|| atha dashAvatArastutiH ||

proShThIshavigraha, su-niShThIvanoddhatavi-shiShTAMbuchArijaladhe
koShThAMtarAhitavi-cheShTAgamaugha para-meShThIDita tvamava mAm |
preShThAkasUnumanu-cheShTArthamAtmavida-tIShTo yugAMtasamaye
stheShThAtmashRRiMgadhRRita-kAShThAMbuvAhana, va-rAShTApadaprabhatano||1||

khaMDIbhavadbahula-DiMDIrajRRiMbhaNasu-chaMDIkRRitodadhimahA-
kAMDAtichitragati-shauMDAdya haimarada-bhAMDAprameyacharita |
chaMDAshvakaMThamada-shuMDAladurhRRidaya-gaMDAbhikhaMDakarado-
shchaMDAmaresha haya-tuMDAkRRite dRRishama-khaMDAmalaM pradisha me||2||

kUrmAkRRite tvavatu, narmAtmapRRiShThadhRRita-bharmAtmamaMdaragire
dharmAvalaMbana su-dharmAsadA kalita-sharmA sudhAvitaraNAt |
durmAnarAhumukha-durmAyidAnavasu-marmAbhibhedanapaTo
gharmArkakAMtivara-varmA bhavAn bhuvana-nirmANadhUtavikRRitiH||3||

dhanvaMtareM.agaruchi-dhanvaMtare.aritaru-dhanvaMstarIbhava sudhA-
bhAnvaMtarAvasatha, manvaMtarAdhikRRita-tanvaMtarauShadhanidhe |
danvaMtaraMgashugu-danvaMtamAjiShu vi-tanvan mamAbdhitanayA
sUnvaMtakAtmahRRida-tanvaMtarAvayava-tanvaMtarArtijaladhau||4||

yA kShIravArdhimatha-nAkShINadarpaditi-jAkShobhitAmaragaNA
prekShAptaye.ajani, va-lakShAMshubiMbajida-tIkShNAlakAvRRitamukhI |
sUkShmAvalagnavasa-nA.a.akShepakRRitkuchaka-TAkShAkShamIkRRitamano-
dIkShAsurAhRRita-sudhA.akShANi no.avatu, surUkShekShaNAddharitanuH||5||

shIkShAdiyuMnigama-dIkShAsulakShaNa-parIkShAkShamA vidhisatI
dAkShAyaNI kShamati, sAkShAdramA.api na ya-dAkShepavIkShaNavidhau |
prekShAkShilobhakara-lAkShArasokShita-padAkShepalakShitadharA
sA.akShAritAtmatanu-bhUkShArakAriniTi-lAkShA.akShamAnavatu naH||6||

nIlAMbudAbha shubha-shIlAdridehadhara, khelAhRRitodadhidhunI-
shailAdiyuktanikhi-lelAkaTAdyasura-tUlATavIdahana te |
kolakRRite jaladhi-kAlAchalAvayava-nIlAbjadaMShTradharaNI-
lIlAspadorutala-mUlAshiyogivara-jAlAbhivaMdita namaH||7||

daMbholitIkShNanakha-saMbhediteMdraripu-kuMbhIMdra pAhi kRRipayA
staMbhArbhakAsahana, DiMbhAya dattavara gaMbhIranAdanRRihare |
aMbhodhijAnusara-NAMbhojabhUpavana-kuMbhInaseshakhagarAT-
kuMbhIMdrakRRittidhara-jaMbhAriShaNmukha-mukhAMbhoruhAbhinuta mAm||8||

piMgAkShavikrama-turaMgAdisainyachatu-raMgAvaliptadanujA
sAMgAdhvarasthabali-sAMgAvapAtahRRiShi-tAMgAmarAlinuta te |
shRRiMgArapAdanakha-tuMgAgrabhinnakana-kAMgAMDapAtitaTinI
tuMgAtimaMgala-taraMgAbhibhUtabhaja-kAMgAgha vAmana namaH||9||

dhyAnArhavAmanata-no nAtha pAhiyaja-mAnAsureshavasudhA-
dAnAya yAchanika, lInArthavAgvashita-nAnAsadasyadanuja |
mInAMkanirmala-nishAnAthakoTi-lasamAnAtmamauMjiguNakau-
pInAchChasUtrapada-yAnAtapatrakara-kAnamyadaMDavarabhRRit||10||

dhairyAMbudhe parashu-charyAdhikRRittakhala-varyAvanIshvara mahA-
shauryAbhibhUta kRRita-vIryAtmajAtabhuja-vIryAvalepanikara |
bhAryAparAdhakupi-tAryAj~nayA galita-nAryAtmasUgalataro
kAryA.aparAdhamavi-chAryAryamaughajayi-vIryAmitA mayi dayA||11||

