|| atha shrI guruparaMparA charamashlokAH ||

brahmAMtA guravaH sAkShAdiShTaM daivaM shriyaH patiH |
AchAryAH shrImadAchAryAH saMtu me janmajanmani ||1||

shrIhaMsaM paramAtmAnaM viriMchiM sanakAdikAn |
dUrvAsaso j~nAnanidhIn vIMdravAhanatIrthakAn ||2||

kaivalyatIrthAn j~nAneshAn paratIrthAn namAmyaham |
satyapraj~nAn prAj~natIrthAnanyAn tadvaMshajAnapi ||3||

puraiva kRRiShNAsiddhAnnabhuktyA shodhitamAnasam |
achyutaprekShatIrthaMcha madhvAryANAM guruM bhaje ||4||

lasatu shrImadAnaMdatIrtheMdurno hRRidaMbare |
yadvachashchaMdrikAsvAMtasaMtApaM vinikRRiMtati ||5||

pUrNapraj~nakRRitaM bhAShyaM Adau tadbhAvapUrvakam |
yo vyAkaronnamastasmai padmanAbhAkhyayogine ||6||

sasItA mUlarAmArchA koshe gajapateH sthitA |
yenAnItA namastasmai shrImannRRiharibhikShave ||7||

sAdhitAkhilasattattvaM bAdhitAkhiladurmatam |
bodhitAkhilasanmArgaM mAdhavAkhyayatiM bhaje ||8||

yo vidyAraNyavipinaM tattvamasyasinA.achChinat |
shrImadakShobhyatIrthAryahaMsenaM taM namAmyaham ||9||

yasya vAk kAmadhenurnaH kAmitArthAn prayachChati |
seve taM jayayogIMdraM kAmabANachChidaM sadA ||10||

mAdyadadvaityaMdhakArapradyotanamaharnisham |
vidyAdhirAjaM suguruM dhyAyAmi karuNAkaram ||11||

vIMdrArUDhapadAsaktaM rAjeMdramunisevitam |
shrIkavIMdramuniM vaMde bhajatAM chaMdrasannibham ||12||

vAsudevapadadvaMdvavArijAsaktamAnasam |
padavyAkhyAnakushalaM vAgIshayatimAshraye ||13||

dyumaNyabhijanAbjeMdU rAmavyAsapadArchakaH |
rAmachaMdragururbhUyAt kAmitArthapradAyakaH ||14||

yadbhaktyA mUlarAmasya peTikA tyaktabhUmikA |
vidyAnidhirdhiyaM dadyAt aShTaShaShTyabdapUjakaH ||15||

raghunAthaguruM naumi vidyAnidhikarodbhavam |
kUrmo varuNagaMge cha yasya pratyakShatAM gatAH ||16||

mahApravAhinI bhImA yasya mArgamadAnmudA |
raghuvaryo mudaM dadyAt kAmitArthapradAyakaH ||17||

bhAvabodhakRRitaM seve raghUttamamahAgurum |
yachChiShyashiShyashiShyAdyAH TippaNyAchAryasaMj~nitAH ||18||

na dagdhaM yasya kaupInaM agnau dattamapi sphuTam |
vedavyAsaguruM naumi shrIvedeshanamaskRRitam ||19||

shrImatsudhAdbhutAMbodhivikrIDanavichakShaNAn |
vAkyArthachaMdrikAkArAn vidyAdhIshagurUn bhaje ||20||

vidyAdhIshAbdhisaMbhUto vidvatkumudabAMdhavaH |
vedanidhyAkhyachaMdro.ayaM kAmitArthAn prayachChatu ||21||

vedanidhyAlavAlotthaH viduShAM chiMtitapradaH |
satyavratAkhyakalpadruH bhUyAdiShTArthasiddhaye ||22||

anadhItya mahAbhAShyaM vyAkhyAtaM yadanugrahAt |
vaMde taM vidhinA satyanidhiM sajj~nAnasiddhaye ||23||

