atha dhyānasnāna vidhiḥ
śrī sanatkumāra uvāca
trivikramaṁ tīrthapādaṁ natvā sarvāghanāśanam |
dhyānasnānaṁ pravakṣyāmi sarvasatkarmasiddhaye ||1||
khe sdhitaṁ puṁḍarīkākṣaṁ maṁtramūrtiṁ hariṁ smaret |
anaṁtādityasaṁkāśaṁ vāsudevaṁ caturbhujam ||2||
śaṁkhacakragadāpadmadhāriṇaṁ vanamālinam |
śyāmalaṁ śāṁtahṛdayaṁ divyapītāṁbarāvṛtam ||3||
divyacaṁdanaliptāṁgaṁ cāruhāsaṁ śubhekṣaṇam |
anekaratnasaṁcchannasphuranmakarakuṁḍalam ||4||
nāradādibhirāsevyaṁ bhāsvadvimalabhūṣaṇam |
sakiṁkīṇīkakeyūrahāriṇaṁ makuṭojvalam ||5||
dhvajavajrāṁkuśalakṣmapādapāthoruhadvayam |
tatpādanakhajāṁ gaṁgāṁ nipataṁtīṁ svamūrdhani ||6||
ciṁtayedbhrahmaraṁdhreṇa praviśaṁtīṁ svakāṁ tanum |
tayā saṁkṣālayet sarvamaṁtardehagataṁ malam |
tatkṣaṇādvirajo martyo jāyate sphāṭikopamaḥ ||7||
idaṁ snānaṁ paraṁ maṁtrāt sahasrādhikamucyate |
ityuktaṁ mānasaṁ snānamavagāhācchatādhikān ||8||
iḍā bhāgīrathī gaṁgā piṁgalā yamunā smṛtā |
tayormadhye gatā nāḍī suṣumnākhyā sarasvatī ||9||
jñānahrade dhyānajale rāgadveṣamalāpahe |
yaḥ snāti mānase tīrthe sa yāti paramāṁ gatim ||
nāsya saṁsargadoṣo'pi kadācana bhaviṣyati ||10||
idaṁ dhyānaṁ paraṁ maṁtrāt sahasraguṇamuttamam |
sārdhatrikoṭitīrtheṣu snānāt koṭiguṇādhim ||11||
yo nityamācaredevaṁ sa vai nārāyaṇaḥ smṛtaḥ |
yaḥ paṭhet prātarutthāya bhaktiyuktena cetasā |
kālamṛtyumatikramya jīvatyeva na saṁśayaḥ ||12||
apavitraḥ pavitro vā sarvāvasthāṁ gato'pi vā |
yaḥ smaret puṁḍarīkākṣaṁ tena snāto bhavāmyaham ||13||
|| iti vāmanapurāṇoktaḥ dhyānasnāna vidhiḥ ||