atha daśāvatārastotram
yā tvarā jalasaṁcāre yā tvarā vedarakṣaṇe |
mayyārte karuṇāmūrte sā tvarā kva gatā hare ||1||
yā tvarā maṁdaroddhāre yā tvarā hatarakṣaṇe |
mayyārte karuṇāmūrte sā tvarā kva gatā hare ||2||
yā tvarā kroḍaveṣasya vidhṛtau bhūsamuddhṛtau |
mayyārte karuṇāmūrte sā tvarā kva gatā hare ||3||
yā tvarā cāṁtramālāyāṁ dhāraṇe potarakṣaṇe |
mayyārte karuṇāmūrte sā tvarā kva gatā hare ||4||
yā tvarā vaṭuveṣasya dhāraṇe balibaṁdhane |
mayyārte karuṇāmūrte sā tvarā kva gatā hare ||5||
yā tvarā rājahanane yā tvarā vākyarakṣaṇe |
mayyārte karuṇāmūrte sā tvarā kva gatā hare ||6||
yā tvarā rūkṣahanane yā tvarā bhrātṛpālane |
mayyārte karuṇāmūrte sā tvarā kva gatā hare ||7||
yā tvarā kapirājasya poṣaṇe setubaṁdhane |
mayyārte karuṇāmūrte sā tvarā kva gatā hare ||8||
yā tvarā gopakanyānāṁ rakṣaṇe kaṁsamāraṇe |
mayyārte karuṇāmūrte sā tvarā kva gatā hare ||9||
yā tvarā bhaiṣmiharaṇe yā tvarā rukmibaṁdhane |
mayyārte karuṇāmūrte sā tvarā kva gatā hare ||10||
yā tvarā vaidhasaṁdhākakathane bauddhamohane |
mayyārte karuṇāmūrte sā tvarā kva gatā hare ||11||
yā tvarā turagārohĕ yā tvarā mlecchamāraṇe |
mayyārte karuṇāmūrte sā tvarā kva gatā hare ||12||
satyavratārthaputreṇa bhaktyā koneriṇeritaṁ |
daśāvatārastavakaṁ paṭhan mokṣamavāpnuvāt ||13||
|| iti śrīkoneri ācāryakṛtaṁ daśāvatāra stotraṁ ||