சரமஶ்லோகா:
॥ அத² ஸ்ரீ குருபரம்பரா சரமஶ்லோகா: ॥
ப்³ரஹ்மாந்தா கு³ரவ: ஸாக்ஷாதி³ஷ்டம் தை³வம் ஶ்ரிய:பதி:।
ஆசார்யா: ஸ்ரீமதா³சார்யா: ஸந்து மே ஜன்ம-ஜன்மனி ॥1॥
ஸ்ரீஹம்ஸம் பரமாத்மானம் விரிஞ்சிம் ஸனகாதி³கான் ।
தூ³ர்வாஸஸோ க்ஞானநிதீ⁴ன் வீந்த்³ரவாஹனதீர்த்த²கான் ॥2॥
கைவல்ய-தீர்த்தா²ன் க்ஞானேஶான் பரதீர்த்தா²ன் நமாம்யஹம்।
ஸத்யப்ரக்ஞான் ப்ராக்ஞதீர்த்தா²னன்யான் தத்³வம்ஶஜானபி ॥3॥
புரைவ க்ருஷ்ணா-ஸித்³தா⁴ன்ன-பு⁴க்த்யா ஶோதி⁴த-மானஸம்।
அச்யுதப்ரேக்ஷ-தீர்த்த²ம் ச மத்⁴வார்யாணாம் கு³ரும் ப⁴ஜே ॥4॥
லஸது ஸ்ரீமதா³னந்த³தீர்த்தே²ந்து³ர்நோ ஹ்ருத³ம்ப³ரே ।
யத்³வசஶ்-சந்த்³ரிகா ஸ்வாந்த-ஸந்தாபம் வினிக்ருந்ததி ॥5॥
பூர்ணப்ரக்ஞ-க்ருதம் பா⁴ஷ்யம் ஆதௌ³ தத்³பா⁴வ-பூர்வகம் ।
யோ வ்யாகரோன்-நமஸ்தஸ்மை பத்³மநாபா⁴க்²ய-யோகி³னே ॥6॥
ஸஸீதா மூலராமார்ச்சா கோஶே க³ஜபதே: ஸ்தி²தா ।
யேனானீதா நமஸ்தஸ்மை ஸ்ரீமன்-ந்ருஹரி-பி⁴க்ஷவே ॥7॥
ஸாதி⁴தாகி²ல-ஸத்தத்வம் பா³தி⁴தாகி²ல-து³ர்மதம் ।
போ³தி⁴தாகி²ல-ஸன்மார்க³ம் மாத⁴வாக்²ய-யதிம் ப⁴ஜே ॥8॥
யோ வித்³யாரண்ய-விபினம் தத்வமஸ்யஸினாऽச்சி²னத் ।
ஸ்ரீமத³க்ஷோப்⁴ய-தீர்த்தா²ர்ய-ஹம்ஸேனம் தம் நமாம்யஹம் ॥9॥
யஸ்ய வாக்காமதே⁴னுர்ந: காமிதார்த்தா²ன் ப்ரயச்ச²தி ।
ஸேவே தம் ஜய-யோகீ³ந்த்³ரம் காமபா³ணச்சி²த³ம் ஸதா³ ॥10॥
மாத்³யத³த்³வைத்யந்த⁴காரப்ரத்³யோதனமஹர்நிஶம் ।
வித்³யாதி⁴ராஜம் ஸுகு³ரும் த்⁴யாயாமி கருணாகரம் ॥11॥
வீந்த்³ராரூட⁴-பதா³ஸக்தம் ராஜேந்த்³ர-முனி-ஸேவிதம் ।।
ஸ்ரீகவீந்த்³ர-முனிம் வந்தே³ ப⁴ஜதாம் சந்த்³ர-ஸன்னிப⁴ம் ॥12॥
வாஸுதே³வ-பத³-த்³வந்த்³வ-வாரிஜாஸக்த-மானஸம் ।
பத³வ்யாக்²யான-குஶலம் வாகீ³ஶ-யதிமாஶ்ரயே ॥13॥
த்³யுமண்யபி⁴ஜனாப்³ஜேந்தூ³ ராம-வ்யாஸ-பதா³ர்ச்சக: ।।
ராமசந்த்³ர-கு³ருர்பூ⁴யாத் காமிதார்த்த²-ப்ரதாயக: ॥14॥
யத்³ப⁴க்த்யா மூலராமஸ்ய பேடிகா த்யக்த-பூ⁴மிகா ।
வித்³யாநிதி⁴ர்தி⁴யம் த³த்³யாத் அஷ்ட-ஷஷ்ட்யப்³த³-பூஜக: ॥15॥
