॥ అథ బ్రహ్మసూత్రాణుభాష్యమ్ తృతీయోఽధ్యాయః ॥

శుభేన కర్మణా స్వర్గం నిరయం చ వికర్మణా ।
మిథ్యాజ్ఞానేన చ తమో జ్ఞానేనైవ పరం పదమ్ ॥౧॥

యాతి తస్మాద్విరక్తః సన్ జ్ఞానమేవ సమాశ్రయేత్ ।
సర్వావస్థాప్రేరకశ్చ సర్వరూపేష్వభేదవాన్ ॥౨॥

సర్వదేశేషు కాలేషు స ఏకః పరమేశ్వరః ।
తద్భక్తితారతమ్యేన తారతమ్యం విముక్తిగమ్ ॥౩॥

సచ్చిదానంద ఆత్మేతి మానుషైస్తు సురేశ్వరైః ।
యథాక్రమం బహుగుణైః బ్రహ్మణా త్వఖిలైర్గుణైః ॥౪॥

ఉపాస్యః సర్వవేదైశ్చ సర్వైరపి యథాబలమ్ ।
జ్ఞేయో విష్ణుర్విశేషస్తు జ్ఞానే స్యాదుత్తరోత్తరమ్ ॥౫॥

సర్వేపి పురుషార్థాః స్యుర్జ్ఞానాదేవ న సంశయః ।
న లిప్యతే జ్ఞానవాంశ్చ సర్వదోషైరపి క్వచిత్ ॥౬॥

గుణదోషైః సుఖస్యాపి వృద్ధిహ్రాసౌ విముక్తిగౌ ।
నృణాం సురాణాం ముక్తౌ తు సుఖం క్లృప్తం యథాక్రమమ్ ॥౭॥

॥ ఇతి బ్రహ్మసూత్రాణుభాష్యే తృతీయోఽధ్యాయః ॥