॥ అథ బ్రహ్మసూత్రాణుభాష్యమ్ చతుర్థోఽధ్యాయః ॥

విష్ణుర్బ్రహ్మ తథా దాతేత్యేవం నిత్యముపాసనమ్ ।
కార్యమాపద్యపి బ్రహ్మ తేన యాత్యపరోక్షతామ్ ॥౧॥

ప్రారబ్ధకర్మణోఽన్యస్య జ్ఞానాదేవ పరిక్షయః ।
అనిష్టస్యోభయస్యాపి సర్వస్యాన్యస్య భోగతః ॥౨॥

ఉత్తరేషూత్తరేష్వేవం యావద్వాయుం విముక్తిగాః ।
ప్రవిశ్య భుంజతే భోగాంస్తదంతర్బహిరేవ వా ॥౩॥

వాయుర్విష్ణుం ప్రవిశ్యైవ భోగశ్చైవోత్తరోత్తరమ్ ।
ఉత్క్రమ్య మానుషా ముక్తిం యాంతి దేహక్షయాత్ సురాః ॥౪॥

అర్చిరాదిపథా వాయుం ప్రాప్య తేన జనార్దనమ్ ।
యాంత్యుత్తమా నరోచ్చాద్యా బ్రహ్మలోకాత్ సహామునా ॥౫॥

యథాసంకల్పభోగాశ్చ చిదానందశరీరిణః ।
జగత్సృష్ట్యాదివిషయే మహాసామర్థ్యమప్యృతే ॥౬॥

యథేష్టశక్తిమంతశ్చ వినా స్వాభావికోత్తమాన్ ।
అనన్యవశగాశ్చైవ వృద్ధిహ్రాసవివర్జితాః ।
దుఃఖాదిరహితా నిత్యం మోదంతేఽవిరతం సుఖమ్ ॥౭॥

పూర్ణప్రజ్ఞేన మునినా సర్వశాస్త్రార్థసంగ్రహః ।
కృతోఽయం ప్రీయతాం తేన పరమాత్మా రమాపతిః ॥౮॥

నమో నమోశేషదోషదూరపూర్ణగుణాత్మనే ।
విరించిశర్వపూర్వేడ్య వంద్యాయ శ్రీవరాయ తే ॥౯॥

॥ ఇతి శ్రీమదానందతీర్థభగవత్పాదాచార్య విరచితే బ్రహ్మసూత్రాణుభాష్యే చతుర్థోఽధ్యాయః ॥