|| atha brahmasUtrANubhAShyam chaturtho.adhyAyaH ||

viShNurbrahma tathA dAtetyevaM nityamupAsanam |
kAryamApadyapi brahma tena yAtyaparokShatAm ||1||

prArabdhakarmaNo.anyasya j~nAnAdeva parikShayaH |
aniShTasyobhayasyApi sarvasyAnyasya bhogataH ||2||

uttareShUttareShvevaM yAvadvAyuM vimuktigAH |
pravishya bhuMjate bhogAMstadaMtarbahireva vA ||3||

vAyurviShNuM pravishyaiva bhogashchaivottarottaram |
utkramya mAnuShA muktiM yAMti dehakShayAt surAH ||4||

archirAdipathA vAyuM prApya tena janArdanam |
yAMtyuttamA narochchAdyA brahmalokAt sahAmunA ||5||

yathAsaMkalpabhogAshcha chidAnaMdasharIriNaH |
jagatsRRiShTyAdiviShaye mahAsAmarthyamapyRRite ||6||

yatheShTashaktimaMtashcha vinA svAbhAvikottamAn |
ananyavashagAshchaiva vRRiddhihrAsavivarjitAH |
duHkhAdirahitA nityaM modaMte.avirataM sukham ||7||

pUrNapraj~nena muninA sarvashAstrArthasaMgrahaH |
kRRito.ayaM prIyatAM tena paramAtmA ramApatiH ||8||

namo namosheShadoShadUrapUrNaguNAtmane |
viriMchisharvapUrveDya vaMdyAya shrIvarAya te ||9||

|| iti shrImadAnaMdatIrthabhagavatpAdAchArya virachite brahmasUtrANubhAShye chaturtho.adhyAyaH ||