atha bhAgIrathIgadyaM
shrIshuka uvAcha
tatra bhagavataH sAkShAd yaj~naliMgasya viShNorvikramato |
vAmapA-dAMguShThanakhanirbhinnordhvAMDakaTAhavivareNa |
aMtaHpraviShTA yA bAhyajaladhArA |
tachcharaNapaMkajAvanejanAruNakiMjalkoparaMjita-akhilajagadaghamalApahA |
upasparshanAmalA sAkShAt bhagavatpadItya-nupalakShitavachobhirabhidhIyamAnA|
atimahatA kAlena yuga-sahastropalakShaNena divo mUrdhanyavatatAra yattadviShNupadamAhuH ||

yatra ha vAva vIravrata auttAnapAdiH paramabhAgavataH|
asmatkula-devatAcharaNAraviMdodakaM iti|
yAM anusavanamutkR^iShyamANa-bhagavadbhaktiyogena dR^iDhaM klidyamAnAMtarhR^idaya|
autkaMThyavivashAmIlitalochanayugalakuDmalavigalitAmalabAShpakalayA|
abhivyajyamAna-romapulakakulaka|
adhunApi paramAdareNa shirasA bibharti ||1||

tatra saptaR^iShayastatprabhAvaj~nA nanu (iyaM nu) tapasa AtyaMtikI siddhiretAvatIti |
bhagavati sarvAtmani vAsudeve anavaratabhaktiyoga-lAbhenaiva |
upekShitAnyArthAtmagatayo|
muktimivAgatAM mumukShavaH sabahumAnamenAmadyApi jaTAjUTairudvahaMti ||2||

tataH anekasahasrakoTivimAnAnIkasaMkuladevayAnena avataraMtI|
iMdumaMDalamAplAvya brahmasadane nipatati|
tatra chaturdhA bhidyamAnA chaturbhirnAmabhishchaturdishamabhisyaMdatI|
nadanadIpatimevAbhinivishate|
‘sItA alakanaMdA chakShuH bhadrA’ iti ||3||

sItA tu brahmasadanAt kesarAdrishikharebhyo.adho.adhaHpataMtI<
gaMdhamAdanamUrdhni patitvAMtareNa bhadrAshvaM varShaM prAchyAM dishi kShArasamudraM pravishati|
evaM mAlyavachChikharAnniShpataMtI anuparatavegA|
ketumAlamabhi chakShuH pratIchyAM dishi saritpatiM pravishati |
bhadrA chottarato merushiraso nipatitA girishikharAt girishikharamatihAya|
shR^iMgavataH shR^iMgAdabhisyaMdamAnA uttarAMstu kurUn atikramya |
udIchyAM dishi lavaNArNavaM pravishati |
tathaivAlakanaMdA dakShiNena tu brahmasadanAd bahUni girikUTAnyatikramya|
hemakUTahimakUTAni atitararabhasaraMhasA luThaMtI|
bhAratameva varShaM dakShiNasyAM dishi jaladhiM pravishati || 4||

|| iti bhAgavate paMchamaskaMdhe bhAgIrathIgadyaM ||