satyanAthaguruH pAtu yo dhIro navachaMdrikAm |
navAmRRitagadAtIrthatAMDavAni vyachIklRRipat ||24||

satyanAthAbdhisaMbhUtaH sadgogaNavijRRiMbhitaH |
satyAbhinavatIrtheMduH saMtApAn haMtu saMtatam | 25||

satyAbhinavadugdhAbdheH saMjAtaH sakaleShTadaH |
shrIsatyapUrNatIrtheMduH saMtApAn haMtu saMtatam ||26||

satyapUrNAMbudherjAto vidvajjanavijRRiMbhitaH |
danIdhvaMsItu nastApaM shrIsatyavijayoDupaH ||27||

shrIsatyavijayAMbodheH jAtaM satyapriyAmRRitam |
jarAmRRitI jaMghanItu vibudhAnAM mude sadA ||28||

naivedyagaviShaM rAme vIkShya tadbhuktibhAk guruH |
yo.adarshayadraviM rAtrau satyabodho.astu me mude ||29||

viShNoH padashrit govrAtaiH svAMtadhvAMtanivArakaH |
shrIsatyasaMdhasUryo.ayaM bhAsatAM no hRRidaMbare ||30||

shrIsatyasaMdhasiMdhUtthaH shrIsatyavarachaMdramAH |
prArthitArthaprado nityaM bhUyaH syAt iShTasiddhaye ||31||

shrIsatyavaradugdhAbdheH utthitA jagatItale |
sudhA shrIsatyadharmAkhyA pAvayet smaratassataH ||32||

satyadharmAbdhisaMbhUtaH chiMtAmaNivijRRiMbhitaH |
satyasaMkalpakalpadruH kalpayet kAmadhuk mama ||33||

satyasaMkalpavArdhyutthaH satyasaMtuShTachaMdramAH |
prArthitAsheShadAtA cha bhaktavRRiMdasya nityadA ||34||

satyasaMtuShTadugdhAbdheH jAtaH satyaparAyaNaH |
chiMtAmaNiH sadA bhUyAt satAM chiMtitasiddhaye ||35||

satparAyaNadugdhAbdheH saMjAtA kIrtikAmadA |
kAmadhenuH satyakAmanAmnI bhUyAt satAM mude ||36||

satyakAmArNavodbhUtaH shrImatsatyeShTasadguruH |
satAM chiMtAmaNiriva chiMtitArthaprado bhuvi ||37||

satyeShTAryasarinnAthAdudbhUto.adbhutadarshanaH |
nAshayet hRRidayadhvAMtaM satparAkramakaustubhaH ||38||

satparAkramadugdhAbdheH saMjAtaH kIrtichaMdrikaH |
saMtApaM haratu shrImAn satyavIreMduraMjasA ||39||

satyavIrAlavAlottho viduShAM chiMtitapradaH |
satyadhIrAkhyakalpadruH bhUyAdiShTArthasiddhaye ||40||

satyadhIrakarAbjottho j~nAnavairAgyasAgaraH |
satyaj~nAnAkhyataraNiH svAMtadhvAMtaM nikRRiMtatu ||41||

AsetorAtuShArAdreH yo disho jitavAn muhuH |
satyadhyAnaguruH pAtu yatIMdrairapi pUjitaH ||42||

prAvochadyo.adhikaM nyAyasudhAvAkyArthachaMdrikAm |
satyapraj~nagururdadyAt praj~nAM vaidAMtikIm sadA ||43||

veMkaTeshAdrimArabhya setuM totAdripUrvakAn |
gatvA digvijayI pAtu satyAbhij~nagurUttamaH ||44||

satyAbhij~nakarAbjotthAn paMchAshadvarShapUjakAn |
satyapramodatIrthAryAn naumi nyAyasudhAratAn ||45||

|| iti shrI guruparaMparA charamashlokAH ||