|| atha brahmasUtrANubhAShyam tRRitIyo.adhyAyaH ||

shubhena karmaNA svargaM nirayaM cha vikarmaNA |
mithyAj~nAnena cha tamo j~nAnenaiva paraM padam ||1||

yAti tasmAdviraktaH san j~nAnameva samAshrayet |
sarvAvasthAprerakashcha sarvarUpeShvabhedavAn ||2||

sarvadesheShu kAleShu sa ekaH parameshvaraH |
tadbhaktitAratamyena tAratamyaM vimuktigam ||3||

sachchidAnaMda Atmeti mAnuShaistu sureshvaraiH |
yathAkramaM bahuguNaiH brahmaNA tvakhilairguNaiH ||4||

upAsyaH sarvavedaishcha sarvairapi yathAbalam |
j~neyo viShNurvisheShastu j~nAne syAduttarottaram ||5||

sarvepi puruShArthAH syurj~nAnAdeva na saMshayaH |
na lipyate j~nAnavAMshcha sarvadoShairapi kvachit ||6||

guNadoShaiH sukhasyApi vRRiddhihrAsau vimuktigau |
nRRiNAM surANAM muktau tu sukhaM klRRiptaM yathAkramam ||7||

|| iti brahmasUtrANubhAShye tRRitIyo.adhyAyaH ||