దామోదరస్తోత్రం
అథ దామోదరస్తోత్రం 
మత్స్యాకృతిధర జయ దేవేశ వేదవిబోధక కూర్మస్వరూప । 
మందరగిరిధర సూకరరూప భూమివిధారక జయ దేవేశ ॥౧॥
కాంచనలోచన నరహరిరూప దుష్టహిరణ్యకభంజన జయ భో ।
జయ జయ వామన బలివిధ్వంసిన్ దుష్టకులాంతక భార్గవరూప ॥౨॥
జయ విశ్రవసఃసుతవిధ్వంసిన్ జయ కంసారే యదుకులతిలక ।
జయ వృందావనచర దేవేశ దేవకినందన నందకుమార ॥౩॥
జయ గోవర్ధనధర వత్సారే ధేనుకభంజన జయ కంసారే । 
రుక్మిణినాయక జయ గోవింద సత్యావల్లభ పాండవబంధో ॥౪॥
ఖగవరవాహన జయ పీఠారే జయ మురభంజన పార్థసఖే త్వమ్ ।
భౌమవినాశక దుర్జనహారిన్ సజ్జనపాలక జయ దేవేశ ॥౫॥
శుభగుణపూరిత జయ విశ్వేశ జయ పురుషోత్తమ నిత్యవిబోధ । 
భూమిభరాంతకకారణరూప జయ ఖరభంజన దేవవరేణ్య ॥౬॥
విధిభవముఖసురసతతసువందితసచ్చరణాంబుజ కంజసునేత్ర । 
సకలసురాసురనిగ్రహకారిన్ పూతనిమారణ జయ దేవేశ ॥౭॥
యద్భ్రూవిభ్రమమాత్రాత్తదిదమాకమలాసనశంభువిపాద్యమ్ ।
సృష్టిస్థితిలయమృచ్ఛతి సర్వం స్థిరచరవల్లభ స త్వం జయ భో ॥౮॥
జయయమలార్జునభంజనమూర్తే జయ గోపీకుచకుంకుమాంకితాంగ ।
పాంచాలీపరిపాలన జయ భో జయ గోపీజనరంజన జయ భో ॥౯॥
జయ రాసోత్సవరత లక్ష్మీశ సతతసుఖార్ణవ జయ కంజాక్ష । 
జయ జననీకరపాశసుబద్ధ హరణాన్నవనీతస్య సురేశ ॥౧౦॥
బాలక్రీడనపర జయ భో త్వం మునివరవందితపదపద్మేశ ।
కాలియఫణిఫణమర్దన జయ భో 
ద్విజపత్న్యర్పితమత్సి విభోఽన్నమ్ ॥౧౧॥
క్షీరాంబుధికృతనిలయన దేవ వరద మహాబల జయ జయ కాంత । 
దుర్జనమోహక బుద్ధస్వరూప సజ్జనబోధక కల్కిస్వరూప । 
జయ యుగకృద్దుర్జనవిధ్వంసిన్ జయ జయ జయ భో జయ విశ్వాత్మన్ ॥౧౨॥
ఇతి మంత్రం పఠన్నేవ కుర్యాన్నీరాజనం బుధః ।
ఘటికాద్వయశిష్టాయాం స్నానం కుర్యాద్యథావిధి ॥౧౩॥
॥ ఇతి దామోదరస్తోత్రమ్ ॥