అథ అష్టమహీషియుక్తశ్రీకృష్ణస్తోత్రం‌
హృద్గుహాశ్రిత పక్షీంద్ర-
వల్గువాక్యైః కృతస్తవ |

తద్గరుత్కంధరారూఢ
రుగ్మిణీశ నమోఽస్తు తే || 1||

అత్యున్నత్యాఽఖిలైః స్తుత్య
శ్రుత్యంతాత్యంతకీర్తిత |

సత్యయోహిత సత్యాత్మన్
సత్యభామాపతే నమః || 2||

జాంబవత్యాః కంబుకంఠా-
లంబిజృంభికరాంబుజ |

శంబుత్ర్యంబకసంభావ్య
సాంబతాత నమోఽస్తు తే || 3||

నీలాయ విలసద్భూషా-
జాలాయోజ్జ్వలమాలినే |

నీలాలకోద్యత్ఫాలాయ
కాలిందీపతయే నమః || 4||

జైత్రచిత్రచరిత్రాయ
శాత్రవానీకమృత్యవే |

మిత్రప్రకాశాయ నమో
మిత్రవిందాప్రియాయ తే || 5||

బాలనేత్రోత్సవానంత-
లీలాలావణ్యమూర్తయే |

నీలాకాంతాయ తే భక్త
పాలాయాస్తు నమో నమః || 6||

భద్రాయ స్వజనావిద్యా-
నిద్రావిద్రావణాయ వై |

రుద్రాణీభద్రమూలాయ
భద్రాకాంతాయ తే నమః || 7||

రక్షితాఖిలవిశ్వాయ శిక్షితాఖిలరక్షసే |

లక్షణాపతయే నిత్యం
భిక్షుశ్లాఘ్యాయ తే నమః || 8||

షోడశస్త్రీసహస్రేశం
షోడశాతీతమచ్యుతం‌ |

ఈడేత వాదిరాజోక్త-
ప్రౌఢస్తోత్రేణ సంతతం‌ || 9||

|| ఇతి శ్రీవాదిరాజకృతం అష్టమహీషియుక్తశ్రీకృష్ణస్తోత్రం‌ ||