ಅಥ ಭಾಗೀರಥೀಗದ್ಯಂ
ಶ್ರೀಶುಕ ಉವಾಚ
ತತ್ರ ಭಗವತಃ ಸಾಕ್ಷಾದ್ ಯಜ್ಞಲಿಂಗಸ್ಯ ವಿಷ್ಣೋರ್ವಿಕ್ರಮತೋ |
ವಾಮಪಾ-ದಾಂಗುಷ್ಠನಖನಿರ್ಭಿನ್ನೋರ್ಧ್ವಾಂಡಕಟಾಹವಿವರೇಣ |
ಅಂತಃಪ್ರವಿಷ್ಟಾ ಯಾ ಬಾಹ್ಯಜಲಧಾರಾ |
ತಚ್ಚರಣಪಂಕಜಾವನೇಜನಾರುಣಕಿಂಜಲ್ಕೋಪರಂಜಿತ-ಅಖಿಲಜಗದಘಮಲಾಪಹಾ |
ಉಪಸ್ಪರ್ಶನಾಮಲಾ ಸಾಕ್ಷಾತ್ ಭಗವತ್ಪದೀತ್ಯ-ನುಪಲಕ್ಷಿತವಚೋಭಿರಭಿಧೀಯಮಾನಾ|
ಅತಿಮಹತಾ ಕಾಲೇನ ಯುಗ-ಸಹಸ್ತ್ರೋಪಲಕ್ಷಣೇನ ದಿವೋ ಮೂರ್ಧನ್ಯವತತಾರ ಯತ್ತದ್ವಿಷ್ಣುಪದಮಾಹುಃ ||

ಯತ್ರ ಹ ವಾವ ವೀರವ್ರತ ಔತ್ತಾನಪಾದಿಃ ಪರಮಭಾಗವತಃ|
ಅಸ್ಮತ್ಕುಲ-ದೇವತಾಚರಣಾರವಿಂದೋದಕಂ ಇತಿ|
ಯಾಂ ಅನುಸವನಮುತ್ಕೃಷ್ಯಮಾಣ-ಭಗವದ್ಭಕ್ತಿಯೋಗೇನ ದೃಢಂ ಕ್ಲಿದ್ಯಮಾನಾಂತರ್ಹೃದಯ|
ಔತ್ಕಂಠ್ಯವಿವಶಾಮೀಲಿತಲೋಚನಯುಗಲಕುಡ್ಮಲವಿಗಲಿತಾಮಲಬಾಷ್ಪಕಲಯಾ|
ಅಭಿವ್ಯಜ್ಯಮಾನ-ರೋಮಪುಲಕಕುಲಕ|
ಅಧುನಾಪಿ ಪರಮಾದರೇಣ ಶಿರಸಾ ಬಿಭರ್ತಿ ||1||

ತತ್ರ ಸಪ್ತಋಷಯಸ್ತತ್ಪ್ರಭಾವಜ್ಞಾ ನನು (ಇಯಂ ನು) ತಪಸ ಆತ್ಯಂತಿಕೀ ಸಿದ್ಧಿರೇತಾವತೀತಿ |
ಭಗವತಿ ಸರ್ವಾತ್ಮನಿ ವಾಸುದೇವೇ ಅನವರತಭಕ್ತಿಯೋಗ-ಲಾಭೇನೈವ |
ಉಪೇಕ್ಷಿತಾನ್ಯಾರ್ಥಾತ್ಮಗತಯೋ|
ಮುಕ್ತಿಮಿವಾಗತಾಂ ಮುಮುಕ್ಷವಃ ಸಬಹುಮಾನಮೇನಾಮದ್ಯಾಪಿ ಜಟಾಜೂಟೈರುದ್ವಹಂತಿ ||2||

ತತಃ ಅನೇಕಸಹಸ್ರಕೋಟಿವಿಮಾನಾನೀಕಸಂಕುಲದೇವಯಾನೇನ ಅವತರಂತೀ|
ಇಂದುಮಂಡಲಮಾಪ್ಲಾವ್ಯ ಬ್ರಹ್ಮಸದನೇ ನಿಪತತಿ|
ತತ್ರ ಚತುರ್ಧಾ ಭಿದ್ಯಮಾನಾ ಚತುರ್ಭಿರ್ನಾಮಭಿಶ್ಚತುರ್ದಿಶಮಭಿಸ್ಯಂದತೀ|
ನದನದೀಪತಿಮೇವಾಭಿನಿವಿಶತೇ|
‘ಸೀತಾ ಅಲಕನಂದಾ ಚಕ್ಷುಃ ಭದ್ರಾ’ ಇತಿ ||3||

ಸೀತಾ ತು ಬ್ರಹ್ಮಸದನಾತ್ ಕೇಸರಾದ್ರಿಶಿಖರೇಭ್ಯೋಽಧೋಽಧಃಪತಂತೀ<
ಗಂಧಮಾದನಮೂರ್ಧ್ನಿ ಪತಿತ್ವಾಂತರೇಣ ಭದ್ರಾಶ್ವಂ ವರ್ಷಂ ಪ್ರಾಚ್ಯಾಂ ದಿಶಿ ಕ್ಷಾರಸಮುದ್ರಂ ಪ್ರವಿಶತಿ|
ಏವಂ ಮಾಲ್ಯವಚ್ಛಿಖರಾನ್ನಿಷ್ಪತಂತೀ ಅನುಪರತವೇಗಾ|
ಕೇತುಮಾಲಮಭಿ ಚಕ್ಷುಃ ಪ್ರತೀಚ್ಯಾಂ ದಿಶಿ ಸರಿತ್ಪತಿಂ ಪ್ರವಿಶತಿ |
ಭದ್ರಾ ಚೋತ್ತರತೋ ಮೇರುಶಿರಸೋ ನಿಪತಿತಾ ಗಿರಿಶಿಖರಾತ್ ಗಿರಿಶಿಖರಮತಿಹಾಯ|
ಶೃಂಗವತಃ ಶೃಂಗಾದಭಿಸ್ಯಂದಮಾನಾ ಉತ್ತರಾಂಸ್ತು ಕುರೂನ್ ಅತಿಕ್ರಮ್ಯ |
ಉದೀಚ್ಯಾಂ ದಿಶಿ ಲವಣಾರ್ಣವಂ ಪ್ರವಿಶತಿ |
ತಥೈವಾಲಕನಂದಾ ದಕ್ಷಿಣೇನ ತು ಬ್ರಹ್ಮಸದನಾದ್ ಬಹೂನಿ ಗಿರಿಕೂಟಾನ್ಯತಿಕ್ರಮ್ಯ|
ಹೇಮಕೂಟಹಿಮಕೂಟಾನಿ ಅತಿತರರಭಸರಂಹಸಾ ಲುಠಂತೀ|
ಭಾರತಮೇವ ವರ್ಷಂ ದಕ್ಷಿಣಸ್ಯಾಂ ದಿಶಿ ಜಲಧಿಂ ಪ್ರವಿಶತಿ || 4||

|| ಇತಿ ಭಾಗವತೇ ಪಂಚಮಸ್ಕಂಧೇ ಭಾಗೀರಥೀಗದ್ಯಂ ||