shrIrAma lakShmaNashu-kArAmabhUravatu gaurAmalAmitamaho-
hArAmarastuta-yasho rAmakAMtisuta-no rAmalabdhakalaha |
svArAmavaryaripu-vIrAmayarddhikara, chIrAmalAvRRitakaTe
svArAmadarshanaja-mArAmayAgatasu-ghorAmanorathahara||12||

shrIkeshava pradisha, nAkeshajAtakapi-lokeshabhagnaravibhU-
stoketarArtihara-NAkevalArthasukha-dhIkekikAlajalada |
sAketanAtha vara-pAkeramukhyasuta-kokena bhaktimatulAM
rAkeMdubiMbamukha, kAkekShaNApaha hRRiShIkesha teM.aghrikamale||13||

rAme nRRiNAM hRRidabhirAme, narAshikulabhIme, mano.adya ramatAM
gomedinIjayita-po.ameyagAdhisuta-kAme niviShTamanasi |
shyAme sadA tvayi, jitAmeyatApasaja-rAme gatAdhikasame
bhImeshachApadala-nAmeyashauryajita-vAmekShaNe vijayini||14||

kAMtAragehakhala-kAMtAraTadvadana-kAMtAlakAMtakasharaM
kAMtA.a.ara yAMbujani-kAMtAnvavAyavidhu-kAMtAshmabhAdhipa hare |
kAMtAliloladala-kAMtAbhishobhitila-kAMtA bhavaMtamanu sA
kAMtAnuyAnajita-kAMtAradurgakaTa-kAMtA ramA tvavatu mAm||15||

dAMtaM dashAnana-sutAMtaM dharAmadhi-vasaMtaM prachaMDatapasA
klAMtaM sametya vipi-nAMtaM tvavApa yama-naMtaM tapasvipaTalam|
yAMtaM bhavAratibha-yAMtaM mamAshu bhaga-vaMtaM bhareNa bhajatAt
svAMtaM savAridanu-jAMtaM dharAdharanishAMtaM, satApasavaram||16||

shaMpAbhachApalava-kaMpAstashatrubala-saMpAditAmitayashAH
shaM pAdatAmarasa-saMpAtino.alamanu-kaMpArasena disha me |
saMpAtipakShisaha-jaM pAparAvaNaha-taM pAvanaM yadakRRithA-
stvaM pApakUpapati-taM pAhi mAM tadapi, paMpAsarastaTachara||17||

lolAkShyapekShita-sulIlAkuraMgavadha-khelAkutUhalagate
svAlApabhUmijani-bAlApahAryanuja-pAlAdya bho jaya jaya |
bAlAgnidagdhapura-shAlAnilAtmajani-phAlAttapattalarajo
nIlAMgadAdikapi-mAlAkRRitAlipatha-mUlAbhyatItajaladhe||18||

tUNIrakArmuka-kRRipANIkiNAMkabhuja-pANI ravipratimabhAH
kShoNIdharAlinibha-ghoNImukhAdighana-veNIsurakShaNakaraH |
shoNIbhavannayana-koNIjitAMbunidhi-pANIritArhaNimaNi-
shreNIvRRitAMghririha, vANIshasUnuvara-vANIstuto vijayate||19||

huMkArapUrvamatha-TaMkAranAdamati-paMkA.avadhAryachalitA
laMkA shilochchaya-vishaMkA patadbhidura-shaMkA.a.asa yasya dhanuShaH |
laMkAdhipo.amanuta, yaM kAlarAtrimiva, shaMkAshatAkuladhiyA
taM kAladaMDashata-saMkAshakArmuka-sharAMkAnvitaM bhaja harim||20||

dhImAnameyatanu-dhAmA.a.artamaMgalada-nAmA ramAkamalabhU-
kAmAripannagapa-kAmAhivairiguru-somAdivaMdyamahimA |
sthemAdinA.apagata-sImA.avatAt sakhala-sAmAjarAvaNaripU
rAmAbhidho harira-bhaumAkRRitiH pratana-sAmAdivedaviShayaH||21||

doShA.a.atmabhUvashatu-rAShADatikramaja-roShAtmabhartRRivachasA
pAShANabhUtamuni-yoShAvarAtmatanu-veShAdidAyicharaNaH |
naiShAdayoShidashu-bheShAkRRidaMDajani-doShAcharAdishubhado
doShA.agrajanmamRRiti-shoShApaho.avatu su-doShAMghrijAtahananAt||22||

vRRiMdAvanasthapashu-vRRiMdAvanaM vinuta-vRRiMdArakaikasharaNaM
naMdAtmajaM nihata-niMdAkRRidAsuraja-naM dAmabaddhajaTharam |
vaMdAmahe vayama-maMdAvadAtaruchi-maMdAkShakArivadanaM
kuMdAlidaMtamuta, kaMdAsitaprabhata-nuM dAvarAkShasaharam||23||