ரகு⁴நாத²கு³ரும் நௌமி வித்³யாநிதி⁴-கரோத்³ப⁴வம் ।
கூர்மோ வருண-க³ங்கே³ ச யஸ்ய ப்ரத்யக்ஷதாம் க³தா: ॥16॥
மஹாப்ரவாஹினீ பீ⁴மா யஸ்ய மார்க³மதா³ன்முதா³ ।
ரகு⁴வர்யோ முத³ம் த³த்³யாத் காமிதார்த்த²-ப்ரதா³யக: ॥17॥
பா⁴வபோ³த⁴-க்ருதம் ஸேவே ரகூ⁴த்தம-மஹாகு³ரும் ।
யச்சி²ஷ்ய-ஶிஷ்ய-ஶிஷ்யாத்³யா: டிப்பண்யாசார்ய-ஸம்ஞிதா: ॥18॥
ந த³க்³த⁴ம் யஸ்ய கௌபீனம் அக்³னௌ த³த்தமபி ஸ்பு²டம் ।
வேத³வ்யாஸ-கு³ரும் நௌமி ஸ்ரீ-வேதே³ஶ-நமஸ்க்ருதம் ॥19॥
ஸ்ரீமத்ஸுதா⁴த்³பு⁴தாம்போ³தி⁴-விக்ரீட³ன-விசக்ஷணான் ।
வாக்யார்த்த²-சந்த்³ரிகா-காரான் வித்³யாதீ⁴ஶ-கு³ரூன் ப⁴ஜே ॥20॥
வித்³யாதீ⁴ஶாப்³தி⁴-ஸம்பூ⁴தோ வித்³வத்-குமுத³-பா³ந்த⁴வ: ।
வேத³நித்⁴யாக்²ய-சந்த்³ரோऽயம் காமிதார்த்தா²ன் ப்ரயச்ச²து ॥21॥
வேத³நித்⁴யாலவாலோத்த²: விது³ஷாம் சிந்தித-ப்ரத³: ।
ஸத்யவ்ரதாக்²ய-கல்பத்³ரு: பூ⁴யாதி³ஷ்டார்த்த²-ஸித்³த⁴யே ॥22॥
அனதீ⁴த்ய மஹாபா⁴ஷ்யம் வ்யாக்²யாதம் யத³னுக்³ரஹாத் ।
வந்தே³ தம் விதி⁴னா ஸத்யநிதி⁴ம் ஸத்-க்ஞான-ஸித்³த⁴யே ॥23॥
ஸத்யநாத²கு³ரு: பாது யோ தீ⁴ரோ நவசந்த்³ரிகாம் ।
நவாம்ருத-க³தா³-தீர்த்த²-தாண்ட³வானி வ்யசீக்ல்ருபத் ॥24॥
ஸத்யநாதா²ப்³தி⁴-ஸம்பூ⁴த: ஸத்³கோ³க³ண-விஜ்ரும்பி⁴த: ।
ஸத்யாபி⁴நவ-தீர்த்தே²ந்து³: ஸந்தாபான் ஹந்து ஸந்ததம் ॥25॥
ஸத்யாபி⁴நவ-து³க்³தா⁴ப்³தே⁴: ஸஞ்ஜாத: ஸகலேஷ்டத³: ।
ஸ்ரீஸத்யபூர்ண-தீர்த்தே²ந்து³: ஸந்தாபான் ஹந்து ஸந்ததம் ॥26॥
ஸத்யபூர்ணாம்பு³தே⁴ர்ஜாதோ வித்³வஜ்ஜன-விஜ்ரும்பி⁴த: ।
த³னீத்⁴வம்ஸீது நஸ்தாபம் ஸ்ரீஸத்யவிஜயோடு³ப: ॥27॥
ஸ்ரீஸத்யவிஜயாம்போ³தே⁴: ஜாதம் ஸத்யப்ரியாம்ருதம் ।
ஜராம்ருதீ ஜங்க⁴னீது விபு³தா⁴னாம் முதே³ ஸதா³ ॥28॥
நைவேத்³யக³-விஷம் ராமே வீக்ஷ்ய தத்³-பு⁴க்தி-பா⁴க் கு³ரு: ।
யோऽத³ர்ஶயத்³-ரவிம் ராத்ரௌ ஸத்யபோ³தோ⁴ऽஸ்து மே முதே³॥29॥
விஷ்ணோ: பத³ஶ்ரித் கோ³வ்ராதை: ஸ்வாந்த-த்⁴வாந்த-நிவாரக:।
ஸ்ரீஸத்யஸந்த⁴-ஸூர்யோऽயம் பா⁴ஸதாம் நோ ஹ்ருத³ம்ப³ரே ॥30॥
