।। అథ శ్రీ గురుపరంపరా చరమశ్లోకాః ।।

బ్రహ్మాంతా గురవః సాక్షాదిష్టం దైవం శ్రియః పతిః ।
ఆచార్యాః శ్రీమదాచార్యాః సంతు మే జన్మజన్మని ॥౧॥

శ్రీహంసం పరమాత్మానం విరించిం సనకాదికాన్ ।
దూర్వాససో జ్ఞాననిధీన్ వీంద్రవాహనతీర్థకాన్ ॥౨॥

కైవల్యతీర్థాన్ జ్ఞానేశాన్ పరతీర్థాన్ నమామ్యహమ్ ।
సత్యప్రజ్ఞాన్ ప్రాజ్ఞతీర్థానన్యాన్ తద్వంశజానపి ॥౩॥

పురైవ కృష్ణాసిద్ధాన్నభుక్త్యా శోధితమానసమ్ ।
అచ్యుతప్రేక్షతీర్థంచ మధ్వార్యాణాం గురుం భజే ॥౪॥

లసతు శ్రీమదానందతీర్థేందుర్నో హృదంబరే ।
యద్వచశ్చంద్రికాస్వాంతసంతాపం వినికృంతతి ॥౫॥

పూర్ణప్రజ్ఞకృతం భాష్యం ఆదౌ తద్భావపూర్వకమ్ ।
యో వ్యాకరోన్నమస్తస్మై పద్మనాభాఖ్యయోగినే ॥౬॥

ససీతా మూలరామార్చా కోశే గజపతేః స్థితా ।
యేనానీతా నమస్తస్మై శ్రీమన్నృహరిభిక్షవే ॥౭॥

సాధితాఖిలసత్తత్త్వం బాధితాఖిలదుర్మతమ్ ।
బోధితాఖిలసన్మార్గం మాధవాఖ్యయతిం భజే ॥౮॥

యో విద్యారణ్యవిపినం తత్త్వమస్యసినాఽచ్ఛినత్ ।
శ్రీమదక్షోభ్యతీర్థార్యహంసేనం తం నమామ్యహమ్ ॥౯॥

యస్య వాక్ కామధేనుర్నః కామితార్థాన్ ప్రయచ్ఛతి ।
సేవే తం జయయోగీంద్రం కామబాణచ్ఛిదం సదా ॥౧౦॥

మాద్యదద్వైత్యంధకారప్రద్యోతనమహర్నిశమ్ ।
విద్యాధిరాజం సుగురుం ధ్యాయామి కరుణాకరమ్ ॥౧౧॥

వీంద్రారూఢపదాసక్తం రాజేంద్రమునిసేవితమ్ ।
శ్రీకవీంద్రమునిం వందే భజతాం చంద్రసన్నిభమ్ ॥౧౨॥

వాసుదేవపదద్వంద్వవారిజాసక్తమానసమ్ ।
పదవ్యాఖ్యానకుశలం వాగీశయతిమాశ్రయే ॥౧౩॥

ద్యుమణ్యభిజనాబ్జేందూ రామవ్యాసపదార్చకః ।
రామచంద్రగురుర్భూయాత్ కామితార్థప్రదాయకః ॥౧౪॥

యద్భక్త్యా మూలరామస్య పేటికా త్యక్తభూమికా ।
విద్యానిధిర్ధియం దద్యాత్ అష్టషష్ట్యబ్దపూజకః ॥౧౫॥

రఘునాథగురుం నౌమి విద్యానిధికరోద్భవమ్ ।
కూర్మో వరుణగంగే చ యస్య ప్రత్యక్షతాం గతాః ॥౧౬॥

మహాప్రవాహినీ భీమా యస్య మార్గమదాన్ముదా ।
రఘువర్యో ముదం దద్యాత్ కామితార్థప్రదాయకః ॥౧౭॥

భావబోధకృతం సేవే రఘూత్తమమహాగురుమ్ ।
యచ్ఛిష్యశిష్యశిష్యాద్యాః టిప్పణ్యాచార్యసంజ్ఞితాః ॥౧౮॥

న దగ్ధం యస్య కౌపీనం అగ్నౌ దత్తమపి స్ఫుటమ్ ।
వేదవ్యాసగురుం నౌమి శ్రీవేదేశనమస్కృతమ్ ॥౧౯॥

శ్రీమత్సుధాద్భుతాంబోధివిక్రీడనవిచక్షణాన్ ।
వాక్యార్థచంద్రికాకారాన్ విద్యాధీశగురూన్ భజే ॥౨౦॥

విద్యాధీశాబ్ధిసంభూతో విద్వత్కుముదబాంధవః ।
వేదనిధ్యాఖ్యచంద్రోఽయం కామితార్థాన్ ప్రయచ్ఛతు ॥౨౧॥

వేదనిధ్యాలవాలోత్థః విదుషాం చింతితప్రదః ।
సత్యవ్రతాఖ్యకల్పద్రుః భూయాదిష్టార్థసిద్ధయే ॥౨౨॥

