అథ ధ్యానస్నాన విధిః
శ్రీ సనత్కుమార ఉవాచ
త్రివిక్రమం తీర్థపాదం నత్వా సర్వాఘనాశనం |

ధ్యానస్నానం ప్రవక్ష్యామి సర్వసత్కర్మసిద్ధయే || 1||

ఖే స్ధితం పుండరీకాక్షం మంత్రమూర్తిం హరిం స్మరేత్ |

అనంతాదిత్యసంకాశం వాసుదేవం చతుర్భుజం || 2||

శంఖచక్రగదాపద్మధారిణం వనమాలినం |

శ్యామలం శాంతహృదయం దివ్యపీతాంబరావృతం || 3||

దివ్యచందనలిప్తాంగం చారుహాసం శుభేక్షణం |

అనేకరత్నసంచ్ఛన్నస్ఫురన్మకరకుండలం || 4||

నారదాదిభిరాసేవ్యం భాస్వద్విమలభూషణం |

సకింకీణీకకేయూరహారిణం మకుటోజ్వలం || 5||

ధ్వజవజ్రాంకుశలక్ష్మపాదపాథోరుహద్వయం |

తత్పాదనఖజాం గంగాం నిపతంతీం స్వమూర్ధని || 6||

చింతయేద్భ్రహ్మరంధ్రేణ ప్రవిశంతీం స్వకాం తనుం |

తయా సంక్షాలయేత్ సర్వమంతర్దేహగతం మలం |

తత్‌క్షణాద్విరజో మర్త్యో జాయతే స్ఫాటికోపమః || 7||

ఇదం స్నానం పరం మంత్రాత్ సహస్రాధికముచ్యతే |

ఇత్యుక్తం మానసం స్నానమవగాహాచ్ఛతాధికాన్ || 8||

ఇడా భాగీరథీ గంగా పింగలా యమునా స్మృతా |

తయోర్మధ్యే గతా నాడీ సుషుమ్నాఖ్యా సరస్వతీ || 9||

జ్ఞానహ్రదే ధ్యానజలే రాగద్వేషమలాపహే |

యః స్నాతి మానసే తీర్థే స యాతి పరమాం గతిం ||

నాస్య సంసర్గదోషోఽపి కదాచన భవిష్యతి || 10||

ఇదం ధ్యానం పరం మంత్రాత్ సహస్రగుణముత్తమం |

సార్ధత్రికోటితీర్థేషు స్నానాత్ కోటిగుణాధిం || 11||

యో నిత్యమాచరేదేవం స వై నారాయణః స్మృతః |

యః పఠేత్ ప్రాతరుత్థాయ భక్తియుక్తేన చేతసా |

కాలమృత్యుమతిక్రమ్య జీవత్యేవ న సంశయః || 12||

అపవిత్రః పవిత్రో వా సర్వావస్థాం గతోఽపి వా |

యః స్మరేత్ పుండరీకాక్షం తేన స్నాతో భవామ్యహం || 13||

|| ఇతి వామనపురాణోక్తః ధ్యానస్నాన విధిః ||