gopAlakotsavakRRi-tApArabhakShyarasa-sUpAnnalopakupitA-
shApAlayApitala-yApAMbudAlisali-lApAyadhAritagire |
svApAMgadarshanaja-tApAMgarAgayuta-gopAMganAMshukahRRiti-
vyApArashauMDa vivi-dhApAyatastvamava, gopArijAtaharaNa||24||

kaMsAdikAsadava-taMsAvanIpativi-hiMsAkRRitAtmajanuShaM
saMsArabhUtamiha-saMsArabaddhamana-saM sArachitsukhatanum |
saMsAdhayaMtamani-shaM sAtvikavrajama-haM sAdaraM bata bhaje
haMsAditApasari-raMsAspadaM parama-haMsAdivaMdyacharaNam||25||

rAjIvanetra vidu-rAjIva mAmavatu, rAjIvaketanavashaM
vAjIbhapattinRRipa-rAjIrathAnvitaja-rAjIvagarvashamana |
vAjIshavAhasita-vAjIshadaityatanu-vAjIshabhedakarado-
rjAjIkadaMbanava-rAjIvamukhyasuma-rAjIsuvAsitashiraH||26||

kAlIhRRidAvasatha-kAlIyakuMDalipa-kAlIsthapAdanakharA
vyAlInavAMshukara-vAlIgaNAruNita-kAlIruche jaya jaya |
kelIlavApahRRita-kAlIshadattavara-nAlIkadRRiptaditibhU-
chUlIkagopamahi-lAlItanUghusRRiNa-dhUlIkaNAMkahRRidaya||27||

kRRiShNAdipAMDusuta-kRRiShNAmanaHprachura-tRRiShNAsutRRiptikaravAk
kRRiShNAMkapAlirata, kRRiShNAbhidhAghahara, kRRiShNAdiShaNmahila bhoH |
puShNAtu mAmajita, niShNAtavArdhimuda-nuShNAMshumaMDala hare
jiShNo girIMdradhara-viShNo vRRiShAvaraja, dhRRiShNo bhavAn karuNayA||

rAmAshiromaNidha-rAmAsametabala-rAmAnujAbhidha ratiM
vyomAsurAMtakara- te mAratAta disha- me mAdhavAMghrikamale |
kAmArtabhaumapura-rAmAvalipraNaya-vAmAkShipItatanubhA
bhImAhinAthamukha-vaimAnikAbhinuta, bhImAbhivaMdyacharaNa||29||

sakShvelabhakShyabhaya-dAkShishravogaNaja-lAkShepapAshayamanaM
lAkShAgRRihajvalana-rakShohiDiMbabaka-bhaikShAnnapUrvavipadaH |
akShAnubaMdhabhava-rukShAkSharashravaNa-sAkShAnmahiShyavamatI
kakShAnuyAnamadha-makShmApasevanama-bhIkShNApahAsamasatAm||30||

chakShANa eva nija-pakShAgrabhUdashasha-tAkShAtmajAdisuhRRidAm
AkShepakArikunRRi-pAkShauhiNIshataba-lAkShobhadIkShitamanAH |
tArkShyAsichApashara-tIkShNAripUrvanija-lakShmANi chApyagaNayan
vRRikShAlayadhvaja-rirakShAkaro jayati, lakShmIpatiryadupatiH||31||

buddhAvatAra kavi-baddhAnukaMpa kuru, baddhAMjalau mayi dayAM
shauddhodanipramukha-saidhdAMtikAsugama-bauddhAgamapraNayana |
kruddhAhitAsuhRRiti-siddhAsikheTadhara, shuddhAshvayAna kamalA-
shuddhAMta mAM ruchipi-naddhAkhilAMganija-maddhA.ava kalkyabhidha bhoH||32||

sAraMgakRRittidhara-sAraMgavAridhara, sAraMgarAjavaradA-
sAraM gadAritara-sAraM gatAtmamada-sAraM gatauShadhabalam |
sAraMgavatkusuma-sAraM gataM cha tava, sAraMgamAMghriyugalaM
sAraMgavaNamapa-sAraMgatAbjamada-sAraM gadiMstvamava mAm||33||

grIvAsyavAhatanu-devAMDajAdidasha-bhAvAbhirAmacharitaM
bhAvAtibhavyashubha-dhIvAdirAjayati-bhUvAgvilAsanilayam |
shrIvAgadhIshamukha-devAbhinamyahari-sevArchaneShu paThatAM
AvAsa eva bhavi-tA.avAgbhavetarasu-rAvAsalokanikare||34||

|| iti shrIvAdirAjatIrthavirachitA dashAvatArastutiH ||