అనధీత్య మహాభాష్యం వ్యాఖ్యాతం యదనుగ్రహాత్ ।
వందే తం విధినా సత్యనిధిం సజ్జ్ఞానసిద్ధయే ॥౨౩॥

సత్యనాథగురుః పాతు యో ధీరో నవచంద్రికామ్ ।
నవామృతగదాతీర్థతాండవాని వ్యచీక్లృపత్ ॥౨౪॥

సత్యనాథాబ్ధిసంభూతః సద్గోగణవిజృంభితః ।
సత్యాభినవతీర్థేందుః సంతాపాన్ హంతు సంతతమ్ । ౨౫॥

సత్యాభినవదుగ్ధాబ్ధేః సంజాతః సకలేష్టదః ।
శ్రీసత్యపూర్ణతీర్థేందుః సంతాపాన్ హంతు సంతతమ్ ॥౨౬॥

సత్యపూర్ణాంబుధేర్జాతో విద్వజ్జనవిజృంభితః ।
దనీధ్వంసీతు నస్తాపం శ్రీసత్యవిజయోడుపః ॥౨౭॥

శ్రీసత్యవిజయాంబోధేః జాతం సత్యప్రియామృతమ్ ।
జరామృతీ జంఘనీతు విబుధానాం ముదే సదా ॥౨౮॥

నైవేద్యగవిషం రామే వీక్ష్య తద్భుక్తిభాక్ గురుః ।
యోఽదర్శయద్రవిం రాత్రౌ సత్యబోధోఽస్తు మే ముదే ॥౨౯॥

విష్ణోః పదశ్రిత్ గోవ్రాతైః స్వాంతధ్వాంతనివారకః ।
శ్రీసత్యసంధసూర్యోఽయం భాసతాం నో హృదంబరే ॥౩౦॥

శ్రీసత్యసంధసింధూత్థః శ్రీసత్యవరచంద్రమాః ।
ప్రార్థితార్థప్రదో నిత్యం భూయః స్యాత్ ఇష్టసిద్ధయే ॥౩౧॥

శ్రీసత్యవరదుగ్ధాబ్ధేః ఉత్థితా జగతీతలే ।
సుధా శ్రీసత్యధర్మాఖ్యా పావయేత్ స్మరతస్సతః ॥౩౨॥

సత్యధర్మాబ్ధిసంభూతః చింతామణివిజృంభితః ।
సత్యసంకల్పకల్పద్రుః కల్పయేత్ కామధుక్ మమ ॥౩౩॥

సత్యసంకల్పవార్ధ్యుత్థః సత్యసంతుష్టచంద్రమాః ।
ప్రార్థితాశేషదాతా చ భక్తవృందస్య నిత్యదా ॥౩౪॥

సత్యసంతుష్టదుగ్ధాబ్ధేః జాతః సత్యపరాయణః ।
చింతామణిః సదా భూయాత్ సతాం చింతితసిద్ధయే ॥౩౫॥

సత్పరాయణదుగ్ధాబ్ధేః సంజాతా కీర్తికామదా ।
కామధేనుః సత్యకామనామ్నీ భూయాత్ సతాం ముదే ॥౩౬॥

సత్యకామార్ణవోద్భూతః శ్రీమత్సత్యేష్టసద్గురుః ।
సతాం చింతామణిరివ చింతితార్థప్రదో భువి ॥౩౭॥

సత్యేష్టార్యసరిన్నాథాదుద్భూతోఽద్భుతదర్శనః ।
నాశయేత్ హృదయధ్వాంతం సత్పరాక్రమకౌస్తుభః ॥౩౮॥

సత్పరాక్రమదుగ్ధాబ్ధేః సంజాతః కీర్తిచంద్రికః ।
సంతాపం హరతు శ్రీమాన్ సత్యవీరేందురంజసా ॥౩౯॥

సత్యవీరాలవాలోత్థో విదుషాం చింతితప్రదః ।
సత్యధీరాఖ్యకల్పద్రుః భూయాదిష్టార్థసిద్ధయే ॥౪౦॥

సత్యధీరకరాబ్జోత్థో జ్ఞానవైరాగ్యసాగరః ।
సత్యజ్ఞానాఖ్యతరణిః స్వాంతధ్వాంతం నికృంతతు ॥౪౧॥

ఆసేతోరాతుషారాద్రేః యో దిశో జితవాన్ ముహుః ।
సత్యధ్యానగురుః పాతు యతీంద్రైరపి పూజితః ॥౪౨॥

ప్రావోచద్యోఽధికం న్యాయసుధావాక్యార్థచంద్రికామ్ ।
సత్యప్రజ్ఞగురుర్దద్యాత్ ప్రజ్ఞాం వైదాంతికీమ్ సదా ॥౪౩॥

వేంకటేశాద్రిమారభ్య సేతుం తోతాద్రిపూర్వకాన్ ।
గత్వా దిగ్విజయీ పాతు సత్యాభిజ్ఞగురూత్తమః ॥౪౪॥

సత్యాభిజ్ఞకరాబ్జోత్థాన్ పంచాశద్వర్షపూజకాన్ ।
సత్యప్రమోదతీర్థార్యాన్ నౌమి న్యాయసుధారతాన్ ॥౪౫॥