ಅಥ ಅಷ್ಟಮಹೀಷಿಯುಕ್ತಶ್ರೀಕೃಷ್ಣಸ್ತೋತ್ರಮ್‌
ಹೃದ್ಗುಹಾಶ್ರಿತ ಪಕ್ಷೀಂದ್ರ-
ವಲ್ಗುವಾಕ್ಯೈಃ ಕೃತಸ್ತವ |

ತದ್ಗರುತ್ಕಂಧರಾರೂಢ
ರುಗ್ಮಿಣೀಶ ನಮೋಽಸ್ತು ತೇ ||೧||

ಅತ್ಯುನ್ನತ್ಯಾಽಖಿಲೈಃ ಸ್ತುತ್ಯ
ಶ್ರುತ್ಯಂತಾತ್ಯಂತಕೀರ್ತಿತ |

ಸತ್ಯಯೋಹಿತ ಸತ್ಯಾತ್ಮನ್
ಸತ್ಯಭಾಮಾಪತೇ ನಮಃ ||೨||

ಜಾಂಬವತ್ಯಾಃ ಕಂಬುಕಂಠಾ-
ಲಂಬಿಜೃಂಭಿಕರಾಂಬುಜ |

ಶಂಬುತ್ರ್ಯಂಬಕಸಂಭಾವ್ಯ
ಸಾಂಬತಾತ ನಮೋಽಸ್ತು ತೇ ||೩||

ನೀಲಾಯ ವಿಲಸದ್ಭೂಷಾ-
ಜಾಲಾಯೋಜ್ಜ್ವಲಮಾಲಿನೇ |

ನೀಲಾಲಕೋದ್ಯತ್ಫಾಲಾಯ
ಕಾಲಿಂದೀಪತಯೇ ನಮಃ ||೪||

ಜೈತ್ರಚಿತ್ರಚರಿತ್ರಾಯ
ಶಾತ್ರವಾನೀಕಮೃತ್ಯವೇ |

ಮಿತ್ರಪ್ರಕಾಶಾಯ ನಮೋ
ಮಿತ್ರವಿಂದಾಪ್ರಿಯಾಯ ತೇ ||೫||

ಬಾಲನೇತ್ರೋತ್ಸವಾನಂತ-
ಲೀಲಾಲಾವಣ್ಯಮೂರ್ತಯೇ |

ನೀಲಾಕಾಂತಾಯ ತೇ ಭಕ್ತ
ಪಾಲಾಯಾಸ್ತು ನಮೋ ನಮಃ ||೬||

ಭದ್ರಾಯ ಸ್ವಜನಾವಿದ್ಯಾ-
ನಿದ್ರಾವಿದ್ರಾವಣಾಯ ವೈ |

ರುದ್ರಾಣೀಭದ್ರಮೂಲಾಯ
ಭದ್ರಾಕಾಂತಾಯ ತೇ ನಮಃ ||೭||

ರಕ್ಷಿತಾಖಿಲವಿಶ್ವಾಯ ಶಿಕ್ಷಿತಾಖಿಲರಕ್ಷಸೇ |

ಲಕ್ಷಣಾಪತಯೇ ನಿತ್ಯಂ
ಭಿಕ್ಷುಶ್ಲಾಘ್ಯಾಯ ತೇ ನಮಃ ||೮||

ಷೋಡಶಸ್ತ್ರೀಸಹಸ್ರೇಶಂ
ಷೋಡಶಾತೀತಮಚ್ಯುತಮ್‌ |

ಈಡೇತ ವಾದಿರಾಜೋಕ್ತ-
ಪ್ರೌಢಸ್ತೋತ್ರೇಣ ಸಂತತಮ್‌ ||೯||

|| ಇತಿ ಶ್ರೀವಾದಿರಾಜಕೃತಂ ಅಷ್ಟಮಹೀಷಿಯುಕ್ತಶ್ರೀಕೃಷ್ಣಸ್ತೋತ್ರಮ್‌ ||