|| atha durgAstotram ||

(mahAbhArate virATaparvaNi dharmarAjaproktam)
virATanagaraM ramyaM gachChamAno yudhiShThiraH |
astuvanmanasA devIM durgAM tribhuneshvarIm ||1||

yashodAgarbhasaMbhUtAM nArAyaNamanapriyAm |
naMdagopakule jAtAM mAMgalyAM kulavardhinIm ||2||

kaMsavidrAvaNakarImasurANAM kShayaMkarIm |
shilAtale vinikShiptAmAkAshaM pratigAminIm ||3||

vAsudevasya bhaginIM divyamAlAvibhUShitAm |
divyAMbaradharAM devIM khaDgakheTakadhAriNIm ||4||

(bhArAvataraNe puNye ye smaraMti sadA shivAm |
tAn vai tArayate pApAt paMke gAmiva durbalAm ||)

stotuM prachakrame bhUyo vividhaiH stotrasaMbhavaiH |
AmaMtrya darshanAkAMkShI rAjA devIM sahAnujaH ||5||

rAjovAcha
namo.astu varade kRRiShNe kumAri brahmachAriNi |
bAlAkrasadRRishAkAre pUrNachaMdranibhAnane ||6||

chaturbhuje tanumadhye pInashroNipayodhare |
mayUrapichChavalaye keyUrAMgadabhUShaNe ||7||

bhAsi devi yathA padmA nArAyaNaparigrahA |
svarUpaM brahmacharyaM cha vishadaM tava khechari ||8||

kRRiShNachChavisamA kRRiShNA saMkarShaNasamAnanA |
bibhratI vipulau bAhU shakradhvajasamuchChrayau ||9||

pAtraM cha paMkajaM ghaMTAM vishuddhAM chaiva yA bhuvi |
pAshaM dhanurmahAchakraM vividhAnyAyudhAni cha ||10||

kuMDalAbhyAM supUrNAbhyAM karNAbhyAM cha vibhUShitA |
chaMdravispardhinA devi mukhena tvaM virAjase ||11||

mukuTena vichitreNa keshabaMdhena shobhinA |
bhujaMgabhogavAsena shroNisUtreNa rAjatA ||12||

vibhrAjase chA.a.abaddhena bhogeneveha maMdaraH |
dhvajena shikhipichChAnAmuchChritena virAjase ||13||

kaumAraM vratamAsthAya tridivaM pAvitaM tvayA |
tena tvaM stUyase devi tridashaiH pUjyase.api cha ||14||

trailokyarakShaNArthAya mahiShAsuranAshini |
prasannA me surashreShThe dayAM kuru shivA bhava ||15||

jayA tvaM vijayA chaiva saMgrAme cha jayapradA |
mamApi vijayaM dehi varadA tvaM cha sAMpratam ||16||

viMdhye chaiva nagashreShThe tava sthAnaM cha shAshvatam |
kAli kAli mahAkAli sIdhumAMsapashupriye ||17||

kRRitAnuyAtrA bhUtaistvaM varadA kAmarUpiNi |
bhArAvatAre cha ye tvAM saMsmariShyaMti mAnavAH ||18||

praNamaMti cha ye tvAM hi prabhAte tu narA bhuvi |
na teShAM durlabhaM kiMchitputrato dhanato.api vA ||19||

durgAttArayase durge tattvaM durgA smRRitA budhaiH |
kAMtAreShvavasannAnAM magnAnAM cha mahArNave ||20||

dasyubhirvA niruddhAnAM tvaM gatiH paramA nRRiNAm |
jalaprataraNe chaiva kAMtAreShvaTavIShu cha ||21||

ye smaraMti mahAdevIM na cha sIdaMti te narAH |
tvaM kIrtiH shrIrdhRRitiH siddhirhrIrvidyA saMtatirmatiH ||22||

saMdhyA rAtriH prabhA nidrA jyotsnA kAMtiH kShamA dayA |
nRRiNAM cha baMdhanaM mohaM putranAshaM dhanakShayam ||23||

vyAdhiM mRRityubhayaM chaiva pUjitA nAshayiShyasi |
so.ahaM rAjyAt paribhraShTaH sharaNaM tvAM prapannavAn ||24||

praNatashcha tathA mUrdhnA tava devi sureshvari |
trAhi mAM padmapatrAkShi satyA satyA bhavasva naH ||25||

sharaNaM bhava me durge sharaNye bhaktavatsale |
evaM stutA hi sA devI darshayAmAsa pAMDavam ||26||

devyuvAcha
shruNu rAjanmahAbAho madIyaM vachanaM prabho |
bhaviShyatyachirAdeva saMgrAme vijayastava ||27||

mama prasAdAnnirjitya hatvA kauravavAhinIm |
rAjyaM niShkaMTakaM kRRitvA bhokShyase medinIM punaH ||28||

bhrAtRRibhiH sahito rAjan prItiM prApsyasi puShkalAm |
matprasAdAchcha te saukhyamArogyaM cha bhaviShyati ||29||

ye narAH kIrtayiShyaMti loke vigatakalmaShAH |
teShAM tuShTA pradAsyAmi rAjyamAyurvapuH sutam ||30||

pravAse nagare vApi saMgrAme shatrusaMkaTe |
aTavyAM durgakAMtAre sAgare gahane girau ||31||

ye smariShyaMti mAM rAjanyathA.ahaM bhavatA smRRitA |
na teShAM durlabhaM kiMchidasmiMlloke bhaviShyati ||32||

idaM stotravaraM bhaktyA shruNuyAdvA paTheta vA |
tasya sarvANi kAryANi siddhiM yAsyaMti pAMDava ||33||

matprabhAvAchcha vaH sarvAn virATanagare sthitAn |
na prAj~nAsyaMti kuravo narA vA tannivAsinaH ||34||

ityuktA varadA devI yudhiShThiramariMdamam |
rakShAM kRRitvA cha pAMDUnAM tatraivAMtaradhIyata ||35||

|| iti shrImanmahAbhArate virATaparvaNi dharmarAjaproktaM durgAstotram ||