நரா: கீர்தயிஷ்யந்தி லோகே விக³தகல்மஷா: | 
தேஷாம்ʼ துஷ்டா ப்ரதா³ஸ்யாமி ராஜ்யமாயுர்வபு: ஸுதம் ||30||
ப்ரவாஸே நக³ரே வாபி ஸங்க்³ராமே ஶத்ருஸங்கடே | 
அடவ்யாம்ʼ து³ர்க³காந்தாரே ஸாக³ரே க³ஹனே கி³ரௌ ||31||
யே ஸ்மரிஷ்யந்தி மாம்ʼ ராஜன்யதா²ऽஹம்ʼ ப⁴வதா ஸ்ம்ருʼதா | 
ந தேஷாம்ʼ து³ர்லப⁴ம்ʼ கிஞ்சித³ஸ்மிம்ʼல்லோகே ப⁴விஷ்யதி ||32||
இத³ம்ʼ ஸ்தோத்ரவரம்ʼ ப⁴க்த்யா ஶ்ருணுயாத்³வா படே²த வா | 
தஸ்ய ஸர்வாணி கார்யாணி ஸித்³தி⁴ம்ʼ யாஸ்யந்தி பாண்ட³வ ||33||
மத்ப்ரபா⁴வாச்ச வ: ஸர்வான் விராடநக³ரே ஸ்தி²தான் | 
ந ப்ராக்ஞாஸ்யந்தி குரவோ நரா வா தன்–நிவாஸின: ||34||
இத்யுக்தா வரதா³ தே³வீ யுதி⁴ஷ்டி²ரமரிந்த³மம் | 
ரக்ஷாம்ʼ க்ருʼத்வா ச பாண்டூ³னாம்ʼ தத்ரைவாந்தரதீ⁴யத ||35||
||இதி ஶ்ரீமன்மஹாபா⁴ரதே விராடபர்வணி த⁴ர்மராஜப்ரோக்தம்ʼ து³ர்கா³ஸ்தோத்ரம் ||