atha bhagavaddhyānam
sañcintayēdbhagavataścaraṇāravindaṁ
vajrāṅkuśadhvajasarōruhalāñchanāḍhyam |
uttuṅgaraktavilasannakhacakravāla
jyōtsnābhirāhatamahaddhr̥dayāndhakāram ||1 ||
yacchaucaniḥsr̥tasaritpravarōdakēna
tīrthēna mūrdhnyadhikr̥tēna śivaḥ śivō’bhūt |
dhyāturmanaḥśamalaśailanisr̥ṣṭavajraṁ
dhyāyēcciraṁ bhagavataścaraṇāravindam ||2||
ūrū suparṇabhujayōradhi śōbhamānāv
ōjōnidhī atasikākusumāvabhāsau |
vyālambipītavaravāsasi vartamāna
kāñcīkalāpaparirambhi nitambabimbam ||3||
nābhihradaṁ bhuvanakōśaguhōdarasthaṁ
yatrātmayōnidhiṣaṇākhilalōkapadmam |
vyūḍhaṁ harinmaṇivr̥ṣastanayōramuṣya
dhyāyēddvayaṁ viśadahāramayūkhagauram ||4||
vakṣō’dhivāsamr̥ṣabhasya mahāvibhūtēḥ
puṁsāṁ manōnayananirvr̥timādadhānam |
kaṇṭhaṁ ca kaustubhamaṇēradhibhūṣaṇārthaṁ
kuryānmanasyakhilalōkanamaskr̥tasya ||5||
bāhūṁśca mandaragirēḥ parivartanēna
nirṇiktabāhuvalayānadhilōkapālān |
sañcintayēddaśaśatāramasahyatējaḥ
śaṅkhaṁ ca tatkarasarōruharājahaṁsam ||6||
kaumōdakīṁ bhagavatō dayitāṁ smarēta
digdhāmarātibhaṭaśōṇitakardamēna |
mālāṁ madhuvratavarūthagirōpaghuṣṭāṁ
caityasya tattvamamalaṁ maṇimasya kaṇṭhē ||7||
bhr̥tyānukampitadhiyēha gr̥hītamūrtēḥ
sañcintayēdbhagavatō vadanāravindam |
yadvisphuranmakarakuṇḍalavalgitēna
vidyōtitāmalakapōlamudāranāsam ||8||
yacchrīnikētamalibhiḥ parisēvyamānaṁ
bhūtyā svayā kuṭilakuntalavr̥ndajuṣṭam |
mīnadvayāśrayamadhikṣipadabjanētraṁ
dhyāyēnmanōmayamatandrita ullasadbhru ||9||
tasyāvalōkamadhikaṁ kr̥payātighōra
tāpatrayōpaśamanāya nisr̥ṣṭamakṣṇōḥ |
snigdhasmitānuguṇitaṁ vipulaprasādaṁ
dhyāyēcciraṁ vipulabhāvanayā guhāyām ||10||
hāsaṁ harēravanatākhilalōkatīvra
śōkāśrusāgaraviśōṣaṇamatyudāram |
sammōhanāya racitaṁ nijamāyayāsya
bhrūmaṇḍalaṁ munikr̥tē makaradhvajasya ||11||
dhyānāyanaṁ prahasitaṁ bahulādharōṣṭha
bhāsāruṇāyitatanudvijakundapaṅkti |
dhyāyētsvadēhakuharē’vasitasya viṣṇōr
bhaktyārdrayārpitamanā na pr̥thagdidr̥kṣēt ||12||
|| iti śrīmadbhāgavatē tr̥tīyaskandhē ēkōnatriṁśādhyāyē bhagavaddhyānam ||