ஸ்ரீஸத்யஸந்த⁴-ஸிந்தூ⁴த்த²: ஸ்ரீஸத்யவர-சந்த்³ரமா: ।
ப்ரார்த்தி²தார்த்த²-ப்ரதோ³ நித்யம் பூ⁴ய: ஸ்யாத் இஷ்ட-ஸித்³த⁴யே ॥31॥
ஸ்ரீஸத்யவர-து³க்³தா⁴ப்³தே⁴: உத்தி²தா ஜக³தீதலே ।
ஸுதா⁴ ஸ்ரீஸத்யத⁴ர்மாக்²யா பாவயேத் ஸ்மரத: ஸத: ॥32॥
ஸத்யத⁴ர்மாப்³தி⁴-ஸம்பூ⁴த: சிந்தாமணி-விஜ்ரும்பி⁴த:।
ஸத்யஸங்கல்ப-கல்பத்³ரு: கல்பயேத் காமது⁴க் மம ॥33॥
ஸத்யஸங்கல்ப-வார்த்⁴யுத்த²: ஸத்யஸந்துஷ்ட-சந்த்³ரமா: ।
ப்ரார்த்தி²தாஶேஷ-தா³தா ச ப⁴க்த-வ்ருந்த³ஸ்ய நித்யதா³ ॥34॥
ஸத்யஸந்துஷ்ட-து³க்³தா⁴ப்³தே⁴: ஜாத: ஸத்யபராயண: ।
சிந்தாமணி: ஸதா³ பூ⁴யாத் ஸதாம் சிந்தித-ஸித்³த⁴யே ॥35॥
ஸத்பராயண-து³க்³தா⁴ப்³தே⁴: ஸஞ்ஜாதா கீர்த்தி-காமதா³ ।
காமதே⁴னு: ஸத்யகாம-நாம்னீ பூ⁴யாத் ஸதாம் முதே³ ॥36॥
ஸத்யகாமார்ணவோத்³பூ⁴த: ஸ்ரீமத்ஸத்யேஷ்ட-ஸத்³கு³ரு: ।
ஸதாம் சிந்தாமணிரிவ சிந்திதார்த்த²-ப்ரதோ³ பு⁴வி ॥37॥
ஸத்யேஷ்டார்ய-ஸரின்-நாதா²த் உத்³பூ⁴த: அத்³பு⁴த-த³ர்ஶன: ।
நாஶயேத்³ ஹ்ருத³ய-த்⁴வாந்தம் ஸத்பராக்ரம-கௌஸ்துப⁴: ॥38॥
ஸத்பராக்ரம-து³க்³தா⁴ப்³தே⁴: ஸஞ்ஜாத: கீர்த்தி-சந்த்³ரக: ।
ஸந்தாபம் ஹரது ஸ்ரீமான் ஸத்யவீரேந்து³-ரஞ்ஜஸா ॥39॥
ஸத்யவீராலவாலோத்த²: விது³ஷாம் சிந்தித-ப்ரத³: ।
ஸத்யதீ⁴ராக்²ய-கல்பத்³ரு: பூ⁴யாத்³ இஷ்டார்த்த²-ஸித்³த⁴யே ॥40॥
ஸத்யதீ⁴ர-கராப்³ஜோத்த²: க்ஞான-வைராக்³ய-ஸாக³ர: ।
ஸத்யக்ஞானாக்²ய-தரணி: ஸ்வாந்த-த்⁴வாந்தம் நிக்ருந்தது ॥41॥
ஆஸேதோராதுஷாராத்³ரே: யோ தி³ஶோ ஜிதவான் முஹு: ।
ஸத்யத்⁴யான-கு³ரு: பாது யதீந்த்³ரைரபி பூஜித: ॥42 ॥
ப்ராவோசத்³யோऽதி⁴கம் ந்யாயஸுதா⁴-வாக்யார்த்த²-சந்த்³ரிகாம் ।
ஸத்யப்ரக்ஞ-கு³ரு: த³த்³யாத் ப்ரக்ஞாம் வைதா³ந்திகீம் ஸதா³ ॥43॥
வேங்கடேஶாத்³ரிம் ஆரப்⁴ய ஸேதும் தோதாத்³ரி-பூர்வகான் ।
க³த்வா தி³க்³விஜயீ பாது ஸத்யாபி⁴க்ஞ-கு³ரூத்தம: ॥44॥
ஸத்யாபி⁴க்ஞ-கராப்³ஜோத்தா²ன் பஞ்சாஶத்³-வர்ஷ-பூஜகான் ।
ஸத்யப்ரமோத³-தீர்த்தா²ர்யான் நௌமி ந்யாயஸுதா⁴-ரதான் ॥45॥
॥ இதி ஸ்ரீ குருபரம்பரா சரமஶ்லோகா: ॥