अथ ध्यानस्नान विधिः 
श्री सनत्कुमार उवाच 
त्रिविक्रमं तीर्थपादं नत्वा सर्वाघनाशनम् | 
ध्यानस्नानं प्रवक्ष्यामि सर्वसत्कर्मसिद्धये || १|| 
खे स्धितं पुंडरीकाक्षं मंत्रमूर्तिं हरिं स्मरेत् | 
अनंतादित्यसंकाशं वासुदेवं चतुर्भुजम् || २|| 
शंखचक्रगदापद्मधारिणं वनमालिनम् | 
श्यामलं शांतहृदयं दिव्यपीतांबरावृतम् || ३|| 
दिव्यचंदनलिप्तांगं चारुहासं शुभेक्षणम् | 
अनेकरत्नसंच्छन्नस्फुरन्मकरकुंडलम् || ४|| 
नारदादिभिरासेव्यं भास्वद्विमलभूषणम् | 
सकिंकीणीककेयूरहारिणं मकुटोज्वलम् || ५|| 
ध्वजवज्रांकुशलक्ष्मपादपाथोरुहद्वयम् | 
तत्पादनखजां गंगां निपतंतीं स्वमूर्धनि || ६|| 
चिंतयेद्भ्रह्मरंध्रेण प्रविशंतीं स्वकां तनुम् | 
तया संक्षालयेत् सर्वमंतर्देहगतं मलम् | 
तत्‌क्षणाद्विरजो मर्त्यो जायते स्फाटिकोपमः || ७|| 
इदं स्नानं परं मंत्रात् सहस्राधिकमुच्यते | 
इत्युक्तं मानसं स्नानमवगाहाच्छताधिकान् || ८|| 
इडा भागीरथी गंगा पिंगला यमुना स्मृता | 
तयोर्मध्ये गता नाडी सुषुम्नाख्या सरस्वती || ९|| 
ज्ञानह्रदे ध्यानजले रागद्वेषमलापहे | 
यः स्नाति मानसे तीर्थे स याति परमां गतिम् || 
नास्य संसर्गदोषोऽपि कदाचन भविष्यति || १०|| 
इदं ध्यानं परं मंत्रात् सहस्रगुणमुत्तमम् | 
सार्धत्रिकोटितीर्थेषु स्नानात् कोटिगुणाधिम् || ११|| 
यो नित्यमाचरेदेवं स वै नारायणः स्मृतः |  
यः पठेत् प्रातरुत्थाय भक्तियुक्तेन चेतसा | 
कालमृत्युमतिक्रम्य जीवत्येव न संशयः || १२|| 
अपवित्रः पवित्रो वा सर्वावस्थां गतोऽपि वा | 
यः स्मरेत् पुंडरीकाक्षं तेन स्नातो भवाम्यहम् || १३|| 
||  इति वामनपुराणोक्तः ध्यानस्नान विधिः ||