అథ భాగీరథీగద్యం
శ్రీశుక ఉవాచ
తత్ర భగవతః సాక్షాద్ యజ్ఞలింగస్య విష్ణోర్విక్రమతో |
వామపా-దాంగుష్ఠనఖనిర్భిన్నోర్ధ్వాండకటాహవివరేణ |
అంతఃప్రవిష్టా యా బాహ్యజలధారా |
తచ్చరణపంకజావనేజనారుణకింజల్కోపరంజిత-అఖిలజగదఘమలాపహా |
ఉపస్పర్శనామలా సాక్షాత్ భగవత్పదీత్య-నుపలక్షితవచోభిరభిధీయమానా|
అతిమహతా కాలేన యుగ-సహస్త్రోపలక్షణేన దివో మూర్ధన్యవతతార యత్తద్విష్ణుపదమాహుః ||

యత్ర హ వావ వీరవ్రత ఔత్తానపాదిః పరమభాగవతః|
అస్మత్కుల-దేవతాచరణారవిందోదకం ఇతి|
యాం అనుసవనముత్కృష్యమాణ-భగవద్భక్తియోగేన దృఢం క్లిద్యమానాంతర్హృదయ|
ఔత్కంఠ్యవివశామీలితలోచనయుగలకుడ్మలవిగలితామలబాష్పకలయా|
అభివ్యజ్యమాన-రోమపులకకులక|
అధునాపి పరమాదరేణ శిరసా బిభర్తి ||1||

తత్ర సప్తఋషయస్తత్ప్రభావజ్ఞా నను (ఇయం ను) తపస ఆత్యంతికీ సిద్ధిరేతావతీతి |
భగవతి సర్వాత్మని వాసుదేవే అనవరతభక్తియోగ-లాభేనైవ |
ఉపేక్షితాన్యార్థాత్మగతయో|
ముక్తిమివాగతాం ముముక్షవః సబహుమానమేనామద్యాపి జటాజూటైరుద్వహంతి ||2||

తతః అనేకసహస్రకోటివిమానానీకసంకులదేవయానేన అవతరంతీ|
ఇందుమండలమాప్లావ్య బ్రహ్మసదనే నిపతతి|
తత్ర చతుర్ధా భిద్యమానా చతుర్భిర్నామభిశ్చతుర్దిశమభిస్యందతీ|
నదనదీపతిమేవాభినివిశతే|
‘సీతా అలకనందా చక్షుః భద్రా’ ఇతి ||3||

సీతా తు బ్రహ్మసదనాత్ కేసరాద్రిశిఖరేభ్యోఽధోఽధఃపతంతీ<
గంధమాదనమూర్ధ్ని పతిత్వాంతరేణ భద్రాశ్వం వర్షం ప్రాచ్యాం దిశి క్షారసముద్రం ప్రవిశతి|
ఏవం మాల్యవచ్ఛిఖరాన్నిష్పతంతీ అనుపరతవేగా|
కేతుమాలమభి చక్షుః ప్రతీచ్యాం దిశి సరిత్పతిం ప్రవిశతి |
భద్రా చోత్తరతో మేరుశిరసో నిపతితా గిరిశిఖరాత్ గిరిశిఖరమతిహాయ|
శృంగవతః శృంగాదభిస్యందమానా ఉత్తరాంస్తు కురూన్ అతిక్రమ్య |
ఉదీచ్యాం దిశి లవణార్ణవం ప్రవిశతి |
తథైవాలకనందా దక్షిణేన తు బ్రహ్మసదనాద్ బహూని గిరికూటాన్యతిక్రమ్య|
హేమకూటహిమకూటాని అతితరరభసరంహసా లుఠంతీ|
భారతమేవ వర్షం దక్షిణస్యాం దిశి జలధిం ప్రవిశతి || 4||

|| ఇతి భాగవతే పంచమస్కంధే భాగీరథీగద్యం ||