अथ श्री भूवराहाष्टोत्तरस्तवः
श्वेतं सुदर्शनदरांकितबाहुयुग्मं |

दंष्ट्राकरालवदनं धरया समेतम् || १||

ब्रह्मादिभिः सुरगणैः परिसेव्यमाणं |

ध्यायेद्वराहवपुषं निगमैकवेद्यम् || २||

श्रीवराहो महीनाथः पूर्णानंदो जगत्पतिः |

निर्गुणो निष्कलोऽनंतो दंडकांतकृदव्ययः || ३||

हिरण्याक्षांतकृद्देवः पूर्णषाड्गुण्यविग्रहः |

लयोदधिविहारी च सर्वप्राणिहितेरतः || ४||

अनंतरूपोऽनंतश्रीर्जितमन्युर्भयापहः |

वेदांतवेद्यो वेदि च वेदगर्भः सनातनः || ५||

सहस्राक्षः पुण्यगंधः कल्पकृत् क्षितिभृद्धरिः |

पद्मनाभः सुराध्यक्षो हेमांगो दक्षिणामुखः || ६||

महाकोलो महाबाहुः सर्वदेवनमस्क्रतः |

हृषीकेशः प्रसन्नात्मा सर्वभक्तभयापहः || ७||

यज्ञकृद्यज्ञभृत् साक्षी यज्ञांगो यज्ञवाहनः |

हव्यभुग् हव्यदेहश्च सदाऽव्यक्तः कृपाकरः || ८||

देवहूतिर्गुरुः कांतो धर्मगुह्यो वृषाकपिः |

स्रवत्तुंडो वक्रतुंडो नीलकेशो महाबलः || ९||

पूतात्मा वेदनेता च वेदहर्तृशिरोहरः |

वेदांतविद्वेदगुह्यः सर्ववेदप्रवर्तकः || १०||

गंभीराक्षस्त्रिधामा च गंभीरात्माऽमरेश्वरः |

आनंदवनगो दिव्यो ब्रह्मनासासमुद्भवः || ११||

सिंधुतीरनिवासी च क्षेमकृत् सात्वतां पतिः |

इंद्रत्राता जगत्त्राता चेंद्रदोर्दंडगर्वहा || १२||

भक्तवश्यः सदाव्यक्तो निजानंदो रमापतिः |

श्रुतिप्रियः शुभांगश्च पुण्यश्रवणकीर्तनः || १३||

सत्यकृत् सत्यसंकल्पः सत्यवाक् सत्यविक्रमः |

सत्येनिगूढः सत्यात्मा कालातीतो गुणातीगः || १४||

परंज्योतिः परंधाम परमः पुरुषः परः |

कल्याणकृत् कविः कर्ता कर्मसाक्षी जितेंद्रियः || १५||

कर्मकृत् कर्मकांडस्य संप्रदायप्रवर्तकः |

सर्वांतगः सर्वगश्च सर्वदः सर्वभक्षकः || १६||

सर्वलोकपतिः श्रीमान् श्रीमुष्णेशः शुभेक्षणः |

सर्वसाक्षी सर्वदेवप्रियः सर्वेश्वरो हरिः || १७||

अष्टोत्तरशतं पुण्यं वराहस्य महात्मनः |

सर्ववेदाधिकं सर्वकामदं सततं जपेत् || १८||

सततं प्रातरुत्थाय सम्यगाचम्य वारिणा |

कृतासनो जितक्रोधः पश्चान्मंत्रमुदीरयेत् || १९||

ब्राह्मणो ब्रह्मविद्यां च क्षत्रियो राज्यमाप्नुयात् |

भुक्तिं मुक्तिं च लभते श्रीवराहप्रसादतः || २०||

|| इति श्रीवराहपुराणे श्रीमुष्णमाहात्म्ये धरणीवराहसंवादे श्रीभूवराहाष्टोत्तरस्तवः ||